1 Mose 12 - Bible en Kiyombe

ABALAHAMI 12-25 Nzambi wutela Abalami katotuka mu tsi andi

¹ Yave wukamba Abalami: «Botuka mu tsi aku, mu kanda diaku ayi mu nzo se diaku, yenda ku tsi yi ndiela kumonisa.

² Manditula nkulu batu baphuele, mandisakumuna. Mandivanga zina diaku di ba dinnene. Mawuba lusakumunu kudi batu bankaka.

³ Mandisakumuna babo ba kusakumuna, Mandisinga babo ba kusinga, Ayi mu ngeyo muna sakumunu makanda mamo ma ntoto.»

⁴ Abalami wuyenda banga bunkambila Yave, ayi Loti wuyenda yandi. Abalami wuba lusambudi ayi mvu ntanu bu katotuka mu Halani.

⁵ Abalami wubonga nketo andi Salayi ayi muana khomba andi Loti, banata bimvuama bibio ayi babo babesalanga yandi ku Halani. Bayenda ku ndambu tsi yi Kanana. Bayenda ku tsi Kanana. Batula kuna.

Abalami mu tsi Kanana, bosi ku Ngipiti

⁶ Abalami wusabuka tsi nate ku Sikemi, nate ku nti wu telebinta ki Mole. Mu thangu yina, ba Kanani baba mu tsi yina.

⁷ Yave wumonika kudi Abalami ayi wunkamba: «Mandivana tsi yayi kudi nkuna aku.» Abalami wutungila Yave ziku mu kumvikila nkayilu va fulu kinkamonikina.

⁸ Tona kuna, wuyenda ku tsi yi miongo midi ku ndambu yintotukilanga thangu yi Beteli. Wutunga nzo andi yingoto yidi va khati ka Beteli ku nlekilanga thangu ayi Ayi ku ndambu yintotukilanga thangu. Kuna katungila Yave ziku dinkaka ayi wunsambila mu zina di Yave.

⁹ Landila diawu, Abalami wuyenda mu fulu ka fulu nate ku wanda tsi Kanana.

¹⁰ Malema maba mu tsi buna Abalami wukulumuka ku Ngipiti mu kala kuna bonso nkibi, bila malema maba mangolo mu tsi.

¹¹ Mu thangu kakota mu Ngipiti, Abalami wukamba kudi nketo andi Salayi: «Nzebi ti kitoko kiwombo widi.

¹² Mu thangu basi Ngipiti mabakumona, mabakamba ti widi nketo ami, buna ma baphonda ayi ma bakubika ngeyo wumoyo.

¹³ Ndikubombidila, wubakamba ti widi busi kiami, muingi bakheba mbote, buna mandivuka mu diambu diaku.»

¹⁴ Mu thangu Abalami katula ku Ngipiti, basi Ngipiti bamona ti nketo Abalami wuba wukitoko beni.

¹⁵ Zimfumu zi luyalu lu Falao bamona phe nketo beni, baniemisa kudi Mfumu awu Falao, buna banata nketo beni ku nzo Falao.

¹⁶ Mu diambu diandi, Abalami wutoma kebo mbote. Bamvana mameme, zikhombo, zingombe, ziphunda zikheto ayi zimbakala, bisadi bibabakala ayi bibaketo, ayi bakamela.

¹⁷ Vayi mu diambu di Salayi, nketo Abalami, Yave wubuisa bivunga bingolo kudi Falao ayi batu babo baba mu nzo andi.

¹⁸ Buna Falao wutumisa Abalami ayi wunyuvula: «Bila mbi wuphangidi diphila yayi? Bila mbi kambu kukhambila ti nketo aku?

¹⁹ Bila mbi wukhambidi ti niandi busi kiaku? Mu diawu, ndimbongidi muba nketo ami. Buabu tala nketo aku, niandi niowo! Wumbonga ayi wenda!»

²⁰ Falao wutuma batu bandi, bawu batotula Abalami, nketo andi ayi bibio bikavua.