1 Mose 19 - Bible en Kiyombe

Mbungulu yi Sodoma ayi Ngomola

¹ Va masika, zimbasi zole zitula ku Sodoma. Loti wuba wukala va muelo mbanza. Bu kabamona, wutelama mu kubabuana, wufukama va ntuala awu, wuyinika zizi kiandi va ntoto.

² Yandi wubakamba: «Ndikulubombidila, Mfumu ziami, ndikulubombidila, viokilanu mu nzo Sielo kieno ayi lekanu mo, bika balusukula malu meno bosi mbazi mu nsuka lutelama ayi landakana nzileno.» Vayi bawu bavutula: «Nana! Beto tutidi leka va nganda mbanza.»

³ Vayi niandi wubatatimisa nate bakota mu nzo andi ayi wubalambisila ndambisa ayi mapha makambu funusu ayi badia.

⁴ Mu thangu banzenza balekidi ko, babakala ba mbanza, babakala ba Sodoma bayiza zungidila nzo, tona matoko nate binunu, kadi mutu kasi kambu ko.

⁵ Batendukila Loti: «Loti, batu bobo bizidi ku nzo aku va masika kue badi? Wubatotula muingi tuleka nawu.»

⁶ Loti wutotuka ku nganda, wutelama va muelo nzo ayi wuwuzibika.

⁷ Ayi wubakamba: «Nana, ndikulubombidila, zikhomba ziami. Kadi vangeno mbi yi phila yoyo!

⁸ Tala, ndikulubombidila, mbeki bana bole ba baketo bakambu zaba nitu babakala. Ndikulubombidila, thidi kubatotula ku nganda muingi lubavanga moso malutidi. Vayi kadi vanganu diambu kudi batu baba, bila ku nzo ami bizidi, ayi badi kutsi lutanunu luami.»

⁹ Bamvutudila: «Botuka vava! Nge widi nzenza, tidi ba nludiki zimbedoso? Keba kuaku, matuvangila mbimbi yilutidi viokila yitutidi vangila batu baba.» Banunguna Loti mu ngolo ayi bafikama va muelo nzo muingi batolumuna wo.

¹⁰ Vayi mbasi zizole bavuemba Loti, bankotisa mu nzo ayi bazibika muelo.

¹¹ Bavonda meso ma babo baba va muelo, tona matoko nate banuna, balembakana mu buela mona muelo nzo.

¹² Buna zimbasi bakamba Loti: «Beki batu bankaka ba kanda diaku vava? Nzitu aku voti bana baku ba babakala voti ba baketo, voti zikhomba ziaku zinkaka, wubatotula mu mbanza.

¹³ Bila tutidi kuyibunga. Yave wilu tsangu zimbi zi mbanza yayi ayi wutufidisidi mu ku yibunga.»

¹⁴ Loti wutotuka mu kuesolula ayi babakala batia kuela bana bandi ba baketo, wubakamba: «Telameno ayi totukeno mu mbanza yayi mu nsualu, bila Yave tidi bunga yawu.» Vayi babanza ti lueya.

¹⁵ Buisi bu buekankia, zimbasi zitatimisa Loti ayi zikamba:«Telama nsualu, bonga nketo aku ayi bana baku bole ba baketo badi vava, muingi wubika fua mu mambi ma mbanza yayi.»

¹⁶ Loti bu kazingila mutotuka, batu bantuta mu koko, niandi, nketo andi ayi bana bandi bole ba baketo, bantotula mu mbanza.

¹⁷ Bu babatotula, wumosi mu zimbasi wukamba Loti: «Tina muingi wuvukisa moyo aku. Kadi tala ku mbusa ayi kadi zingila mu mindimba. Tina ku mongo ti mengi bungana.»

¹⁸ Buna Loti wubavutudila: «Nana, Mfumu, bulendi bela bobo ko.

