1 Mose 22 - Bible en Kiyombe

Abalahami ayi nkayilu wu Isaki

¹ Landila mambu momo, Nzambi wutota Abalahami. Wutela Abalahami ayi Abalahami wuvutula:«Minu niandu.»

² Yave wuvutula diaka: «Ndikubombidila, bonga muana aku wubakala, muana aku wumosi kaka, Isaki, wuwunzolanga beni, yenda mu tsi yi Moliya ayi wundiokila wo nkayilukuna, va mongo wowo wumandimonisa.»

³ Abalahami wutelama nsuka nabu, wukubika phunda andi, ayi wubonga bisadi biandi biole bi matoko ayi Isaki, muana andi. Wutiaba zikhuni zi yokila nkayilu. Wuyenda va fulu kiokio kinnkangu Nzambi.

⁴ Mu lumbu kintatu, Abalahami wuvumbula meso ayi wumona fulu beni mu thatuki.

⁵ Abalahami wukamba kudi bisielo biandi: «Sialeno vava, beno ayi phunda. Bosi minu ayi ditoko matuenda kuna mu sambila Nzambi, buna matuvutuka va luidi.»

⁶ Abalahami wubonga zikhuni zi yokila nkayilu ayi wutula ziawu va ntu Isaki, wubonga ditadi dilemisina mbazu ayi mbele ayi bawu babole bayenda va kimosi.

⁷ Isaki wukamba se diandi Abalahami: «Tata!» Abalahami wuvutula: «Minu niandu, muana ami.» Isaki wunyuvula: «Tala mbazu ayi zikhuni, kue kuidi muana dimeme wunyoko nkayilu?»

⁸ Abalahami wuvutula: «Muana ami, Nzambi makamonisa muana dimeme wu nkayilu.» Buna bawu babole batatamana diata va kimosi.

⁹ Bu batula va fulu kiokio kinkamba Nzambi, Abalahami wutunga diziku di yokila nkayilu ayi wukubika zikhuni. Wukanga muana andi Isaki minsinga ayi wunlekisa va mbata diziku di nkayilu, va mbata zikhuni.

¹⁰ Buna Abalahami wunonuna koko muingi kabonga mbele ayi kavonda muana andi wubakala.

¹¹ Vayi mbasi yi Yave yintela tona ku zulu ayi wuboka: «Abalahami!» «Abalahami!» Yandi wuvutula:«Minu niandu.»

¹² Mbasi wukamba diaka: «Kadi nonuna koko va ditoko. Kadi kumvanga buma, bila buabu mvisidi ti wumvuminanga Nzambi, nge kembo kundimina muana aku widi niandi veka.»

¹³ Bu kavumbula meso, Abalahami wumona dimeme di mbakala, ziphoka ziandi zikangama mu biti. Wuyenda mu ku dibonga muingi kayoka diawu nkayilu va fulu ki muana andi.

¹⁴ Buna Abalahami wubieka fulu kiokio:Yave-Yile, bu dibangudulu Yave wunkubikanga. Diawu nate lumbu kiaki, batu bantubanga nate buabu: «Va mbata mongo Yave makakubika.»

¹⁵ Mbasi yi mfumu wutela Abalahami mu khumbu yinzole

¹⁶ ayi wukamba: «Ndikidididi ndevi, bukembi Yave. Buvengi diodio, bu mengi ku ndimina muana aku mosi kaka,

¹⁷ Ndiela kusakumuna ayi ndiela niekisa nkuna aku banga zimbuetete zi zulu ayi nienge va ndambu mbu. Muelo wu ntatu miaku mawuvuiwu kudi Nkuna aku.

¹⁸ Mu nzila andi, makanda mamo va ntoto mamasakumunu, bila tumimini mbembo ami.»

¹⁹ Abalahami wuvutuka va fulu kiba bisadi biole, buna batelama ayi bayenda ku Beli-Seba. Abalahami wukala ku Beli-Seba.

²⁰ Landila mambu momo, Abalahami wuwa ti Milika phe wubutila khomba andi Naholi bana babakala.

²¹ Muana wuthete zina diandi Utsi, mazina ma khomba ziandi: Buzi, Kemueli, se di Alami,

²² Kesedi, Hazo, Pildasi, Yidlafi ayi Betueli.

²³ Betueli wubuta Lebeka. Baba nana di bana Milika kabutila Naholi, khomba Abalami.

²⁴ Naholi phe wubuta bana babakala ayi makangu mandi Leuma: Teba, Ngahami, Tahasi ayi Maka.