1 Mose 13 - Bible en Kiyombe

¹ Buna Abalami wukuma tona ku Ngipiti, wuyenda ku tsi yikhatu yi Nengevi, niandi, nketo andi ayi bibio bikavua. Loti phe wuba yandi.

Abalami wuvambana ayi Loti

² Abalami wuba na kimvuama kiphuele ki bibulu, ki phalata ayi ki wola.

³ Wuyenda fulu ka fulu tona ku Nengevi nate ku Beteli, kuna ku kateka ba, va khati ka Beteli ayi Ayi,

⁴ va fulu ki kateka tunga ziku, vana Abalami kasambila Yave mu zina diandi.

⁵ Loti, wuba kangalanga ayi Abalami, wuba phe na kimvuama ki bibulu, mameme, zingombi ayi zinzo zingoto.

⁶ Tsi yiba yifioti muingi bazinga va kimosi bila kimvuama kiphuele kiba yawu.

⁷ Nzonza wubua va khati mimvungi mi bibulu mi Abalami ayi mimvungi mi bibulu bi Loti. Ba Kanani ayi ba Pelesi bavua tsi, baba muna.

⁸ Buna Abalami wukamba Loti: «Ndikubombidila, tu bika minzonza va khati ka ngeyo ayi minu voti va khati ka mimvungi miami ayi mimvungi miaku, bila tuidi bakhomba.

⁹ Tsi yoso yisi ko va ntuala aku? Tuvambana: Ti wele ku lumoso, minu ndiele ku lubakala, ti wele ku lubakala, minu ndiele ku lumoso.»

¹⁰ Buna Loti wuvumbula meso ayi wumona ti ndimba wuwo wu Yodani wuba na nlangu nate ku Soali, mu thangu Yave kakibungidi ko Sodoma ayi Ngomola, wawu wuba banga lumbu lu Yave ayi banga bubela tsi Ngipiti.

¹¹ Landila diodio, Loti wukisodila ndambu yiyo yi Yodani ayi wuyenda ku ndambu yintotukilanga thangu. Bayiza vambana bawu babole.

¹² Abalami wukala mu tsi Kanana. Loti wukala mu zimbanza ziba mu ndimba Yodani ayi wutunga nzo ziandi zingoto lukufi ayi mbanza Sodoma.

¹³ Vayi babakala ba Sodoma baba na mavanga mambi, bavola masumu mangolo kudi Yave.

¹⁴ Yave wukamba Abalami bukamana vambana ayi Loti: «Vumbula meso maku va widi ayi tala ku mongo tsi, ku wanda tsi, ku ntotukilanga thangu ayi ku nlekilanga thangu.

¹⁵ Bila tsi yiyo yi wulembo moni, ndiela kuvana yawu banga mvuilu aku ayi kudi nkuna aku mu thangu zizio

¹⁶ Mandiniekisa nkuna aku banga kuandi fundu fundu di ntoto, ti batu balenda tanga fundu fundu di ntoto, buna balenda tanga phe nkuna aku.

¹⁷ Telama, zieta muamo bila mandikuvana tsi yayo.»

¹⁸ Abalami wutatamana zingila mu zinzo zingoto. Landila thangu yoyo wuyenda zingila lukufi ayi fulu kiba minti mi kula mi Mamele midi ku Hebeloni Kuna katungila Yave ziku.