¹⁹ Tala, ndikulubombidila, sielo kiaku monokono nlemvo va meso maku ayi wumbonisini zola kuaku mu kukheba wumoyo. Vayi minu ndilendi tina ku mongo ko mukambu builu vunga ayi fua.

²⁰ Ndikulubombidila, tala mua mbanza fiofio fi fikimini mu tininina muna fikambu kadi tsundu. Ndikulubombidila, ndilenda kuenda ayi tinina muna? Fisiko mua mbanza? Buna muela ami mawutatamana kala moyo.»

²¹ Mbasi yivutula: «Tala, ndilembo bue kusongi nlemvo wawu ayi ndilendi ko bunga mbanza yoyo yiwulembo kukhambi.

²² Yenda, tinina kuna mu nsualu, bila ndilendi vanga diambu ko nate tudidi muna. Diawu, bantedilanga mbanza beni Soali.»

²³ Thangu yitotuka va ntoto Loti bu kakota ku Soali.

²⁴ Yave wubuisa mvula yi mbazu yiba ku yilu ayi kudi Nzambi va zimbanza zi Sodoma ayi Ngomola.

²⁵ Yave wubunga zimbanza beni, zunga kiakio, batu babo baba muna ayi bikunusu bibio biba muna.

²⁶ Nketo Loti wutala ku mbusa, buna wukituka kitumba ki tsalu.

²⁷ Mu nsuka, Abalami wuyenda ayi wutelama va fulu kikaba mokasananga ayi Nzambi.

²⁸ Buna wutala ku ndambu yi Sodoma ayi Ngomola ayi kinzungidila ki Yodani, mueni muisi wulembo totuka mu tsi beni, banga muisi wu foloni.

²⁹ Mu thangu Nzambi kaba bunga zimbanza zizungidila Yodani, wubambukila Abalahami moyo ayi wutapula Loti mu vunga bu kabunga zimbanza ziabakalanga Loti.

Loti ayi bana bandi ba baketo

³⁰ Mambu momo bu mavioka, Loti wutotuka ku Soali ayi wukala ku miongo ayi bana bandi bole ba baketo bayenda yandi. Wumona tsisi mu kala ku Soali ayi wukala mu phaka matadi, niandi ayi bana bandi bole babaketo.

³¹ Lumbu kimosi, muana wunkulutu wunketo wukamba kudi nleki andi: «Se dieto menuna, ayi mu kinzungidila kieto, kuisi ko kadi bakala dilenda kutukuela muingi tubuta bana banga buididi kikhulu ki tsi mvimba.

³² Yiza tunuika se dieto vinu ayi tubundisa zinitu ayi niandi, mu diambu tutotula nkuna mu niandi.»

³³ Muna builu beni, banuika se diawu vinu. Muana wuthete wunketo wubundisa nitu ayi se diandi, vayi se diandi, kasi zaba ko thangu mbi kakotila ayi thangu mbi katotukila.

³⁴ Lumbu kilandila, muana wuthete wukamba nleki andi: «Tala, kibedi zono ndibundisidi nitu ayi se diami. Tubuela kunuika vinu mu builu buabu, buna ngeyo phe mawenda bundisa nitu ayi niandi. Buna beto babole matutotula nkuna mu niandi.»

³⁵ Mu builu beni, banuika diaka se diau malavu. Buna nleki phe wubundisa nitu ayi se diandi. Vayi se diandi, kasi zaba ko thangu mbi kakotila ayi thangu mbi katotukila.

³⁶ Buna bana babole ba baketo ba Loti babaka mabuemba kudi se diawu.

³⁷ Muana wuthete wunketo wubuta muana bakala, wumvana zina Moabi. Niandi khaya basi Moabi ba lumbu kiaki.

³⁸ Muana wunzole wunketo phe wubuta muana wu bakala, wumvana zina Bene-Ammini. Niandi khaya yi ba Amoni ba lumbu kiaki.