1 Mose 26 - Bible en Kiyombe

Isaki ayi Abimeleki

¹ Malema mangolo maba mu tsi, madisuasana ayi mateka ba mu thangu Abalahami. Isaki wuyenda ku Ngelali kudi Abimeleki, ntinu Bafilisteya.

² Yave wummonikina ayi wunkamba: «Kadi kulumuka ku Ngipiti, vayi kala mu tsi beni banga bundikambila.

³ Kala mu tsi beni banga nzenza, mandiba yaku ayi mandikusakumuna. Kudi ngeyo ayi kudi nkuna aku mandivana mintoto mimio ayi bu ndidi Nzambi mandisiamisa ndefi yindileva kudi se diaku Abalahami.

⁴ Mandiniekisa nkuna aku banga zimbuetete zi zulu, mandivana kudi nkuna aku ntoto wuwo, ayi mu nzila nkuna aku makanda mamo va ntoto melasakumunu.

⁵ Bila, Abalahami wuwilu phova ami ayi wukebidi zinduengoso ziami, zithumunu ziami, zinzengolo ziami ayi minsiku miami.»

⁶ Isaki wutatamana kala ku Ngelali.

⁷ Basi tsi banyuvula biuvu mu diambu di nketo andi. Isaki wubavutudila: «Niandi busi kiami.» Wumona wonga mu tuba ti nketo andi, mu diambudi tsisi badi kumvonda kudi batu ba tsi yoyo mu diambu di Lebeka wuba kitoko mu tala.

⁸ Bilumbu bu biwokila ngolo bikabela kuna, tala mayiza : Ntinu Abimeleki, ntinu Bafilisteya, wukengidila va nela, ayi wumona ti Isaki wubasakana ayi Lebeka, nketo andi.

⁹ Abimeleki wutumisa Isaki ayi wunkamba: «Kedika niandi nketo aku. Bila mbi tubidi ti busi kiaku?» Isaki wumvutudila: «Thubidi bobo diambudi tsisi mbueni mu vondo mu bila kiandi.»

¹⁰ Abimeleki wubuela kunkamba: «Mbi biobio wutuvangidi? Fioti kuandi fikambulu nginu bakala dimosi mu batu beto bundisidi nitu ayi nketo aku ayi wadi katubakisa mambu.»

¹¹ Abimeleki wuvana lutumu lualu kudi batu babo: «Woso kuandi mutu wunsimba mutu wawu ayi nketo andi, fua ka fueti fua kaka.»

¹² Landila momo, Isaki wukuna mu tsi beni ayi wuyonzika mbongo khama khama mu mvu beni bila Yave wunsakumuna.

¹³ Ayi wuyiza ba mutu mfunu, wutatamana kuenda kuntuala nate katula mu tezo kizangama.

¹⁴ Wuyiza ba ayi nkangu mameme ayi nkangu zingombe ayi bisadi biwombo nate ba Filistea batona kunzinina.

Isaki vengi nguizani ayi Abimeleki

¹⁵ Mu matedi mabulu mamo ma kaba bisadi bi se diandi, mu thangu se diandi Abalahami, ba Filisiteya bafuka mawu ayi bawesa mawu ntoto.

¹⁶ Abimeleki wukamba Isaki: «Botuka mu tsi eto bila mekutu lutila zingolo.»

¹⁷ Isaki wubotuka kuna, wuyenda tunga mu ndimba Ngelali, ayi wukala muna.

¹⁸ Isaki wubuela kaba mabulu maba teka kaba mu thangu Abalahami, se diandi, vayi ba Filisiteya bamawesa landila lufua lu Abalahami. Ayi wubuela kumavana mazina momawu mavana se diandi Abalahami.

¹⁹ Bisadi bi Isaki bakaba diaka mu ndimba ayi bamona dibulu di nlangu wulenda nuiwu.

²⁰ Vayi mimvungi mi bibulu mi Ngelali babakana ziphaka ayi mimvungi mi Isaki, babakamba: «Nlangu wawu weto.» Isaki wutedila dibulu diodio Eseki: «“Minzonza”» Bila banzonzisa.

²¹ Bakaba diaka dibulu dinkaka di nlangu, dibabafindisila diaka phaka. Wuditedila: «Sitina “Ziphaka.”»

²² Wubotuka kuna, wuyenda ku fulu kinkaka mu kaba dibulu di nlangu dinkaka dibakambu kunzonzisila ayi dikatedila: «Lehoboti “yalumuka”:» «Nzambi wutu veni fulu kisiadila ayi wutuniekisini mu tsi.»

²³ Buna wubotuka kuna ayi wuyenda ku Beli-Seba.

²⁴ Yave wumonikina mu builu buna ayi wunkamba: «Ndidi Nzambi yi se diaku Abalahami. Kadi mona tsisi bila ndidi yaku ayi mu kedika mandikusakumuna ayi niekisa nkuna aku mu diambu di kisadi kiami Abalahami.»

²⁵ Kuna Isaki katunga ziku di minkayilu ayi wusambila Mfumu mu zina diandi. Wutedimisa zinzo zingoto kuna ayi bisadi biandi bakaba dibulu dinkaka di nlangu.

²⁶ Landila diodio, Abimeleki wubotuka ku Ngelali mu kuembuani va kimosi ayi Ahuzati, nluengisi andi ayi Pikoli, mfumu masodi mandi.

²⁷ Isaki wubakamba: «Bila mbi luizidi kudi minu mu kumbona? Beno lundenda ayi lukhuka ku buala bueno.»

²⁸ Bawu bavutula: «Tumueni ti Yave widi yaku. Diawu tukambidi: Bika tudia ndefi beto ayi ngeyo ayi tuvanga nguizani.

²⁹ Leva ndefi ti kulendi kutuvangila dimbimbi ko bila tuisi kusimba mu nitu ko, mambote kaka tukuvangidi bila beto tukubikidi mu kuenda mu yenge. Ayi buabu, widi mutu wusakumunu kudi Mfumu.»

³⁰ Wubavangila ndikulu yinene, badia ayi banua.

³¹ Mu lumbu kilanda, mu nsuka nsuka, batelama ayi balevasana ndefi. Landila diodio, Isaki wubavekisa ayi bayenda mu yenge.

³² Mu lumbu beni, bisadi bi Isaki biyiza mu kunkamba tsangu yi dibulu di nlangu dibakaba. Bankamba: «Tubakudi nlangu.»

³³ Isaki wutedila dibulu di nlangu wowo Siba, dibangudulu: «“Ndefi”» Nate lumbu kiaki mbanza beni yintedolongo Beli-Seba dibangudulu: «“Dibulu di ndefi.”»

Makuela ma Esawu

³⁴ Esawu bu kadukisa makumaya mamvu, wukuela baketo bole ba bisi Heti: Yehuditi, muana Beli, ayi Basimati, muana Eloni muisi Heti.

³⁵ Khuedolo yi baketo ba basi Heti yimonisa Isaki ayi Lebeka phasi.