1 Mose 29 - Bible en Kiyombe

Yakobi wubuana Lakheli

¹ Landila momo, Yakobi wutelama, wutatamana kuenda ku tsi yintotukilanga thangu.

² Buna wumona dibulu di nlangu mu ndimba, va ndambu yi diawu valeka nkangu mintatu mi mameme ayi zikhombo, bila mimvungi mi makamba beni baba kubanuikina mu dibulu diodio. Tadi dinnene di fuku va dibulu beni.

³ Thangu zizio, bu bameni kutikisa makamba mamo vana, bavindumuna tadi muingi babonga nlangu mu nuikina bibulu, bosi bubameni nua, babavutulanga ditadi va mbata dibulu beni.

⁴ Yakobi wuyuvula mimvungi: «Bakundi bami, kue lubedi?» Bawu bavutula: «Ku Alami tubedi.»

⁵ Niandi wubuela yuvula: «Luzebi Labani, ntekolo Naholi?» Bavutula: «Ninga, tunzebi.»

⁶ Wubuela yuvula: «Widi mbote?» Bawu bavutula: «Ninga, widi mbote. Tala Lakheli, muana andi wunketo lembo yizi ayi mameme.»

⁷ Yakobi wuvutula diaka: «Keti thangu yikhidi, yawu ko thangu yi kutikisa bibulu. Nuikinanu mameme nlangu bosi lubavutula bedie.»

⁸ Bawu bavutula: «Tulendi vanga bobo ko. Tufuiti vingila ti tukutikisi makamba mamo, bosi matuvindubula ditadi muingi tunuikina mameme.»

⁹ Mu thangu Yakobi kakhidi solula yawu, Lakheli wuyiza ayi mameme ma se diandi, bila niandi wuba mvungi wu mameme.

¹⁰ Mu thangu Yakobi kamona Lakheli, muana Labani wu nketo, khomba yi bakala yi ngudi andi, ayi mameme ma Labani, khomba yi bakala yi ngudi andi wuyenda ku dibulu di nlangu, Yakobi wuvindumuna ditadi difuka dibulu ayi wubonga nlangu, wunuikina mameme ma Labani, khomba yi bakala yi ngudi andi.

¹¹ Yakobi wubumba Lakheli, wuboka ayi wudila.

¹² Buna wukamba Lakheli ti niandi wuba butu ki se diandi, ti wuba muana Lakheli. Wuyenda nsualu mu kuekambi nsamu kudi se diandi.

¹³ Tala mayiza, thangu Labani kawa tsangu yi ngizulu yi Yakobi, muana busi kiandi, wuyiza nsualu mu kumbuana. Buna wunsimba mu koko, wumbumba ayi wunata nate kankotisa ku nzo andi. Niandi wukamba Labani ngudi nsamu yi nzietolo andi.

¹⁴ Buna Labani wunkamba: «Kedika ngeyo widi mvesi wu mvesi miami ayi nsuni wu nsuni ami.» Yakobi wukala mu nzo Labani ngonda mosi.

Khuedolo yi Yakobi

¹⁵ Buna Labani wukamba Yakobi: «Ngeyo widi muisi kanda diami, kulendi kutsadila salu kikondolo mfutu ko. Wukhamba, kikua zolele ndikufuta?»

¹⁶ Buna Labani wuba ayi bana bole ba baketo. Zina di muana nkulutu Leya, zina di nleki Lakheli.

¹⁷ Meso ma Leya maba mavevuka, vayi Lakheli wuba nketo wu kitoko mu tala.

¹⁸ Yakobi wuzola ngolo Lakheli, buna wukamba Labani: «Thidi kusadila tsambudi ki mimvu mu diambu di Lakheli, muana aku wunleki.»

¹⁹ Labani wuvutula: «Mbote ndinkuedisa kudi ngeyo vayi bika kudi bakala dinkaka. Diawu kala mu nzo ami.»

²⁰ Yakobi wusadila tsambudi ki mimvu muingi kakuela Lakheli. Wumona mimvu beni banga mikhufi bila wuzola ngolo Lakheli.

²¹ Landila diodio, Yakobi wukamba Labani: «Wuphana nketo ami Lakheli bila bilumbu biami bidukidi muingi tubundisa zinitu.»

²² Buna Labani wukutikisa batu baba kalanga yandi ayi wusadisa ndikulu yinene.

²³ Vayi mu masika wubonga muana andi wunketo Leya ayi wunata mu vinga ki Yakobi.

²⁴ Labani wumvana muana mosi wunketo muingi kaba sielo ki muana andi wunketo Leya, zina diandi Zilipa.

²⁵ Mu nsuka, Yakobi bakudi ti Leya. Buna Yakobi wukamba Labani: «Bila mbi wuphangidi maphila yayi? Keti mu diambu di Lakheli ndiku sadidi kisalu muingi ndikuela. Bila mbi wuphunini?»

²⁶ Labani wuvutula: «Kisi ko fu kieto mu kuedisa nleki tekila nkulutu.

²⁷ Kala thete ayi Leya sabala yayi, bosi mandivana Lakheli ayi fueti kutsadila diaka kisalu tsambudi ki mimvu.»

²⁸ Yakobi wukikinina, bukamanisa sabala yi nyengo wu dikuela di Leya, Labani wumvana Lakheli,

²⁹ Buna Labani wuvana kudi muana andi Lakheli sielo ki nketo, zina diandi Bila muingi kaba sielo kiandi.

³⁰ Yakobi wubundisa phe nitu ayi Lakheli ayi wunzola ngolo viokila Leya. Wutatamana sadila Labani mu tsambudi di mimvu.

Bana ba Yakobi

³¹ Nzambi bukamona ti Yakobi wulenda Leya, wumvana mbutu vayi Lakheli wuba sita.

³² Leya wubaka buemba ayi wubuta muana wubakala, wumvana zina Lubeni bila wukamba: «Yave mueni mvuezolo ami ayi tona buabu nuni ami makanzola.»

³³ Wubuela baka buemba bunzole, wubuta muana wu bakala, ayi wukamba: «Mu kedika Yave mueni ti nuni ami kanzola ko ayi wupheni muana wu bakala wunkaka.» Ayi wumvana zina Simeoni.

³⁴ Wubuela baka buemba buntatu ayi wubuta muana bakala buna wukamba: «Mu khumbu yayi bakala diami makakangama kudi minu, bila mbe kumbutila bana batatu ba babakala» Wumvana zina Levi.

³⁵ Wubaka diaka buemba ayi wubuta muana wunya wu bakala. Wuyamikina: «Khumbu yayi mandi zitisa Yave.» Diawu kantedila mu zina di Yuda. Buna wulembo bue buta.