1 Mose 24 - Bible en Kiyombe

Dikuela di Isaki ayi Lebeka

¹ Abalahami wununa ngolo. Yave wunsakumuna mu mamo.

² Abalahami wukamba sadi kiandi ki zingila thangu ziphuele mu nzo andi ayi kiba kebanga kimvuama kiandi kikio: «Tula koko kuaku va phuasikini zi malu mami,

³ bila mfueti kulevisa ndefi mu zina di Nzambi wuvanga zulu ayi ntoto mu kambu kuedisa muana ami Isaki nketo mu zindumba zi basi Kanana mu tsi yindilembo kadi.

⁴ Vayi mawenda mu tsi ami ayi kudi bakhomba ziami ayi mawunguawusila nketo wu muana ami Isaki.»

⁵ Kisadi wuvutula: «Bulendakana nketo beni makamanga kuiza nzila mosi ayi minumu tsi yayi. Fuiti totula muana aku wubakaka mu tsi yiwutotukila? Ndilenda buela vutula muana aku mu tsi yi wutotukila?»

⁶ Buna Abalahami wuvutula: «Nana! Kadi vutula muana ami kuna!

⁷ Yave, Nzambi yi zulu, wuthotula mu kanda di se diami ayi mu tsi yindibutukila ayi wudia ndefi ti makavana tsi yayi kudi nkuna ami wuwo, ayi makafidisa mbasi andi ku ntuala aku muingi wukuedila muana ami nketo kuna.

⁸ Ti niandi mengi kuiza nzila mosi ayi ngeyo, buna ngeyo kutulu mu ndefi yi wudia kudi minu. Vayi diambu dimosi kaka: Kadi meka vutula muana ami kuna.»

⁹ Kisadi wutula koko va phuasikini zi malu ma mfumu andi Abalahami, ayi wudia ndefi mu diambu beni.

¹⁰ Buna kisadi wubonga kumi di kamela va khati bibulu bi mfumu andi, ayi bima binkaka bi mfunu ayi bi thalu. Buna wuyenda ku mbanza yi Naholi ku Mezopotami.

¹¹ Bukatula lukufi ayi dibulu di nlangu diba va khotolo yi mbanza mubazinganga Naholi, wufukimisa ba kamela. Yiba masika mu thangu baketo bankuizanga mu teka nlangu.

¹² Ayi wusambila: «Yave, Nzambi yi mfumu ami Abalahami, ndikubombidila, wuphangila diambu di ndizidi ayi monisa ntima mbote kudi mfumu ami Abalahami.

¹³ Tala, minu thelamene va ntuala dibulu di nlangu, ayi fioti fisiedi bana baketo ba batu ba mbanza benkankuiza mu teka nlangu.

¹⁴ Bika muana nketo wumandi kamba ti tengika mvungu aku wu nlangu muingi ndinua ayi makakhamba: Nua, ayi mandinuika phe bakavalu baku, buna niandi kubikidi kudi sielo kiaku Isaki, kisadi kiaku! Ayi mandi visa ti songidi zola kikuikizi kiaku kudi mfumu ami.»

¹⁵ Buka kamanisini ko mu sambila, Lebeka, muana nketo wu Betueli, muana Milka, nketo Naholi, khomba Abalahami wutotuka. Wuba na mvungu andi va divangiti.

¹⁶ Wuba muana ndumba wu kitoko mu tala, kasi teka zabu kudi bakala ko. Wunengumuka ku tho yi nlangu, wuwesa mvungu andi ayi wukuma.

¹⁷ Kisadi ki Abalami wuyenda nsualu mu kumbuana ayi wunkamba: «Wumbika ndinua mua ndambu nlangu mu mvungu aku.»

¹⁸ Lebeka wuvutula: «Mfumu ami, nua.» Ayi wutengimisa mvungu andi mu nsualu, mu kunnuikina.

¹⁹ Bukamana kunuikina, wukamba: «Mandi nuikina phe ba kamela baku nate bayukutidi nua nlangu.»

²⁰ Wudukula nsualu nlangu wuwo wu mvungu va fulu binuinanga bibulu nlangu ayi wudimuna ku dibulu mu buela teka nlangu, wutekila ba kamela babo.

²¹ Mu thangu yoyo mutu wutala muana nketo ayi simini mu diambu diandi, wuba nasui, wutomba mu zaba kani Mfumu nungisini nzietolo andi.

²² Mama maba mu thangu ba kamela bamana nua nlangu, buna kisadi ki Abalahami wubonga pheti yi wola ki ndambu sekeli, wumvuika yawu mu diyilu ayi mu mioko wumvuika minlunga miole mi kumi di sekeli

²³ Buna wunyuvula: «Wukhambi, ngeyo widi muana nani? A bue, tulenda baka fulu mu nzo se diaku muingi tuleka minu ayi batu bami?»

