1 Mose 34 - Bible en Kiyombe

Simeoni ayi Levi bavonda basi Sikemi

¹ Buba ti Dina muana wunketo Leya kabutila Yakobi, wubatotukanga thangu ka thangu mu tala bana bandumba basi tsi beni.

² Buna Sikemi, muana wubakala wu mfumu tsi, Hamoli, muisi Hivi, wumona, wumbonga, wuleka yandi ayi wuzaba nitu andi mu kingolo.

³ Buna muela andi Wukangama ngolo ayi Dina, muana wunketo wu Yakobi. Sikemi wutoma nkunzola beni ayi wumokana yandi mu mbembo yi nlembami.

⁴ Ku zimunina Sikemi wukamba se diandi Hamoli: «Wumbongila ndumba yoyo kaba nketo ami.»

⁵ Yakobi wuwa ti ba bundula muana andi wunketo. Vayi bana bandi ba babakala baba ku nsitu ayi bibulu, Yakobi wuba na sui nate bavutuka.

⁶ Mu thangu yilanda, Hamoli, se di Sikemi wuyenda kudi Yakobi mu solula .

⁷ Bana ba Yakobi bavutuka ku buala. Bu Bawa diambu beni, batu beni bamona nganzi, bafuema beni, bila Sikemi wuvanga diambu di tsoni mu Isaeli bu kazaba nitu muana Yakobi wunketo, nganu diphila yayi dilendi vangama ko.

⁸ Buna Hamoli wumoka yawu banga buabu: «Mu matedi muana ami Sikemi, muela andi wukangimi ayi muana aku wunketo, ndikulubombidila, lumvani kudi yandi muingi kaba nketo andi".

⁹ Ti dilenda zolakana, tuvangeno nguizani: malutuvana nga bana beno ba baketo ayi beno malubonganga bana beto ba babaketo.

¹⁰ Beno lulenda kala yeto ayi tsi mayiba yizibuka kudi beno: Kaleno yeto, kitileno muna ayi bakeno mvuilu mu tsi beni.»

¹¹ Sikemi wukamba se ayi zikhomba zi Dina: «Bika namona nlemvo mu meso meno ayi mandivanga moso ma lukukhamba.

¹² Buelanu thalu mbongo zi dikuela ayi mioso minkayilu mi lukuthomba, khubamene mu vana boso bulukundombila, luphani kaka muana ndumba muingi kaba nketo ami.»

¹³ Buna Bana ba babakala ba Yakobi bavutudila Sikemi ayi se diandi Hamoli mu bukhita bila Sikemi wubundula busi kiawu Dina.

¹⁴ Ayi babakamba diaka: «Tulendi vanga diphila yoyo ko mu vana busi kieto kudi bakala dikambu zengo bila madi ba diambu di tsoni kudi beto.

¹⁵ Tulenda kikinina enati lueka banga beto, bu luzengidi masutu ma babakala beno babo.

¹⁶ Mu nzila yoyo, matuluvana bana beto ba baketo, matubonga phe beno, matuzinga neno va kimosi ayi matu ba kanda dimosi.

¹⁷ Vayi ti lumengi kueno kikinina zengo, matubonga busi kieto ayi matuenda kueto.»

¹⁸ Phova ziawu ziyangidika Hamoli ayi muana andi Sikemi.

¹⁹ Ditoko wuvanga mu nsualu diodio dikambu, bila wuzola beni muana Yakobi wunketo. Wuba wumosi mu bana babo wuluta zitusu mu nzo se diandi.

²⁰ Hamoli ayi muana andi Sikemi bayenda va muelo mbanza awu ayi bakamba banga buabu kudi babakala ba mbanza:

²¹ «Babakala baba badi yeto mu yenge. Bika bakala kuawu mu tsi eto ayi bakita kuawu bila tsi yidi yivombila va ntadisi awu, tulenda kuela bana bawu babaketo ayi tulenda ku bavana bana beto ba ndumba.

²² Mu diambu dimosi kaka, babakala baba mabakikinina mu kala yeto ayi ba batu bamosi ayi beto, bika babakala babo bazengo banga bubadidi bazengo.

²³ Buna bibulu biawu bifioti, mvuilu awu ayi bibulu biawu binene bilendi ba bieto ko? Tukikinineno kaka mabalombidi muingi bakala neto.»

²⁴ Batu babo babatotukanga va muelo wu mbanza babawanga Hamoli ayi muana andi Sikemi, bana babo ba babakala bakinina mu zengo.

²⁵ Tala mambu mabua: Mu lumbu kintatu, babakala bu bakidi moni phasi zi ziphuta, bana bole ba Yakobi, Simeoni ayi Levi, bakhomba zi Dina, babonga sabala, bakota mu mbanza, mu kinzimbukila, bavonda babakala babo.

²⁶ Bavonda Hamoli ayi muana andi Sikemi mu sabala kilengolo mbote, babonga busi kiawu Dina ku nzo Hamoli ayi batotuka.

²⁷ Bana bankaka ba babakala ba Yakobi bazoma bobo baba ziphuta ayi batana mbanza bila babundula busi kiawu.

²⁸ Baziona mameme, zikhombo, zingombe ayi ziphunda, ayi bima bibio biba mu mbanza ayi ku nsitu.

²⁹ Babonga bibio biba lenda zingila, bana babo bafioti bawu babo ayi baketo ayi tana bima bibio biba mu zinzo ziawu .

³⁰ Buna Yakobi wukamba Simeoni ayi Levi: «Luphangidi diambu di kiadi mu kuthula mutu wumbi kudi basi tsi, basi kanana ayi basi pelesi. Tuidi kueto bafioti, mabakutakana kithatu kudi minu mu kunduanisa ayi kuphonda, mu kedika mandi fukusua minu ayi nzo ami.»

³¹ Buna Simeoni ayi Levi bavutula: «Tulenda kueto bika busi kieto banga ndumba leta?»