1 Mose 4 - Bible en Kiyombe

Khayini ayi Abeli

¹ Adami wuzaba nketo andi Eva. Yandi wubaka buemba, wubuta muana wu bakala, wumvana zina Khayini. Wunkamba: «Mbutidi muana wu bakala mu lusadusu lu Yave.»

² Wubuta diaka khomba Khayini, wukavana zina di Abeli. Abeli wuba mvungi mameme, Khayini, nkuni wu zitsola.

³ Lumbu kimosi, Khayini wunata mim'butu mintoto mi kayonzika mu vana nkayilu kudi Yave.

⁴ Abeli phe wunata nkayilu wu bana ba mameme ba kitoko ayi manzi mawu. Diawu Yave wuyangalala mu Abeli ayi nkayilu andi.

⁵ Vayi kasi yangalala ko mu Khayini ayi nkayilu andi. Diawu dimfuemisa ngolo ayi zizi kiandi kiba na yindindi.

⁶ Yave wukamba Khayini: «Bila mbi wididi nganzi ayi bila mbi zizi kiaku kidi nayindindi?

⁷ Ti wulenda diaka vanga dimbote, buna mawununga, disumu didi banga simbi kikedi va muelo aku. Tidi kuyala, vayi ngeyo ba mfumu mu diawu.»

⁸ Vayi Kayini wukamba khomba andi Abeli: «Bika tutotuka kueto ayi tueyendingi malembe malembe.» Bu batula ku nsitu, Khayini wubuila Abeli, khomba andi ayi wumvonda.

⁹ Yave wuyuvula Khayini: «Kue kuidi Abeli, khomba aku?» Khayini wuvutula : «Nzebiami ko. Minu ndidi nkebi khomba ami?»

¹⁰ Yave wuvutula: «Diambu mbi vengi? Menga ma khomba aku malembo kumbi, malembo yamikini tona va ntoto nate kuaku ku ndidi.

¹¹ Tona buabu singulu kuaku ayi kukulu mu ntoto wuzibudi munu mu yakula mu koko kuaku menga ma khomba aku wuwuvondidi.

¹² Thangu zizio wela kuna mu ntoto, wulendi ko buela kuvana bimvuama biandi. Mawuba ndiengidi ayi nzungani va ntoto.»

¹³ Khayini wukamba Yave : «Zitu ki disumu diami kilutidi munene mu nata kiawu.

¹⁴ Tala, wukhukidi buabu thama va ntuala bizizi bi batu ayi va ntuala zizi kiaku. Mandiba ndiengidi ayi nzungani va ntoto. Woso mutu wukumbona makaphonda.»

¹⁵ Yave wunkamba: «Woso wumvonda Khayini, kafueti vutudulu nlandu nkumbu tsambudi.» Yave wutula dimbu kudi Khayini muingi woso mutu wukumona kabika kumvonda.

¹⁶ Buna Khayini wubotuka va zizi ki Yave, wuyenda kadi mu tsi Nodi, yidi ku ntotukilanga thangu ku Edeni.

Nkuna Khayini

¹⁷ Khayini wuzaba nketo andi, niandi wubaka buemba ayi wubuta Enoki. Khayini wutunga mbanza yikavana zina di muana andi Enoki.

¹⁸ Enoki wubuta Iladi, Iladi wubuta Mehuyaeli, Mehuyaeli wubuta Metusaeli, Metusaeli wubuta Lemeki.

¹⁹ Lemeki wukuela baketo bole, zina di wuthete Ada, wunzole Tsila.

²⁰ Ada wubuta Yabali, niandi disa di batu bankalanga mu nzo zingoto ayi bantuilanga bibulu.

²¹ Zina di khomba andi, Yubali, khaya yi babo bansikanga tsambi yi nsinga ayi phitula.

²² Tsila phe wubuta Tubali-Khayini, mfudi bisadulu biphila mu phila bitsongo ayi bisengo. Busi ki Tubali-Khayini wuba Naama.

²³ Lumbu kimosi, Lemeki wukamba kudi baketo bandi: «Ada ayi Tsila, weno Mbote ndinga ami, Lubaketo ba Lemeki, lutoma Libula matu meno mu Wa phova ami: Ndivondidi mutu Wunduekidi, inga ditoko Diadi kaphondidi.

²⁴ Ti Khayini lenda vutudulu Nlandu khumbu tsambudi, Buna Lemeki lenda Vutudulu Lusambudi ayi Khumbu tsambudi.»

²⁵ Adami wuzaba diaka nketo andi. Eva wubuta muana bakala, wumvana zina di Seti, bila wukamba: «Yave wupheni muana wunkaka va fulu ki Abeli wubavonda kudi Khayini.»

²⁶ Seti phe wubuta muana wu bakala. Wumvana zina Enosi. Mu thangu yoyo batu batona sambila Nzambi mu zina di Yave.