1 Mose 3 - Bible en Kiyombe

Bakala ayi nketo batotolo mu nsitu wu Edeni

¹ Buna nioka yilutila bukhita mu bulu bibio bi nsitu bivanga Yave Nzambi. Yiyuvula nketo: «Mu kedika Nzambi wulukembi: “Kadi dieno kadi dikundi di ndima?”»

² Nketo wuvutula kudi nioka: «Beto tulenda dia makundi ma minti midi mu ndima.

³ Vayi mu matedi makundi ma nti widi va khati nsitu, Nzambi wutukembi: “Ka lulendi ku madia ko ayi ka lulendi ku masimba ko muingi luedi fua.”»

⁴ Nioka yikamba kudi nketo: «Nana, lumfueno ko.

⁵ Bila Nzambi zebi ti lumbu luela dia mawu, meso meno mela zibuka, ayi luela ba banga ba nzambi mu zaba mambote ayi mambi.»

⁶ Nketo wumona ti makundi ma nti maba makitoko mu tala, mambote mu dia ayi mazolakana mu vana phisulu. Wubonga dikundi di nti wowo, wudia diawu, wutambika kudi bakala diandi wuba yandi va kimosi, yandi phe wudia diawu.

⁷ Buna meso ma bawu bole mazibuka, bavisa ti pheni baba. Landila mambu momo, babonga meza ma nti kuyu mawu bakanga mu luketo banga minlele.

⁸ Bawa phova Yave Nzambi bu kazieta mu nsitu mu masika. Nketo ayi bakala basuama va khati minti mi nsitu, muingi babika monika kudi Yave Nzambi.

⁹ Buna Yave Nzambi wutela bakala ayi wunyuvula: «Kue widi?»

¹⁰ Yandi wuvutula: «Nguilu phova aku mu ndima, mbueni tsisi, bila pheni ndidi, diawu tsuamini.»

¹¹ Vayi Yave Nzambi wunyuvula diaka: «Nani wukembi ti pheni widi? A bue ngeyo didi kuaku dikundi dinti di ndikukandikila mu dia?»

¹² Bakala wuvutula: «Nketo wuwupheni mu kala yami, niandi wupheni dikundi dinti wowo ayi ndidi diawu.»

¹³ Yave Nzambi wukamba kudi nketo: «Bila mbi vangidi diambu diphila yayi?» Nketo wuvutula: «Nioka yiphunini diawu ndididi diawu.»

¹⁴ Diawu Yave Nzambi kakambila nioka: «Buvengi bobo, ngeyo Singu fuiti singu kaka Va khati ka bulu bibio bidi Moyo ayi biyodama ayi binsitu Ngeyo mawudiatilanga Mu vumu kiaku Bosi mawudianga fundu fundu Lumbu bibio bizingu kiaku.

¹⁵ Manditula kithatu va khati Ka ngeyo ayi nketo, Va khati ka nkuna aku Ayi nkuna andi, Niandi makakukosikisa ntu Ayi ngeyo mawuntebila Mu kikhoso ki tambi.»

¹⁶ Bosi Yave Nzambi wukamba diaka kudi nketo: «Mandi buela zi phasi Ziphuele bu widi mu buemba Ayi mu mianga miphuele Mawubutilanga. Ayi zaba kuaku ti tsatu ziaku Mazibanga kudi bakala diaku, Ayi niandi makakuyalanga.»

¹⁷ Bosi kembi kudi Adami: «Bu wilukidi phova nketo aku ayi didi kuaku dikundi dinti di ndikukandikila mu dia, Ntoto wusingulu mu Diambu diaku. Mu thovokolo yi ngolo Mawubakilanga bidia Biaku mu zingu Kiaku kimvimba.

¹⁸ Ntoto Mawukubutilanga zitsende Ayi zitsolokoto, Fuiti dianga kaka biti bi nsitu.

¹⁹ Mawudianga bidia biaku Mu diunga di mbulu aku, Nate wela vutuka mu ntoto Mu wubongo. Bila widi fundu fundu, Wela buela vutuka mu Fundu fundu.»

²⁰ Buna Adami wuvana kudi nketo andi zina di Eva, bu dibangudulu: «“Wumoyo”», bila niandi ngudi yi babo badi moyo.

²¹ Yave Nzambi wuvangila bakala ayi nketo andi minlele minkanda bibulu, wubavuika miawu.

²² Buna Yave Nzambi wukamba: «Tala buabu! Mutu weka wumosi banga beto mu zaba mambote ayi mambi. Buabu bika tunkandika mu nonuna koko kuandi mu bonga dikundi di nti wumoyo muingi kadia diawu ayi kabika zinga mvu ka mvu.»

²³ Buna Yave Nzambi wunkuka mu nsitu wuba mu Edeni muingi kakunanga mu ntoto mukabongo.

²⁴ Nzambi bu kakuka mutu, wutula ba keluba ku ndambu yintotukilanga thangu yi nsitu wuba mu Edeni ayi sabala kinlemanga, kinzungananga muamo mu tanina nzila nti wumoyo.