1 Mose 21 - Bible en Kiyombe

Isaki ayi Isamayeli

¹ Yave wunuanina Sala, mu kumvangila makankamba.

² Wubaka buemba, wubutila Abalahami muana wubakala, mu bununu buandi mu thangu yinkamba Nzambi.

³ Abalahami wuvana zina Isaki kudi muana wumbutila Sala.

⁴ Buna Abalahami wuzenga sutu di muana andi bu kadukisa nana bilumbu, banga buntumina Nzambi.

⁵ Abalahami wuba khama mvu thangu muana andi Isaki kabutuka.

⁶ Sala wuyamikina: «Nzambi wutsevisidi mu kiese. Woso mutu wumwa disolo di Isaki, kafueti seva mu diambu diami.»

⁷ Wutuba diaka: «Mu kedika nani lenda nkangu kudi Abalahami ti Sala lenda yemika bana? Buabu mbe buta muana wu bakala mu bununu buandi.»

Abalahami kukidi Angali ayi Isamayeli

⁸ Buna muana wuyonzuka. Bu kalembo yema mabeni, Abalahami wusadisa ndikulu yinene mu lumbu beni.

⁹ Lumbu kimosi Isamayeli, muana wowo Abalahami kabuta ayi Angali, muisi Ngipiti, waba sakinina Isaki, muana wu Sala.

¹⁰ Bukamona bobo Sala wukamba Abalahami: «Kuka kisadi kiokio kinketo ayi muana andi, bila muana wukisadi kalendi vingila kimvuama kiaku ko ayi Isaki.»

¹¹ Vayi diambu diadi divanga beni phasi mu ntima Abalahami, bila wuba muana andi.

¹² Buna Nzambi wukamba Abalahami: «Kadi fuema mu diambu di muana bakala ayi kisadi kiaku ki nketo. Wa mamo malembo kambi Sala, bila mu Isaki muawu muela totukila nkuna wela tedolo mu zina diaku.

¹³ Vayi mu muana kisadi kiaku ki nketo mandi vanga phe tsi, kadi niandi phe widi nkuna aku.»

¹⁴ Abalahmi wukotuka mu nsuka nabu, wubonga dipha ayi mvungu nlangu wuvana biawu kudi Angali. Wutula muana va mavembo ma Angali ayi wunkuka. Buna wuyenda kue zungananga mu tsi yikhatu yi Beli-Seba.

¹⁵ Buna nlangu wu mvungu wumana, ayi wuyekula muana ku tsi mua nti fiba na meza.

¹⁶ Buna wuyenda kala mua thama va ndambu. Wutuba mu tsi ntima: «Mbengi mona vamfuila muana ami.» Wubokana dila.

¹⁷ Buna Nzambi wuwa mbembo muana bakala, ayi tona ku zulu mbasi yi Nzambi yitela Angali. Yinyuvula: «Mbi bidi yaku, Angali? Kadi mona wonga bila Nzambi wilu mbembo muana vana va kadi.

¹⁸ Telama, tedimisa muana ayi wunsimbi mu koko bila mu niandi mandi vanga kanda dinnene.»

¹⁹ Buna Nzambi wunzibula meso, ayi wumona tho yi nlangu. Wuyenda wesa mvungu ayi wunuikisa muana.

²⁰ Nzambi wuba ayi muana bakala, wuyonzuka ayi wukala mu tsi yikhatu yi Palani, wukala mbendi mbasa.

²¹ Wukala mu tsiyikhatu yi Palani, ayi ngudi andi wunkuedisa nketo wu muisi Ngipiti.

Abalahmi vengi nguizani ayi Abimeleki

²² Mu thangu yina, Abimeleki wuyiza ayi Pikoli, mfumu ma sodi mandi mu nkangu Abalahami:«Nzambi widi yaku, mu mamo ma wulembo vangi.

²³ Buabu leva ndefi va fulu kiaki ti wulendi kuphangila diambu dimbi ko, kudi minu, kudi bana bami, ayi kudi nkuna ami, banga phila ndivangidi, ngeyo phe wuphangila bo buawu ayi tsi yi wulembo kadi mu kinzenza ayi kikundi kikio.»

²⁴ Abalahami wuvutula: «Ndidi ndefi.»

²⁵ Buna Abalahami wunionga kudi Abimeleki mu diambu di dibulu di nlangu dibaziona kudi bisadi bi Abimeleki.

²⁶ Buna Abimeleki wunkamba: «Ndi kadi zaba nani wuvengi diambu diodio. Ngeyo phe wukadi kukhamba, ayi buabu kuandi nguilu diawu.»

²⁷ Abalahami wubonga bibulu bifioti ayi binene, wuvana biawu kudi Abimeleki, buna bawu babole bavanga nguizani.

²⁸ Abalahami wutula tsambudi di bana ba mameme va ndambu.

²⁹ Buna Abimeleki wukamba Abalahami: «Bana ba mameme mama mavengumuni mbi mansala vava?»

³⁰ Yandi wuvutula: «Bonga mu mioko miami tsambudi dibana ba mameme. Mamaba kimbangi kudi minu mu songa ti minu ndikaba dibulu dinlangu beni.»

³¹ Diawu batedila fulu beni Beli-Seba kadi va fulu beni vawu badila ndefi bawu babole.

³² Bavanga nguizani ku Beli-seba. Abimeleki wutelama va kimosi ayi Pikoli, mfumu basoda bandi, wuvutuka ku tsi ba Filisiteya

³³ Landila diodio, wukuna nti wu Tamaliska ku Beli-Seba, kuna kasambila Yave, Nzambi yi thangu yika yimani mu zina diandi.

³⁴ Buna Abalahami wuzungana lumbu biwombo mu tsi yi ba Filisiteya.