1 Mose 27 - Bible en Kiyombe

Yakobi wuyiba lusakumunu lu Esawu

¹ Mu thangu Isaki kamenuna ngolo, meso mandi mayiza ba mbumbuluka ayi makadi buela mona. Wutela muana andi wuthete: «Esawu» Yandi wuvutula: «Minu niandu, ndilembo kuwa.»

² Buna Isaki wunkamba: «Tala buabu ndieka kinunu ayi ndikadi zaba lumbu ki lufua luami.

³ Buabu, ndikubombidila, bonga madionga, buta ayi tsaku, yenda ku nsitu wuphondila bulu.

⁴ Wundambila kiawu banga bundizodilanga, wundatina muingi ndidia mbote ayi muela ami wukusakumuna tekila ndifua.»

⁵ Buna Lebeka wuwa mu thangu Isaki kaba mokana ayi Esawu, muana andi. Buna Esawu wuyenda ku nsitu mu veta bulu ayi nata kiawu.

⁶ Lebeka wukamba muana andi Yakobi: «Nguilu se diaku bukalembo kambi khomba aku Esawu buabu:

⁷ “Wundatina bulu ki nsitu ayi wundambila kiawu banga bundizodilanga, muingi ndidia mbote, muingi ndikusakumuna va meso ma Yave, tekila ndifua.”

⁸ Buabu, muana ami, wunguila, ayi vanga mandieka kukamba.

⁹ Ndikubombidila, yenda bongi mu nkangu bibulu bana bole bakhombo bambote, wubatuadi muingi ndilambila se diaku bidia bimbote phila kanzodilanga.

¹⁰ Mawunata biawu kudi se diaku muingi kadia, ayi kakusakumuna tekila kafua.»

¹¹ Yakobi wuvutula kudi ngudi andi Lebeka buabu: «Esawu, khomba ami widi na mika miphuele mu nitu andi, vayi nkanda nitu ami widi nalengo lengo.

¹² Buabu ti tata wumfifitidi mu nitu, makabakula ti ndidi nkua luvunu, buna mandi baka tsingulu bika lusakumunu.»

¹³ Vayi ngudi andi wumvutudila: «Muana ami, bika tsingulu yibua va minu. Vayi ngeyo, wunguila ayi yenda wumbongila bana ba zikhombo.»

¹⁴ Yandi wuyenda ku babonga, wubanata kudi ngudi andi ayi ngudi andi wulambila Isaki supu banga bukanzodilanga.

¹⁵ Buna Lebeka wubonga minlele mi Esawu, muana andi wuthete wu bakala, miluta kitoko miba mu nzo andi, wuvuatisa biawu Yakobi, muana andi wu bakala wu tsuka

¹⁶ ayi wutula minkanda mi bana ba khombo mu mioko ayi mu dinga.

¹⁷ Bosi wutula mu koko ku Yakobi supu kimbote ayi mapa makalamba.

¹⁸ Buna Yakobi wukota mu nzo kudi se diandi, wukamba: «Se diami» Yandi wuvutula: «Ndilembo kuwe, wukhamba nge nani.»

¹⁹ Yakobi wuvutula kudi se diandi: «Ndidi Esawu, muana aku wuthete. Phengi mamo banga buwukhembi. Ndikubombidila, kala muingi wudia bulu kiami ki nsitu muingi muela aku wutsakumuna.»

²⁰ Vayi Isaki wukamba muana andi wubakala: «Muana ami wubakala, bue metumbu bakila kiawu mu nsualu buabu?» Yakobi wuvutula: «Yave, Nzambi aku, tuedi kiawu va ntuala ami.»

²¹ Buna Isaki wukamba Yakobi: «Ndikubombidila, fikama vava muingi ndififita, buna mandivisa ti ngeyo muana ami Esawu voti ve.»

²² Yakobi wufikama vakala se diandi Isaki, buna niandi wumfifita ayi wunkamba: «Mbembo aku, mbembo Yakobi vayi mioko mi Esawu.»

²³ Vayi kasi kumvisa ko bila mioko miandi miba ayi mika banga mi Esawu, khomba andi. Buna wunsakumuna.

²⁴ Bosi wunyuvula diaka: «Mu kedika ngeyo widi muana ami Esawu?» Yandi wuvutula: «Ninga, minu kuandi.»

²⁵ Isaki wuvutula: «Fikika yawu va ndidi muingi ndidia mbizi yi nsitu yi muana ami muingi muela ami wukusakumuna.» Buna wumfikikila yawu ayi Isaki wudia. Yakobi wunatina phe vinu, niandi wunua.

²⁶ Landila diawu, Isaki, se diandi, wunkamba: «Ndikubombidila, fikama vava va ndidi ayi wumbumbi, muana ami.»

