1 Mose 32 - Bible en Kiyombe

¹ Buna Labani wutelama nsuka nsuka, wubumba batekolo bandi ayi bana bandi babaketo, wubasakumuna ayi wuvutuka ku buala buandi.

Mbuabununu yi Yakobi ayi Esawu

² Vayi Yakobi wutatamana nzila andi buna zimbasi zi Nzambi ziyiza kumbuana.

³ Yakobi bu kabamona, wuyamikina: «Wawu nkangu wu Nzambi!» Ayi wutedila fulu kiokio Mahanayimi.

⁴ Yakobi wufidisa va ntuala andi zimvuala kudi khomba andi Esawu mu tsi yi Seyilimu ndambu yi buala bu Edomi.

⁵ Wubavana thumunu yayi: «Kambeno banga buabu kudi mfumu ami Esawu: “Tala bukembi kisadi kiaku Yakobi: Ndikedi ku nzo Labani ayi ndizingidi kuna nate buabu.

⁶ Mbeki zingombe ayi ziphunda, mameme ayi zikhombo, bisadi bi babakala ayi bi bakheto Ndibaka lukanu mu kufidisa zimvuala kudi ngeyo mfumu ami Esawu mu diambu nditambula nlemvo va meso mandi.”»

⁷ Zimvuala zivutuka kudi Yakobi ayi bakamba: «Tubedi kudi khomba aku Esawu. Niandi phe wulembo yizi mu kubuana, beki khama ziya zi babakala badi yandi.»

⁸ Yakobi wumona wonga ayi zakama kimbuila. Wuvasa mu makabu mole batu baba yandi, mameme ayi zikhombo, zingombe ayi zikamela.

⁹ Ayi wukikamba: «Ti Esawu tudidi va kabu dimosi ayi muangisini diawu, dikabu disiedi madivuka.»

¹⁰ Yakobi wusambila: «O Nzambi yi khaya ami Abalami, yi se diami Isaki, O Yave, keti ngeyo wukhembi: “Vutuka ku tsi aku, ku kanda diaku ayi mandi vangila mambote.”

¹¹ Ndisi fuana ko mu mambote maku mamo ayi kikuikizi kiwumonisini kudi sadi kiaku Bila mu nkawa ami wumosi kaka ndisabuka Yodani ayi buabu mbe kubika makabu mole.

¹² Lemvuka, wuthanina mu koko ku khomba ami, mu koko ku Esawu! Bila wonga kalembo mbonisa, bila yandi lenda mana ku mbunga, ngudi ayi bana.

¹³ Vayi ngeyo wukamba mu kedika: “Mandi vangila mambote ayi mandi funisa nkuna aku banga nienge va simu di mbu wuka wulendi tangakana ko mu diambu di woka kuandi kuphuele.”»

¹⁴ Wukala va fulu kiokio mu builu buna. Mu bibulu biba yandi, Yakobi wubonga nkayilu mu diambu di khomba andi Esawu.

¹⁵ Khama zole zi zikhombo zikheto, makumole ma zikhombo zi mbakala, khama zole zi mameme makheto ayi makumole ma mameme ma mbakala.

¹⁶ Makumi matatu ma kamela zikheto zilembo yemika ayi bana bawu, makumaya ma zingombe zikheto ayi kumi di zingombe zimbakala, makumole ma ziphunda zikheto ayi kumi di ziphunda zimbakala.

¹⁷ Buna wutambika mu moko ma bisielo biandi kadika nkangu mutu na biandi ayi wubakambanga kudi sielo biandi: «Lutuamineno kuntuala ayi bikeno divuasa va khati dioso dikamba.»

¹⁸ Buna wuvana thumunu kudi sielo kithete ayi wukamba: «Ti Esawu, khomba ami wukubueni ayi wuyuvudi banga buabu: “Na wuvuidi? Kue wulembo yendi? Na vuidi bibulu biobio bidi vantuala aku?”»

¹⁹ Mawuvutula: «“Bi sielo kiaku Yakobi, nkayilu kafidisisidi kudi mfumu ami Esawu ayi niandi veka wulembo yizi ku mbusa eto.”»

²⁰ Buna wuvana thumunu yo yawu kudi sielo kinzole, kudi wuntatu ayi kudi babo babadiata ku mbusa nkangu bibulu ayi wubalubula: «Bo buawu phe malukamba Esawu bu malummona,

²¹ Ayi malu buela kunkamba :“Sielo kiaku Yakobi wulembo yizi ku mbusa eto.”» Bila wubanza banga buabu: «Mandilembika nganzi ziandi bundituamisini nkayilu wawu ayi kumbusa mandimona va ntuala ami ayi bulendakana makathambula mu yenge.»

²² Nkayilu wutuama, vayi niandi veka wusiala va fulu beni mu builu bobo.

Yakobi wunuana ayi Nzambi

²³ Muna builu beni, wutelama, wubonga baketo bandi bole, bisadi biandi biole bi baketo, kumi ayi muana andi wumosi, wusabukila va sabu ki Yaboki.

²⁴ Buna wubabonga ayi wubasabula va fimuila ayi wuviokisa bibio bikavua,

²⁵ Yakobi wusiala niandi veka. Buna mutu mosi wuba nuana yandi mu ngolo zizio nate va nkielo buisi.

²⁶ Mu thangu mutu beni wubanuana yandi kamona ti kasi kunnunga ko, wusimba thingu yi Yakobi ayi dikuma di Yakobi dilebikini bu kabanuana yandi.

²⁷ Landila dio mutu wowo wunkamba: «Wumbiki ndienda bila buisi bukiedi.» " Yakobi wuvutula: «Ndilendi kubika ko ti wukadi kutsakumuna.»

²⁸ Wunyuvula: «Zina diaku nani?» Wumvutudila : «Yakobi.»

²⁹ Wubuela tuba: «Balendi buekutedila Yakobi ko vayi Isaeli bila menuana na Nzambi ayi batu ayi ku tsuka mvita zizio, wunungini kuaku.»

³⁰ Yandi phe wunyuvula: «Wukhambi zina diaku.» Vayi wumvutudila: «Bila mbi yuvudi zina diami?» Mu diodio wunsakumuna va fulu kiokio ki baba.

³¹ Yakobi wukamba: «Mbueni Nzambi zizi mu zizi ayi ndidi wumoyo.» Diawu katedila fulu beni: «Penueli dibangudulu “Zizi ki Nzambi”.»

³² Buisi buba bukia bu kavioka Penueli. Vayi wubatiudika mu diata.

³³ Diawu, nate buabu bana ba Isaeli badianga ko muanzi widi va bunda bunda bila mutu wowo wusimba muanzi widi va yikikina kuma di Yakobi.