1 Mose 28 - Bible en Kiyombe

¹ Isaki wutela Yakobi, wunsakumuna ayi wumvana thumunu yayi: «Kadi kuela nketo muisi Kanana.

² Buabu telama ayi yenda ku Padani-Alami munzo yi Betueli, se di ngudi aku. Kuela kuna nketo mu bana ba babaketo ba Labani, khomba ngudi aku.

³ Bika Nzambi yi Lulendo kakusakumuna ayi kakuniekisa ayi mawu ba se di makanda maphuele.

⁴ Nzambi makakuvana lusakumunu lu Abalahami kudi ngeyo ayi kudi nkuna aku muingi wuvua tsi yivuendi, mu tsi yi wididi kinzenza yoyo yikavana kudi Abalahami.»

⁵ Bobo Isaki kavanina Yakobi nsua muingi kenda ku Padani-Alami mu nzo yi Labani, muana Betueli, muisi Alami, khomba Lebeka, ngudi yi Yakobi ayi Esawu.

⁶ Landila diodio, Esawu bukavisa ti Isaki wusakumuna Yakobi ayi wumvana nsua mu kuenda ku Padani-Alami mu kuekuedi nketo kuna, buna wumvana thumunu yayi: kadi bonga nketo va khatika bana ba baketo basi Kanana.

⁷ Yakobi wutumamana mankamba se diandi ayi ngudi andi buna wuyenda ku Padani-Alami.

⁸ Esawu wuvisa ti se diandi Isaki kasi yangalala ko mu bana ba baketo ba basi Kanana.

⁹ Diawu kayendila kudi Isamayeli ayi va mbata baketo baba yandi, wubuela kuela Mahalati muana wu nketo wu Isamayeli, muana Abalahami, niowo wuba busi ki Nebayoti.

Ndozi yi Yakobi

¹⁰ Yakobi wutotuka ku buala bu Beli-Seba, wuyenda ku buala bu Alami.

¹¹ Landila diodio, wutula va fulu kimosi ayi wuleka vana bila buisi buyila, buna wubonga tadi dimosi, wutula dio ku tsi ntu andi ayi wuleka.

¹² Wuloto ndozi: Mueni kikada kitelama va ntoto ayi ntu kiawu wutula nate ku zulu. Zimbasi zi Nzambi zikuma ayi zikulumuka mu kiawu.

¹³ Ayi tala Yave wuba vana yilu kikada ayi wukamba: «Minu ndidi Yave, Nzambi yi khaya aku Abalahami ayi Nzambi yi Isaki. Ntoto wawu wulekidi, mandi vana wawu kudi ngeyo ayi kudi nkuna aku.

¹⁴ Tala nkuna aku mawuba banga fundu fundu di ntoto. Nkuna aku welayalumuka ku ntotukilanga thangu, ku nlekilanga thangu, ku mongo nate ku wanda tsi. Mu nzila aku ayi mu nzila yi bana baku, mandi sakumuna makanda mamo.

¹⁵ Tala, minu ndidi yaku, mandi kutanina mu fulu bibio bimawenda. Mandikuvutula diaka mu tsi yoyo, ndilendi kubika ko. Mandilungisa mamo mandikembi.»

¹⁶ Buna Yakobi wuvumvumuka ku tulu tuandi ayi kembi: «Kedika, Yave widi va fulu kiaki, vayi minu ndisi kudizaba ko.»

¹⁷ Wumona tsisi ayi wubuela kamba: «Fulu kiaki ki ngitukulu! Kedika vava vadi nzo Nzambi ayi vava vadi muelo wu diyilu.»

¹⁸ Yakobi wukotuka mu nsuka nsuka. Wubonga tadi diodio dikatetika ntu andi, wuditedimisa diawu, wudukudila mafuta va yilu diawu.

¹⁹ Bosi wutedila fulu beni mu zina di Beteli, di bangudulu: «“Nzo Nzambi.”» Mu thama, zina di fulu kiokio diba Luzi.

²⁰ Buna Yakobi wudia ndefi, wukamba: «Ti Nzambi maka ba yami ayi wukhebidi mu kedika mu nzila yindilembo yendi ayi wupheni bidia ayi minlele mi vuata,

²¹ ayi ti mvutukidi mu yenge ku nzo yi se diami, buna ngeyo, Yave, mawuba Nzambi ami.

²² Ayi ditadi diadi dithedimisini va fulu kiaki madiba nzo Nzambi ayi mu bibio bimawuphana mandi vana buku ki kumi ki duka.»