1 Mose 33 - Bible en Kiyombe

Yakobi ayi Esawu babuanana

¹ Landila dio, Yakobi wuvumbula meso, wumona Esawu wulembo yizi na khama ziya zibabakala. Wuvasa bana va khati ka Leya, Lakheli ayi sielo biandi biole bi bakheto.

² Buna wutula va ntuala bisielo biandi biole bibaketo ayi bana bawu, ku mbusa awu, Leya ayi bana bandi, ku mbusa babo, Lakheli ayi Yosefi.

³ Bosi yandi veka wuvioka va ntuala awu ayi wufukama zizi va ntoto khumbu tsambudi nate kafikama vaba khomba andi Esawu.

⁴ Buna Esawu wuyiza nsualu mu kumbuana, wubua va tsingu andi ayi wumbumba, bawu babole badila.

⁵ Landila dio, Esawu wuvumbula meso, wumona baketo ayi bana. Wuyuvula Yakobi: «Banani bobo badi yaku?» Buna Yakobi wuvutula: «Bana Nzambi kaveni mu nlemvo andi kudi sielo kiaku.»

⁶ Bisielo bi baketo bafikama, bawu ayi bana bawu, buna bayinika ntu miawu va ntoto.

⁷ Leya phe wufikama ayi bana bandi, bayinika ntu miawu va ntoto. Buna Yosefi ayi Lakheli bafikama ayi bayinika ntu miawu phe.

⁸ Esawu wuyuvula: «Mbi tidi vanga ayi kabu diadi dibuanani yami?» Yakobi wuvutula: «Nditidi monokono nlemvo mu meso ma mfumu ami.»

⁹ Vayi Esawu wuvutula: «Mbeki kimvuama kiphuele, khomba ami bika bima biaku biba biaku veka.»

¹⁰ Yakobi wumvutudila: «Nana, ndikubombidila.Ti mbonokono nlemvo mu meso maku, kikinina nkayilu ami; ndizidi vantuala aku banga vantuala Nzambi ayi buwundiakudi mu kiese kikio.

¹¹ Tambula nkayilu ami, ndikubombidila, ngeyo pheni wo, bila Nzambi wumbonisini nlemvo ayi mbeki bibio bifueni kudi minu. Wuntatimisa Esawu nate kakikinina.»

¹² Mu thangu yilanda, Esawu wukamba: «Bika tunangukeno ayi tuendeno, minu mandi diata va ntuala aku.»

¹³ Vayi Yakobi wumvutudila: «Mfumu ami, zebi ti bana bakindidi ko ayi mbeki mameme ayi zingombe balembo yemiki bana. Beto kuba diatisa mu kingolo ka diambu ko mu lumbu kimosi, buna bibulu bibio fua mabifua.

¹⁴ Bika mfumu ami kavioka kuntuala sielo kiandi. Vayi yambula ti nditatamana diata boso buthidi mu ndiatulu yi bibulu bidi va ntuala ami ayi bana nate ndueki kudi mfumu ami ku seyili.»

¹⁵ Buna Esawu wukamba: «Thidi kubikila ndambu batu badi yami.» Buna Yakobi wumvutudila: «Bila mbi? Bufueni kaka kudi minu mu monokono nlemvo va meso ma mfumu ami.»

¹⁶ Mu kina kiawu lumbu, Esawu wuvutukila mu nzila andi ku Seyili,

¹⁷ Yakobi wuyenda ku Sukoti. Wutunga nzo kuna mu diambu diandi ayi mianzu mu diambu di bibulu biandi. Diawu bantedilanga fulu kiokio Sukoti, dibangudulu: «“Nzo zi biti.”»

Yakobi wukala ku Sikemi

¹⁸ Landila dio, Yakobi wutoma tula mbote ku mbanza yi Sikemi mu tsi yi Kanana bu kabotuka ku Padani-Alami. Wutungila va fulu kitalane ayi mbanza.

¹⁹ Wusumba kudi bana ba Hamoli, se di Sikemi ndambu ntoto wu tsola va katunga nzo andi yi ngoto mu thalu yi khama bi bivanza bi phalata.

²⁰ Ku landila wutunga diziku va fulu beni ayi wuditedila: Ele, Elohe Isaeli.