1 Mose 35 - Bible en Kiyombe

Yakobi wuyenda ku Beteli

¹ Landila dio, Nzambi wukamba Yakobi: «Telama! Kuma ku Beteli ayi kala kuna. Tunga kuna diziku mu diambu di Nzambi niowo wumonikina mu thangu wubatina va ntuala Esawu, khomba aku.»

² Buna Yakobi wukamba basi nzo andi ayi babo baba yandi: «Botuleno zinzambi zinzenza zidi va khati ka beno. Lukivedisa ayi viakisanu minyunga mieno.

³ Ayi bika tutelama ayi bika tukuma ku Beteli ayi kuna mandi tunga diziku mu diambu di Nzambi niowo wuphutudidi mu lumbu ki phasi ziami ayi wubedi nami mu nzila mu thangu ndiyenda.»

⁴ Bavana kudi Yakobi zinzambi zizio zinzenza ziba yawu mu mioko miawu ayi minlunga miba yawu mu matu, Yakobi wuzika bio ku tsi nti Telebinta wuba fika fika ayi Sikemi.

⁵ Landila dio, bayenda ayi wonga wu Nzambi wubua mu zimbanza zi kinzungidila diawu kuisi ba ko mutu wulandakana bana babakala ba Yakobi.

⁶ Ku zimunina Yakobi wutula ku Luzi yidi ku tsi yi kanana dibangudulu Beteli, niandi ayi batu babo baba yandi.

⁷ Buna wutedimisa vana diziku ayi wutedila fulu beni: «“El-Beteli”», bila vana Nzambi kakimonikisa kudi niandi mu thangu keba tina khomba andi.

⁸ Ku manima, Debola, ndezi Lebeka wufua ayi wuziku ku ndambu Beteli, va tsisi nti wunene wowo Yakobi katedila: «“Nti bidilu.”»

⁹ Buna Nzambi wumonikina diaka Yakobi bu kavutuka ku ndimba Alami ayi wunsakumuna.

¹⁰ Nzambi wunkamba: «Zina diaku diba Yakobi vayi balendi buekutedila ko mu zina di Yakobi. Tona buabu zina diaku dieka Isaeli.» Buna Nzambi wutona kuntedila mu zina di Isaeli.

¹¹ Nzambi wubuela kunkamba: «Ndidi Nzambi, Phungu Tulendo. Butana ayi nieka: Makanda ayi kimvuka ki makanda mabitotukila mu ngeyo ayi mintinu mami totukila mu luketo luaku.

¹² Mandikuvana tsi yindivana kudi Abalahami ayi Isaki ayi mandivana yawu kudi nkuna aku wunkuiza ku mbusa.»

¹³ Buna Nzambi wutombuka va mbata zizi kiandi, tona va fulu kikamokana yandi.

¹⁴ Buna Yakobi wutedimisa dikunzi di matadi va fulu kiokio basolula yandi, kunzi di matadi, yandi wudukula dio malavu ayi mafuta.

¹⁵ Yakobi wutedila Beteli dibangudulu: «“nzo Nzambi”», fulu kiokio Nzambi kasoludila yandi.

Mbutukulu yi Benyamini ayi mfuilu wu Lakheli

¹⁶ Yakobi ayi kanda diandi babotuka ku Beteli. Mua thatuki yiba tekila mu tula ku Efalata mu thangu Lakheli kabuta, mbutulu beni yiba yi phasi beni.

¹⁷ Mu thangu keba buta mu phasi, nketo wumbutisanga wunkamba : «Bika mona wonga, bila buedi buebaka muana wunkaka wu bakala.»

¹⁸ Bu keka mana moyo, wuntedila Bene-Oni, dibangudulu: «“Muana bakala wu bidilu”», vayi se diandi wumvana zina Benyamini. Dibangudulu: «Muana wu “koko kulubakala.”»

¹⁹ Lakheli wufua ayi wuziku mu nzila Efalata, dibangudulu Betelemi.

²⁰ Yakobi wutedimisa ditadi va biziami biandi: nate buabu bantedilanga dio: «“Tadi di biziami bi Lakheli.”»

Lubeni vengi mambi vantuala se diandi

²¹ Landila dio, Isaeli wuyenda ayi wutedimisa nzo andi yi ngoto ku ndambu yi nkaka yi Mingidali- Edeli.

²² Tala mabua mu thangu Isaeli ka kala mu ndambu tsi beni, khumbu mosi, Lubeni wuyenda leka ayi Bila, nketo wunkaka wu se diandi, ayi Isaeli wuwa diawu. Buna bana ba Yakobi baba thalu yi kumi na zole:

²³ Bana ba babakala bambutila Leya bawu baba: Muana wuthete wu Yakobi, Lubeni, landakana Simeoni, Levi, Yuda, Isakali ayi zabuloni.

²⁴ Bana ba babakala bambutila Lakheli bawu baba: Yosefi ayi Benyamini.

²⁵ Bana ba babakala bambutila Bila, sielo ki nketo ki Lakheli bawu baba: Dani ayi Nefatali.

²⁶ Bana bababakala bambutila Zilipa, sielo ki nketo ki Leya bawu baba: Ngadi ayi Aseli. Bawu bobo bana ba babakala ba Yakobi babutukila mu ndimba Alami.

Mfuilu wu Isaki

²⁷ Buna Yakobi wutula kudi se diandi Isaki, ku Mamele ma Kiliati-Alaba, dibangudulu Hebeloni, ku tuama zingila Abalahami ayi Isaki.

²⁸ Lumbu bi Isaki biba khama mosi lunana lu mimvu.

²⁹ Buna Isaki wuzenga vumunu ayi wufua, wubundana ayi bakulu bandi, wukala kinunu ayi wuyukuta bilumbu. Bana bandi ba babakala Esawu ayi Yakobi banzika.