1 Mose 18 - Bible en Kiyombe

Tsilulu yi Nzambi kudi Sala

¹ Landila dio, Yave wukimonikisa kudi Abalahami va khati minti minene mi telebinta mi Mamele mu thangu kaba wukala va muelo nzo andi muini bu wuba wungolo.

² Bu kavumbula meso, wumona batu batatu batelamene va ndambu andi. Bu kabamona, wunakuna nsualu mu kubabuana tona va muelo nzo ayi wufukama va ntoto.

³ Wukamba kudi wumosi mu bawu: «Mfumu, ti mbonokono nlemvo mu meso maku, kadi viokila sielo kiaku mu nzengo.

⁴ Ndikubombidila, bika balunatina mua ndambu nlangu muingi balusukula malu ayi vundeno va tsi nti wowo.

⁵ Bika ndielubongila tini ki dipha muingi lubaka ngolo tekila lutatamana nzila eno. Kiokio bila luviokidi vadi sielo kieno.» Bavutula ti «Bufueni, Vanga banga bukembi.»

⁶ Buna Abalahami wuyenda nsualu ku nzo ngoto kuba Sala, wunkamba : «Sa nsualu! Bonga ndambu zitatu zi fufu, soba ziawu ayi lamba mapha.»

⁷ Buna Abalami wuyenda nsualu mu phaka bibulu, wusola muana ngombe wu vuluka ayi wu mafuta, wuvana wawu kudi wumosi mu bisadi biandi mu vonda wawu ayi lamba wawu mu nsualu.

⁸ Buna Abalahami wubuela bonga miliki, matheka ayi muana ngombe wubalamba, wutula biawu va ntuala awu. Yandi wutelama va ndambu va baba ku tsi nti mu thangu bawu babadia.

⁹ Buna banyuvula: «Nketo aku Sala, kue kadi?» Yandi wuvutula: «Mu khati nzo ngoto kadi.»

¹⁰ Wumosi mu bawu wukamba: «Kedika fueti buela vutuka kudi ngeyo mu mvu wunkuiza mu thangu banga yayi, buna nketo aku Sala ma kabaka muana.» Sala weba wa bu kaba va muelo nzo ngoto, ku mbusa Abalahami.

¹¹ Abalahami ayi Sala baba binunu ayi bame vioka mimvu miwombo, Sala wulembo mona menga ma kadika ngonda.

¹² Diawu Sala wuseva mu tsi ntima bu kayindula:«Bu mbenuna ndilenda bue mona khini yi ba ayi bakala? Ayi mfumu ami menuna; thangu yimona khini yiviokidi.»

¹³ Yave wuyuvula Abalami: «Bila mbi Sala kasevidi ayi katubidi: “kedika ndilenda buta diaka muana minu mbenunina buabu?”

¹⁴ Diambu dingitukulu didi dilenda lembakana Yave? Mu thangu ndiela buekuiza kudi ngeyo mu mvu wunkuiza, Sala wela baka muana.»

¹⁵ Sala wumona tsisi yiwombo diawu katunukina. Wunkamba: «Ndikadi seva». Vayi Yave wuvutula:«Nana, seva sevidi».

Abalahami wusambila Yave kalemvukila Sodoma

¹⁶ Buna babakala batelama mu kuenda ayi batadisa ku ndambu Sodoma, Abalahami wuyenda yawu mu kubavekisa.

¹⁷ Buna Yave wukamba:«Ndilenda suekila Abalahami diambu dindieka vanga?»

¹⁸ Abalahami, mukedika, makaba kanda dinnene ayi dingolo, ayi tala makanda mamo madi va ntoto mamasakumunu mu niandi.

¹⁹ Kadi ndinsola muingi katuma bana bandi ayi kanda diandi dinkuiza ku mbusa andi balanda nzila Yave mu vanga masonga ayi malunungu. Buna Yave wuna lungisa tsilulu zika sila Abalahami.

²⁰ Buna Yave wukamba Abalahami: «Zimfundulu zi basi Sodoma ayi Ngomola zitudidi va ntuala ami ayi masumu mawu zitu madi.»

²¹ Diawu ndilembo kulumukina muingi nditala keni zimfundulu ziawu zitutudidi mu makutu mami zidi zikedika voti ziluvunu, mandi zaba.

²² Landila dio, babakala bole mu bawu babotuka vana ayi bayenda ku Sodoma, vayi Abalahami wutelama va zizi ki Yave.

²³ Wumfikama ayi wunkamba: «Mfumu, mu kedika ngeyo lenda fukisa mutu wu lunungu ayi mutu vengi dimbimbi?

²⁴ Bulendakana ti makumi matanu ma batu balunungu badi mu Sodoma. Bue, ngeyo mawufukisa kaka mbanza yoyo? Kulendi ko lemvuka mu diambu di makumi matanu ma batu basonga badi momo?

²⁵ Diambu dimbimbi: ngeyo kulendi vanga diphila yoyo ko. Kulendi vonda mutu wusonga ko va kimosi ayi vengi dimbimbi muingi mutu wusonga kabaka tsembolo yiphila mosi ayi vengi dimbimbi. Dilendi ba ko ti zuzi di ntoto wumvimba kakambu vumina busonga.»

²⁶ Yave wuvutula: «Ti mbueni mu sodoma makumi matanu ma babakala basonga mandi lemvukila mbanza yiyo mu diambu diau.»

²⁷ Abalahami wukamba diaka: «Tala, ndikubombidila musolula yaku, Mfumu ami, minu ndidi kuami mua fundu fundu ayi dibombi

²⁸ Nanga mu makumi matanu ma batu mulenda kambu batu batanu, mu diambu di batu batanu tidi kuaku bunga mbanza yiyo? Niandi wuvutula: ti mbueni makumi maya ayi batu batanu basonga, buna ndilendi bunga ko.»

²⁹ Abalahami wubaka diaka phova ayi wunkamba: «Bulendakana ti mulenda monikina makumi maya.» «Ndilendi vanga diambu ko mu diambu di makumi maya madi momo.»

³⁰ Buna Abalahami wukamba: «Kadi fuema bu ndieka buela kuyuvula. Bulendakana mulenda monika makumi matatu.» Yandi wuvutula:«Ti mbueni makumi matatu, ndilendi vanga diambu ko.»

³¹ Yandi wuvutula: «Mbeki lukanu mu kamba kudi Mfumu ami. Ti muidi makumi mole kaka.» Wunkamba: «Kilendi fukisa mbanza ko mu diambu di makumi mole ma batu basonga badi mo.»

³² Mu manisa, Abalahami wukamba Yave: «Ndikubombidila, Mfumu. Kadi fuema. Khumbu yitsuka ndieka kuyuvula. Mamumonika kaka nanga kumi di batu.» «Ndilendi bunga ko mu diambu di kumi didi momo.»

³³ Bu kamana solula ayi Abalahami, Yave wuyenda ayi Abalahami wuvutuka ku fulu kiandi.