1 Mose 2 - Bible en Kiyombe

¹ Bobo bumana vangulu zulu ayi ntoto ayi bibio bidi mu biawu.

² Mu lumbu kitsambudi, Nzambi wumanisa kisalu kikio kikasala. Mu lumbu kitsambudi wuvunda mu kisalu kiandi kikio kikasala.

³ Nzambi wusakumuna lumbu kitsambudi ayi wubieka kiawu nlongo, bila mu lumbu beni wuvunda mu salu kikio ki Mvangi kikasala.

⁴ Kiokio kikhulu ki nsamu wu phangulu zulu ayi ntoto. Mu thangu Yave Nzambi kavanga ntoto ayi zulu,

Ndima Edeni

⁵ va ntoto vasi kibela ko nti ayi biti bisi kukimenina ko mu tsi, bila Yave Nzambi kasi kukinokisina ko mvula va ntoto ayi vasi ba ko mutu wulenda kuna bima mu ntoto.

⁶ Vayi mbungi wutombuka mu ntoto wubondikila ntoto wuwo.

⁷ Yave Nzambi wubumba mutu mu fundu fundu di ntoto. Wuvemuna muphepe wumoyo mu mayilu mandi, ayi mutu wuyika muela widi wumoyo.

⁸ Yave Nzambi wukuna ndima mu nsitu Edeni ku ndambu yintotukilanga thangu, muna katula mutu wu kavanga.

⁹ Yave Nzambi wumenisa ntindu mimio mi minti, mikitoko mu tala ayi mimbote mu dia. Wutula va khati tsika nsitu nti wumoyo ayi nti wumvananga diela mu zabila mambote ayi mambi.

¹⁰ Nzadi yitotuka mu nsitu Edeni ayi yibondikila ndima. Tona vana, yawu yivasuka mu ndambu ziya.

¹¹ Yithete yitedolo Pisoni: yawu yizungidi tsi yimvimba yi Havila yidi nolo,

¹² nolo yi tsi yoyo yidi yithalu, ayi nti bedeliumi widi maka matsudi lueki ayi tadi dithalu di onisi.

¹³ Nzadi yinzole yitedolo Ngihoni, yawu yinzunganga tsi yimvimba yi Kusi.

¹⁴ Nzadi yintatu yitedolo Tingele, yawu yinkumbanga ku ndambu yintotukilanga thangu yi Asilia. Nzadi yinya yitedolo Eufalata.

¹⁵ Yave Nzambi wubonga mutu, wuntula mu tsola yidi mu nsitu Edeni muingi kasalanga ayi kakebanga yawu.

¹⁶ Yave Nzambi wuvana thumunu kudi bakala: «Dia wuna dia makundi ma minti mimio midi mu nsitu,

¹⁷ vayi kulendi ko dia makundi manti mamvananga diela mu zabila mambote ayi mambi, bila lumbu wela dia mawu, fua wela fua kaka.»

¹⁸ Yave Nzambi wukamba: «Disi ko dimbote bakala kaba niandi veka, ndieka kumvangila nsadisi wumfuanane.»

¹⁹ Mu ntoto Yave Nzambi wutatamana vanga mu fundu fundu bulu bibio bidi moyo binsitu ayi zinuni zizio zintilumukanga ku yilu ayi wubinata kudi mutu muingi kamona bue kakubivanina mazina. Kioso bulu kimbonga zina dikumvana mutu, diawu kafueti tedolongo.

²⁰ Bakala wuvana mazina kudi bulu bibio bidi moyo biyodama ayi binsitu ayi zinuni. Vayi kudi niandi veka kuisi ba ko nsadisi wumfuanane.

²¹ Buna Yave Nzambi wubuisa bakala mu tulu tungolo beni, bu kaba wuleka, wubonga mvesi wu lubanzi ayi wuvingisa nsuni vaba mvesi.

²² Mu mvesi wu lubanzi wu kabonga mu bakala, Yave Nzambi wuvanga nketo ayi wunata kudi bakala.

²³ Buna Bakala bukamona nketo, wuyamikina: Tala buabu mvesi Wu mimvesi miami, Ayi nsuni wu nsuni ami. Makatedolo nketo, Bila bongolo mu bakala.

²⁴ Diawu bakala makabika se diandi ayi ngudi andi muingi kabundana ayi nketo andi ayi bawu bole baba nsuni wumosi.

²⁵ Vayi bakala ayi nketo baba pheni bawu babole ayi basi dimuena tsoni ko.