1 Mose 15 - Bible en Kiyombe

Nzambi vengi nguizani ayi Abalami

¹ Landila mambu momo, phova Yave yiyiza kudi Abalami mu mona meso, yinkamba: «Kadi mona tsisi, Abalami. Minu ndidi nkaku aku ayi nsendo aku mawuba wunene.»

² Vayi Abalami wuvutula: «Mfumu ami Yave, kima mbi wukuphana? Bila ndilembo zingi mu kambu baka muana. Ayi mvingidi wu kimvuama kiami, Elezieli, muisi Damasko, wumosi mu bavika bami.»

³ Abalami wubuela kamba: «Tala, wukadi kuphana nkuna ayi muana wubutukila mu nzo ami yandi makaba mvingidi yi mvuilu ami.»

⁴ Phova Yave yiyiza kudi niandi: «Nana, mutu wowo kalendi ba mvingidi aku ko vayi wumosi wumbutuka mu ngeyo.»

⁵ Landila dio, wuntotula ku nganda ayi wunkamba: «Tala ku zulu ayi tanga zimbuetete, kani wulenda nunga tangikisa ziawu.» Wubuela diaka: «Bobo buela bela nkuna aku.»

⁶ Abalami wulekila Yave minu. Diawu Yave kantangila mutu wu lunungu.

⁷ Wukamba diaka: «Minu Yave nditotula mu tsi Uli mu Kaladeya muingi ndivana tsi yayi muba mvingidi yiyawu.»

⁸ Yandi wuyuvula: «Mfumu Yave, bue mandizabila ti mandi ba mvingidi yiyawu?»

⁹ Yave wunkamba: «Wundatina muana ngombe wu kheto widi mvu mintatu, khombo yikheto yidi mvu minthatu, meme dimbakala didi mvu mintatu, duka kimosi ayi muana wumosi wu dibembe.»

¹⁰ Yandi wubonga bulu bibio, wubasa biawu mu ndambu zole ayi wutula ndambu va ntuala ndambu yinkaka, vayi kasi basa ko zinuni.

¹¹ Zinuni zi ndianga minsuni zikulumuka va mbata bibulu bifua ayi zi nuni zifua, vayi Abalami wuba ku zikukanga.

¹² Mu thangu mosi, buisi bubulembo yidi, tulu tungolo tubua va Abalami ayi tombe kingolo beni kimbuila.

¹³ Buna Yave wukamba Abalami : «Zaba kuaku mbote ti nkuna aku bela ba banzenza mu tsi yibakondolo vua. Bela ba bavika ayi bela kubatovula mu khama ziya zi mimvu.

¹⁴ Vayi tsi yibela sadila, minu, ndiela yifundisa ayi landila dio, nkuna aku wela totuka ayi kimvuama kiwombo.

¹⁵ Vayi ngeyo, wela kuenda mu yenge ku tsi bakulu baku ayi wela ziku landila ndununu yimbote.

¹⁶ Vayi mu mbandu yinya, nkuna aku wela vutuka vava bila mambi ma ba Amoli mayedidi ko nate buabu.»

¹⁷ Buisi buyila, tombe kingolo beni kiyiza bua, buna kumonika ziku di mbazu difuita muisi ayi nlaki mi mbazu milema miviokila va kati ka ndambu zi bibulu bika basa.

¹⁸ Mu lumbu kina Yave wuvanga nguizani ayi Abalami. Wunkamba : «Mu kedika, kudi nkuna aku ndiela vana tsi yayi tona ku nzadi yi Ngipiti nate ku nzadi yi Efalata, nzadi yinene.

¹⁹ Yawu tsi yi ba Keni, ba Kenisi, ba Kadamoni,

²⁰ ba Heti, ba Pelesi, ba Lefayimi,

²¹ ba Amoli, ba Kanani, ba Ngilingasi ayi ba Yebusi.»