1 Mose 20 - Bible en Kiyombe

Abalahami ayi Abimeleki

¹ Mu thangu yoyo, Abalahami wubotuka va kaba, wuyenda ku tsi yikhatu yi Nengevi, ayi wukala va khati Kadesi ayi Suli ayi wuyenda kadi banga nzenza ku Ngelali.

² Abalahami wukamba mu diambu di nketo andi Sala: «Niandi busi kiami.» Buna Abimeleki, ntinu ku Ngelali, wufidisa mutu mu bonga Sala.

³ Bilumbu bivioka, Nzambi wumonika Abimeki va builu mu ndozi ayi wunkamba: «Keba kuaku wulembo monikina banga mutu wufua mu diambu di nketo wowo wuwubongidi, bila wukuela kadi.»

⁴ Vayi Abimeleki kasi bundisa nitu andi ayi Sala ko. Buna Abimeleki wukamba: «Mfumu, ngeyo lenda kuaku fukisa mbanza mu kambu bila?

⁵ Keti niandi veka Abalahami wukhembi ti Sala busi kiandi, Sala phe wukhembi ti Abalahami khomba ami yi bakala. Phengi diawu mu ntima wusonga, ayi mioko mikambulu bila.»

⁶ Buna Nzambi wumvutudila mu ndozi: «Minu nzebi ti vengi diambu diodio mu ntima wusonga. Ndivukisidi muingi wubika vola masumu va thadisi ami, diawu ndikadi kuyambula wubundisa yandi nitu.

⁷ Vayi buabu vutula nketo Abalahami kudi bakala diandi bila niandi mbikudi kadi, makadila mvutu ayi mawuzinga. Ti wukadi kumvutula, zaba ti mawufua ngeyo ayi batu baku bavuidi.»

⁸ Buna Abimeleki wutelama mu nsuka nabu, wutumisa bisadi biandi bibio, wubakamba mamo ma vioka mu nsamu wowo, batu bobo bubawa mawu, bamona wonga.

⁹ Buna Abimeleki wutumisa Abalahami, ayi wunkamba: Diambu mbi diodio wutuvangidi? Disumu mbi ndivangidi muingi wutuyanika minu ayi kitinu kiami mu disumu dinnene diodio? Diwuphangidi, diambu dikabalendi ko vangila mutu.

¹⁰ Abimeleki wubuela kamba Abalahami: «Mabanza mbi mabedi yaku muvanga diambu diodio?»

¹¹ Abalahami wuvutula: «Ndituba mu tsi ntima ti kuisi ko kadi mua vumi ki Nzambi va fulu kiaki, mabaphonda mu diambu di nketo ami.

¹² Bosi kedika, Sala, busi kiami, muana nketo wu se diami, vayi bika mu ngudi mosi, ayi wuyika nketo ami.

¹³ Mu thangu Nzambi kathotula mu nzo se diami, ndikamba Sala: “Mu muamo mu matuekangalanga, ndikubombidila mu tuba ti ndidi khomba aku yi bakala.”»

¹⁴ Buna Abimeleki wubonga bulu bifioti ayi binene, bisadi bi babakala ayi bi baketo, wuvana biawu kudi Abalahami, wumvutudila nketo andi Sala.

¹⁵ Ayi wunkamba: «Tala tsi ami yimvimba yayi yidi va ntuala aku. Kala voso vamueni va mbote mu kala.»

¹⁶ Wunkamba Sala: «Tala, pheni kudi khomba aku funda dipalata, dimbu kinsonga mu meso ma bandiata yaku ayi kudi babo ti wusi vanguluaku bifu bimbimbi ko.»

¹⁷ Abalahami wudila Abimeleki mvutu kudi Nzambi ayi Nzambi wubelusa Abimeleki, nketo andi ayi bisadi biandi bibaketo babuta bana.

¹⁸ Mfumu Nzambi wutula baketo babo ba nzo yi Abimeleki bisita mu diambu di Sala, nketo Abalahami.