1 Mose 38 - Bible en Kiyombe

Yuda ayi Tamali

¹ Buna mu thangu yina, tala mambu mabua: Yuda bukavambana ayi zikhomba ziandi zi babakala, wutedimisa nzo andi yi ngoto fika fika ayi bakala, muisi Adulami, zina diandi diba Hila.

² Kuna,Yuda wumona muana ndumba wu muisi Kanana, zina diandi diba Sua. Buna wumbonga ayi wubundana yandi.

³ Ndumba beni wubaka buemba. Landila dio, wubuta muana bakala ayi wuntedila mu zina di Ele.

⁴ Wubuela baka buemba. Kulanda, wubuta muana bakala ayi wuntedila mu dizina di Onani.

⁵ Khumbu mosi diaka wubuta muana bakala ayi wuntedila mu dizina di Sela. Mu thangu Sela kabutuka,Yuda wuba ku Kezibi.

⁶ Kulanda, Yuda wukuedila Ele, muana andi wuthete wu bakala, nketo zina diandi diba Tamali.

⁷ Vayi Ele, muana wuthete wubakala wu Yuda wuba mutu mbimbi va meso ma Yave, buna Yave wumvonda.

⁸ Buna Yuda wukamba Onani:"Zebi mafuiti vanga buwudi butu ki mfuidi: fuiti vana nkuna kudi khomba aku. Diawu, kuela difuola."

⁹ Vayi Onani wuzaba ti nkuna beni wisi mba ko wandi, tala mayiza bua: Mu thangu kabebundananga na nketo khomba andi yi bakala wubavombisanga mabuta mandi va ntoto, mu diambu kabika vana nkuna kudi khomba andi yi bakala.

¹⁰ Diambu di kabavanganga diba dimbimbi va meso ma Yave, Yave wumvonda niandi phe.

¹¹ Buna Yuda wukamba nzitu andi Tamali: «Zinga mu kifuola mu nzo se diaku nate muana ami wubakala Sela kanyunduka.» Bila wubakukikambanga: «Bulendakana ti niandi phe wulenda fua banga zikhomba ziandi zi babakala.» Tamali wuyenda ayi wutatamana zinga mu nzo se diandi.

¹² Diawu, bilumbu biyiza ba biwombo, ayi muana nketo wu Sua, nkazi Yuda, wufua, Yuda wuviokisa thangu matanga. Landila dio, wukuma, niandi ayi Hila, nkundi andi muisi Adulami, kudi bamvukanga mika mi mameme mandi ku Timina.

¹³ Tamali bu kawa ti nzitu andi wuyenda ku Timina mu kuezengi mika mi mameme mandi,

¹⁴ wuvula minlele miandi mi kifuola, wuvuata lobi yikula, wukifuka zizi ayi wukala va muelo mbanza Enayimi, yidi mu nzila Timina. Bila wumona ti Sela wuyunduka vayi basi kumvana ko kudi niandi muingi kaba nketo andi.

¹⁵ Buna Yuda wumona, wumbanzila ti ndumba leta bila wusueka zizi kiandi.

¹⁶ Buna wuyenda va kaba, va dambu nzila ayi wukamba: «Ndikubombidila, kikinina tubundana yaku.» Bila kasi zaba ko ti yandi nzitu andi wunketo. Vayi wunkamba: «Mbi wukuphana muingi tubundana yaku?»

¹⁷ Yuda wukamba : Mandikufidisa muana khombo wu kamba diami. Vayi Tamali wukamba: «Ninga, vayi wumbikila dimbu tekila wumvanga dio.»

¹⁸ Wuyuvula: «Kima mbi tidi?» Buna Tamali wukamba: «Nlunga widi na zina diaku, phonda aku ayi nkawa aku widi mu koko kuaku.» Buna wumvana biawu ayi wubundana yandi, wubaka buemba.

¹⁹ Buna Tamali wutelama ayi wuyenda, wuvula lobi yikula ayi wubuela vuata nlele mi kifuola.

²⁰ Ayi Yuda wufidisa muana khombo mu nzila nkundi andi muisi Adulami, muingi kabonga nsimbu mu mioko mi nketo, vayi kasi buela kumona ko.

²¹ Wutona yuvula ba bakala ba fulu kiandi, wukamba: «Kue kuidi ndumba leta wubatelamanga ku Enayimi, va ndambu nzila vava?» Vayi bamvutudila: «Kuisi ko ndumba leta va fulu kiaki.»

²² Ku zimunina, wuvutuka kudi Yuda ayi wukamba: «Ndikadi nkumona ayi babakala ba fulu kiokio bakembi ti kutekele ba ko ndumba leta va fulu kiaki.»

²³ Buna Yuda wukamba: «Kabonga kuandi bima beni, kavua kuandi biawu, muingi tubika bua mu mvuezolo. Ndifidisidi muana khombo, vayi ngeyo, wukadi kummona.»

²⁴ Landila ngonda tatu, bakamba Yuda: «Tamali nzitu aku wunketo wusedi kindumba ayi tala weka mu buemba mu diambu di kindumba kiandi.» Buna Yuda wukamba: «Luntotulanu ayi kaviku ku mbazu.»

²⁵ Bu bantotula, wuvekisa thumu kudi nzitu andi wubakala: «Fiongunina bima. Nlunga wawu, phonda ayi nkawa bivuiwulu kudi mutu wuthudidi buemba. Tala biawu, ndikubombidila, nani vuidi bio.»

²⁶ Buna Yuda wubifiongunina ayi wukamba: «Tamali wundutidi lunungu, bila ndisi kumvana ko kudi muana ami Sela, muana ami wubakala. Ayi kasi buebundana yandi ko.»

²⁷ Thangu buta bu yiduka, wumona ti bitsimba biba mu vumu kiandi.

²⁸ Mu thangu kabebuta, wumosi mu bawu wunonuna koko, ayi mbutisi wusimba koko beni ayi wukanga tini kinlele kimbuaki, wukamba: Niandi niawu totukidi wuthete.

²⁹ Bu kavutula koko kuandi, khomba andi wutotuka. Mbutisi wuyamikina: «Phila muamvu wukizibudidi!» Yuda wutedila muana mu zina di Pelesi dibangudulu: «Muamvu.»

³⁰ Landila dio, khomba andi yibakala wuba na nsinga mbuaki mu koko, wutotuka ayi bantedila mu zina di Zela.