1 Mose 25 - Bible en Kiyombe

Lufua lu Abalahami. Bana bandi bankaka

¹ Abalahami wubuela kuela nketo wunkaka, zina diandi Ketula.

² Wumbutila bana, Zimilani, Yokasani, Medani, Madiani, Yisebaki, ayi Sua.

³ Yokasani wuba se di Saba ayi Dedani ayi bana ba Dedani bawu baba: Asulimi, Letusimi ayi Lewumimi.

⁴ Bana ba babakala ba Madiani baba Efa, Efeli, Enoki, Abida ayi Elida. Bawu babo baba bana ba babakala ba Ketula.

⁵ Landila diodio, Abalahami wuvana bibio bikabaka kudi Isaki.

⁶ Vayi kudi bana ba babakala ba bamakangu mandi, Abalami wuvana minkayilu ayi bukakhidi moyo, wubabotula vaba Isaki , muana andi, wubafidisa thama ku tsi yintotukilanga thangu.

⁷ Abalahami wuzinga khama mosi lusambudi ayi mvu ntanu.

⁸ Buna Abalahami wutabuka vumunu ayi wufua bu kaba wununa ngolo ayi wuyukuta luzingu, wubundana ayi bakulu bandi bateka fua.

⁹ Buna bana bandi Isaki ayi Isamayeli banzika mu phaka matadi ma Makapela, mu ntoto Efeloni, muana Sohali, muisi Heti, ditalani ayi Mamele

¹⁰ Abalahami wusumba tsola beni kudi basi Heti. Muna bazika Abalahami ayi nketo andi Sala.

¹¹ Landila lufua lu Abalahami, Nzambi wusakumuna Isaki, muana andi ayi Isaki wuba ku Lahayi-Loyi.

Kanda di Isamayeli, muana Abalami

¹² Kiaki kikhulu ki nsamu wu kanda ditotukila mu Isamayeli, muana Abalahami wukabuta ayi Hangali, muisi Ngipiti, kisadi ki nketo ki Sala.

¹³ Tala mazina ma bana ba babakala ba Isamayeli boso bulandasene mazina mawu mu makanda mawu: Nebayoti, muana wuthete wu Isamayeli, Kedali, Adibeli, Mibisami,

¹⁴ Misima, Duma, Masa,

¹⁵ Hadadi, Tema, Yetuli, Nafisi, Ayi Kedema.

¹⁶ Bawu baba bana ba babakala ba Isamayeli ayi mama maba mazina mawu, mu mala mawu ayi mu mianzu miawu mi nzo zingoto ayi kumi mfumu zole, boso buididi zimvila ziawu.

¹⁷ Tala mimvu mi luzingu lu Isamayeli khama mosi makumi matatu ayi tsambudi, buna wutabuka vumunu ayi wufua ayi wubundana ayi bakulu bandi bateka fua.

¹⁸ Ayi bana ba babakala ba Isamayeli baba tona ku Havila nate ku Suli, ditalane ayi Ngipiti, mu nzila Asilia. Niandi veka Isamayeli wuba va thadisi zikhomba ziandi zizio.

YAKOBI 25.19-36.43

¹⁹ Tala nsamu dikanda di Isaki, muana Abalahami. Abalahami weka se di Isaki.

²⁰ Isaki wuba makumi maya ma mvu mu thangu kakuela Lebeka, muana wu nketo wu Betueli, muisi Silia, wuba ku Padani-Alami ayi wuba phe busi ki Labani, muisi Silia.

²¹ Isaki wubombidila Yave mu diambu di nketo andi Lebeka, bila wuba sita. Yave wuwa lusambulu luandi, buna Lebeka wubaka buemba.

²² Vayi bana banuana mu vumu kiandi, buna wukamba: «Ti bobo buididi, bila mbi mfunu mbi mu baka buemba?» Wuyenda yuvula Yave.

²³ Buna Yave wunkamba: «Makanda mole madi mu Vumu kiaku, mawubuta Makanda mole maka Malendi wizana ko. Wumosi Makaluta mu ngolo viokila Wunkaka, nkulutu Makasadila nleki.»

²⁴ Thangu buta buyifuana, Lebeka wubuta bitsimba.

²⁵ Muana wuthete wubutuka wuba wu mbuaki, ayi wuba mika miphuele mu nitu, bamvana zina Esawu.

²⁶ Khomba andi wubutuka phe, koko kuandi kusimbidila kulu ku Esawu, bamvana zina Yakobi. Isaki wuba makumi ma sambanu ma mvu mu thangu bana bobo babutuka.

Esawu wutekisa kikulutu kiandi kudi Yakobi

²⁷ Bana batatamana yonzuka. Esawu wuba muisi nsitu, wuyika mveti bibulu. Vayi Yakobi wuba mutu wukuikama ayi wuzola kala mu nzo yingoto.

²⁸ Isaki wuzola Esawu, bila wuzola dia mbizi vayi Lebeka wuzola Yakobi.

²⁹ Lumbu kimosi, mu thangu Yakobi kabelamba supu, Esawu wuyiza bu kaba ku nsitu ayi wuba wuvonga.

³⁰ Esawu wukamba Yakobi: «Wumbika ndidia supu kimbuaki bila mbevonga.» Diawu bamvanina zina dinkaka Edomi.

³¹ Buna Yakobi wukamba: «Wuthekila lumbu kiaki ki kulutu kiaku.»

³² Esawu wuvutula: «Tala, ndilembo yendi malembe malembe ku mfuilu, kikulutu beni mbi kiku tsia?»

³³ Yakobi wukamba: « Mu lumbu kiaki, leva ndefi.» Buna Esawu wudia ndefi ayi wutekisa kikulutu kiandi kudi Yakobi.

³⁴ Buna Yakobi wumvana mapa ayi supu ki madezo. Esawu wudia, wunua, landila dio, wuyenda kuandi. Buna Esawu kamonina kikulutu banga kima ki phamba.