²⁷ Yakobi wufikama ayi wumbumba. Isaki wuwa tsudi minlele miandi, buna wutona kunsakumuna ayi wunkamba: «Tala, tsudi yi muana ami yidi banga tsudi tsola yisakumuna Yave.

²⁸ “Bika Yave Kakunokisina Dinoko di zulu, Bika ntoto wukubutila Bidia biphuele muingi Mbongo ayi vinu Biba yaku.

²⁹ Bika batu ba Zitsi zinkaka Bakusadila ayi Batu bamakanda Manzenza bakufukimina. Ba mfumu zi Zikhomba ziaku, Bika bana ba ngudi aku Bakubuongimina, Bika kasingu Mutu wela kusinga, Kasakumunu mutu Wela kusakumuna!”»

³⁰ Tala mambu mabua mu thangu Isaki kamana sakumuna Yakobi, Inga tala mayiza bua mu thangu Yakobi katumbu totuka va thadisi se diandi Isaki: Esawu, khomba andi yi bakala wuvutuka bu kaba ku veta.

³¹ Niandi phe wulamba supu ki mbote ayi wunata kiawu kudi se diandi, wukamba: «Telama, se diami ayi dia mbizi muingi wutsakumuna.»

³² Vayi Isaki, se diandi wunyuvula: «Nge nani?» Yandi wuvutula: «Minu Esawu, muana aku wubakala wuthete.»

³³ Buna Isaki wutona zakama mu ngolo zizio ayi wunyuvula: «Buna nani niowo vondidi bulu ki nsitu, wundatini kiawu ayi ndidi kiawu tekila ngeyo wiza ayi ndisakumuni ayi sikasakumunu.»

³⁴ Esawu bu kaba wa phova zi se diandi, ntima andi wukala kiadi ayi wuyamikina mu ndinga yingolo ayi kingongo. Buna wukamba se diandi: «Tata, wutsakumuna, inga wutsakumuna minu phe, se diami.»

³⁵ Vayi se diandi wunkamba: «Khomba aku wizidingi ayi bukhita mu baka lusakumunu lubedi luaku.»

³⁶ Wuvutula: «Yisi ko mu bila kiokio bakuntedilanga mu zina di Yakobi, “nio wunyibanga” bila khumbu zole kaphunini! Wuyiba kikulutu kiami, buabu tala, meyiba diaka lusakumunu luami.» Bosi wubuela: «Wisi lunda ko lusakumunu mu diambu diami.»

³⁷ Vayi mu vana Esawu mvutu, Isaki wukamba: « Mbekuntula mfumu aku, ayi mbekumvana zikhomba ziandi zizio zi babakala muingi baba bisadi biandi. Mbesakumuna tsola ziandi muingi ziwala mbongo ayi vinu. Mbi ndilenda buela vanga, muana ami?»

³⁸ Buna Esawu wubuela kamba se diandi: «Lolo kuandi lusakumunu lubedi yaku, se diami!» Buna Esawu wudila

³⁹ Buna mu kumvutudila, Isaki, se diandi wunkamba: «Mawuba thama ayi ntoto Wu mbozi, thama ayi Dinoko di mba ku zulu.

⁴⁰ Mawuzingila mu sabala Kiaku ayi mawusadila khomba Aku yi bakala vayi thangu Yela kuiza yiwala Kutumuka mu Kinanga kiandi Ayi ngeyo wela Tolumuna vangu Kikatula va tsingu aku.»

Yakobi wutini kudi nguandi khazi Labani

⁴¹ Vayi Esawu wulunda nganzi mu ntima kudi khomba andi yi bakala Yakobi mu diambu di lusakumunu lunsakumuna se diandi ayi niandi wukikamba: «Bilumbu bi matanga bi se diami bifikimini, landila diawu ndiela vonda Yakobi, khomba ami.»

⁴² Bu batudisila Lebeka ziphova zi Esawu, muana andi wubakala wuthete wutedisa mu nsualu Yakobi, muana andi wu lezi ayi wunkamba: «Wa, Esawu, khomba aku yi bakala makabua ntima ti wukuvondidi.

⁴³ Buabu, muana ami wubakala, wunguila mbote, telama, tinina kudi khomba ami yi bakala Labani ku Alami

⁴⁴ Kuna fueti kala mu ndambu bilumbu nate nganzi zi khomba aku zikulukidi.

⁴⁵ Nate nganzi yi khomba aku yivongidi ayi zimbakene diambu diwumvangidi ayi mandifidisa mutu mu kuiza kulanda. Mbengi kuluzimbisa beno babole lumbu kimosi.»

⁴⁶ Landila diodio, Lebeka wukamba Isaki: «Ndikadi buela mona khini mu zinga mu diambu di bana bandumba ba Heti, bazitu bami. Ti Yakobi kuedidi phe ndumba yi muisi Heti, buna mfunu mbi mu buela zinga!»