²⁴ Lebeka wuvutula: «Minu ndidi muana Betueli, muana Milika wukabutila Naholi.

²⁵ Wubuela kamba diaka ti nzo eto biti ayi bima bidikila bibulu bidi biwombo, fulu phe kikululekisa kidi.»

²⁶ Buna Kisadi wuyinika zizi ayi wufukama va thadisi Yave,

²⁷ ayi wukamba: «Bika Yave kasakumunu, Nzambi yi mfumu ami Abalahami, bila wumbonisini mbote ayi khuikumunu, wundeti kudi zikhomba zi mfumu ami.»

²⁸ Buna muana ndumba wuyenda nsualu mu kamba ku nzo ngudi andi mambu mamo mabua

²⁹ Lebeka wuba ayi khomba andi yi bakala, zina diandi Labani ayi Labani wudimuna ku dibulu di nlangu mu kuebuani sielo ki Abalahami.

³⁰ Bukamona pheti va diyilu ayi milunga mu mioko mi busi kiandi ayi bukawa mamo matuba busi kiandi Lebeka, wukamba ti buabu bukhambidi bakala dimbueni ku dibulu di nlangu ayi wutelama va ndambu zikamela vandambu dibulu di nlangu.

³¹ Bu katula va dibulu di nlangu, wunkamba: «Yiza, ngeyo wusakumunu kudi Nzambi. Bila mbi tedimini vava? Mbemana kubika fulu mu diambu diaku ayi zikamela ziaku.»

³² Buna Labani wukota mu nzo, wukulula bifunda biba va yilu zikamela ayi wuvana biti kudi zikamela muingi badia. Landila diawu, wunata nlangu muingi kisadi ki Abalahami ayi batu bandi basukula malu.

³³ Buna wubatudila bidia va ntuala awu. Vayi wukamba: «Ndilendi dia ko nate khembi mambu madi yami.» Labani wuvutula: «Kadi diambu, yoluka kuaku.»

³⁴ Yandi wubuela kamba: «Minu ndidi kisadi ki Abalahami.»

³⁵ Yave wusakumuna beni mfumu ami ayi wuyikidi mutu wukimvuama. Wumvana nkangu mameme, zikhombo ayi zingombe ziphuele, palata ayi wola, bisadi bi bakheto ayi bi babakala, zikamela ayi ziphunda.

³⁶ Ayi phe Sala, nketo mfumu ami wumbutila muana wubakala mu bununu buandi, buna muana beni niandi vuidi kimvuama kikio ki se diandi.

³⁷ Mfumu ami wundevisa ndefi mu kambu kuedila muana andi nketo mu basi Kanana mu tsi yindilembo zingila.

³⁸ Wukhamba: «Wundevila ndevi mu kuenda mu kanda di se diami, mu mvila ami, mu kuedila muana ami nketo.»

³⁹ Vayi ndiyuvula mfumu ami: «Bulendakan nketo beni makamana kuandi mu kundandakana.»

⁴⁰ Buna yandi wumvutudila: «Yave wundimvuminanga mu ndiatulu ami makafidisa mbasi andi ayi ngeyo muingi katomisa nzila aku, fueti bakila muana ami wu bakala nketo va khati ka kanda di ayi mu nzo yi se diami.

⁴¹ Mu thangu yoyo, mawunianguka mu ndefi yi wudia vantuala ami bu mawutula ku kanda diami. Ti bakhomba ziami bamengi kuvana muana nketo, buna mawunianguka mu ndefi yiwudia va thadisi ami.»

⁴² Mu thangu thudidi va bulu di nlangu, ndisambidi buabu: "Yave, Nzambi yi mfumu ami Abalahami, ndikubombidila, ti lenda nungisa nzila ami yi ndilembo yendi,

⁴³ Tala thelamene va ndambu dibulu di nlangu. Ndumba yinkuiza mu teka nlangu, mandikamba:"Wumbika ndinua mua ndambu nlangu mu mvungu aku

⁴⁴ ayi mankamvutudila: «Nua ayi mandi teka phe nlangu mu nuika zikamela ziaku, bika muana nketo wowo kaba nketo Yave kakubikila muana Mfumu ami.»

⁴⁵ Tekila ndimanisa sambila mu tsi ntima ayi tala Lebeka totukidi, wizidi ayi mvungu va divangiti diandi. Buna minu ndinkamba: «Ndikubombidila, wuphani nlangu ndinua.»

⁴⁶ Kuludi mvungu andi mu nsualu ayi kembi: «Nua ayi mandinuikina zikamela ziaku.» Buna nduini ayi niandi nuikini zikamela.

⁴⁷ Mu thangu ndiyuvula niandi muana nani, wuvutula: «Ndidi muana Betueli ayi ntekolo Naholi ayi Milika. Buna ndibonga pheti yi wola ki ndambu sekeli ndimvuika yawu mu diyilu ayi mu mioko ndimvuika minlunga miole mi kumi di sekeli.»

⁴⁸ Buna ndiyinika zizi kiami ayi ndifukama va nthadisi Yave, ayi ndisakumuna Yave, Nzambi yi mfumu ami Abalahami, bila niandi wundeti mu nzila yilulama mu bongila muana andi wubakala, muana nketo niowo widi muana wukhomba mfumu ami.

⁴⁹ Ayi wukhambi buabu ti kubimini mu songa mfumu ami mbote ayi nkuikumunu. Vo kabuawu ko, mandienda kunkaka.

⁵⁰ Labani ayi Betueli bavutula ayi bakamba: «Diambu diadi kudi Yave dibedi. Beto tulendi buela dinkaka ko.

⁵¹ Lebeka niandi niawu vantuala aku, wunata kakala nketo muana mfumu aku banga bukembi Yave.»

⁵² Thangu sielo ki Abalahami kawa mabatuba, wuyinika zizi va ntoto va thadisi Yave.

⁵³ Buna sielo ki Abalahami wusokumuna bima bi palata ayi bi wola, mimvuatu, wuvana biawu kudi Lebeka, wuvana phe bima bi kitoko kudi khomba andi yi bakala ayi kudi ngudi andi.

⁵⁴ Landila diodio, badia ayi banua, niandi sielo ki Abalahami ayi batu baba yandi ayi kuna phe baleka bawu babo va kimosi. Bubakotuka mu nsuka, kisielo ki Abalahami wunkamba khomba yibakala yi nguandi Lebeka: «Luphaneno nzila ndivutuka kudi Mfumu ami.»

⁵⁵ Vayi khomba andi yi bakala ayi ngudi andi bavutula: «Bika muana ndumba kasiala kudi beto benzi kumi di bilumbu, buna niandi lenda kuenda kuandi.»

⁵⁶ Vayi kisielo ki Abalahami wukamba: «Kadi kukhadiseno. Bila Yave lungisidi nzila ami. Luphana nsua muingi ndivutuka kudi mfumu ami.»

⁵⁷ Buna bavutula: «Bufueni tutela muana ndumba muingi tunyuvula bue buididi mabanza mandi.»

⁵⁸ Buna batela Lebeka ayi banyuvula: «Tidi kuenda nzila mosi ayi mutu wawu?» Yandi wuvutula: «Ninga.»

⁵⁹ Buna basindika busi kiawu Lebeka ayi ndeziandi ayi kisadi ki Abalami ayi batu bandi.

⁶⁰ Landila dio, basakumuna Lebeka ayi bankamba: «Tala, ngeyo, busi kieto, bika Wuba ngudi yi mafunda ma Makumi ma mafunda. Bika Nkuna aku wuyala mielo mi Zimbanza zi mintatu miandi.»

⁶¹ Landila diodio, Lebeka ayi bisadi biandi bi baketo batelama ayi bakuma mu zi kamela, ayi balandakana kisadi ki Abalahami, buna kisadi kiokio wubonga Lebeka ayi babo bayenda.

⁶² Mu thangu yina, Isaki wuyizila mu nzila yi dibulu di nlangu di Lahayi-loyi Bila niandi wukala mu tsi yi Nengevi.

⁶³ Lumbu kimosi mu masika, Isaki wuyenda ku nsitu mu yindula, bu kavumbula meso, wumona zi kamela zilembo yizi.

⁶⁴ Lebeka phe bu kavumbula meso mandi, wumona Isaki ayi wukuluka va kamela,

⁶⁵ ayi wuyuvula kisadi ki Abalahami: «Nani niowo wulembo zungana mu nsitu ayi wizidi mu kutubuana?» Kisadi wumvutudila: «Niandi mfumu ami.» Buna Lebeka wubonga tambala, wufuka zizi kiandi.

⁶⁶ Kisadi ki Abalami wukamba Isaki mambu mamo makavanga.

⁶⁷ Landila mambu momo, Isaki wukotisa Lebeka mu nzo ngoto yibakalanga Sala, ngudi andi, buna wunzola beni ayi wubombo mu diambu di lufua lu Sala, ngudi andi.