1 Mose 11 - Bible en Kiyombe

Banga ki Babeli

¹ Mu thangu yina, batu babo va ntoto batuba ndinga yimosi ayi ndiolokolo yimosi.

² Bu babotuka ku ndambu yintotukilanga thangu, bamona ndimba mu tsi yi Sineyali ayi bakala muna.

³ Bawu bakambasana: «Tuendeno! Tubumbeno biliki ayi tuvikeno biawu ku mbazu.» Basadila biliki banga matadi ayi bitima banga sima.

⁴ Bakamba diaka: «Tutungeno mbanza yidi na banga kidi na phungi yintula nate ku zulu! Tukivangileno dizina diyenda makumbu muingi tubika muangana va ntoto wumvimba.»

⁵ Buna Yave wukulumuka mu tala mbanza ayi phungi yi tunga bana ba batu.

⁶ Buna Yave wukamba: «Bawu badi nkangu wumosi ayi balembo tubi phova mosi, yayi thonono yi divanga diawu. Bu batonini divanga diphila yayi, buna tona buabu ka balendi lembakana diambu dibakeni mu vanga ko.

⁷ Tuendeno, tukulumuka muingi tusobikisa phova ziawu, muingi babika buela wakasana bawu na bawu!»

⁸ Yave wubamuangisa va ntoto wumvimba ayi balembo mu tunga mbanza.

⁹ Diawu fulu beni kitedolo Babeli. Bila kuna Yave kasobikisila ndinga zi batu babo badi va ntoto. Ayi kuna Yave kabamuangisa mu nza yimvimba.

Kikhulu ki nkuna Semi nate Abalami

¹⁰ Tala kikhulu ki nkuna Semi. Bu kadukisa khama mosi yi mimvu, Semi wubuta muana bakala Alapakasadi, mvu miole mivioka landila khuka nlangu.

¹¹ Landila mbutukulu yi Alapakasadi, Semi wuzinga khama tanu zi mimvu. Wubuta bana bankaka ba babakala ayi babaketo.

¹² Alapakasadi wuzinga makumi matatu ayi mvu mintanu, wubuta Sela.

¹³ Landila mbutukulu yi Sela, Alapakasadi wuzinga diaka khama ya ayi mvu mintatu. Wubuta bana bankaka bababakala ayi babaketo.

¹⁴ Sela wuba makumi matatu ma mimvu buna wubuta Ebeli.

¹⁵ Ku mbusa mbutukulu Ebeli, Sela wubuela khama ya ayi mvu ntatu. Wubuela buta bana bankaka ba babakala ayi ba baketo.

¹⁶ Ebeli wuzinga makumi matatu ayi mvu mi nya, ayi wubuta Pelengi.

¹⁷ Landila mbutukulu yi Pelengi, Ebeli wuzinga khama ya ayi makumi matatu ma mimvu. Wubuta bana bankaka bababakala ayi babaketo.

¹⁸ Pelengi wuzinga makumi matatu ma mimvu, ayi wubuta Lehu.

¹⁹ Landila mbutukulu yi Lehu, Pelengi wuzinga khama zole ayi vua di mimvu ayi wubuta bana bankaka bababakala ayi babaketo.

²⁰ Lehu wuzinga makumi matatu ayi mvu miole, ayi wubuta Selungi.

²¹ Landila mbutukulu yi Selungi, Lehu wuzinga khama zole ayi mvu tsambudi. Wubuta bana bankaka bababakala ayi babaketo.

²² Selungi wuzinga makumi matatu mamimvu, ayi wubuta Naholi.

²³ Landila mbutukulu yi Naholi, Selungi wuzinga diaka khama zole zi mimvu. Wubuta bana bankaka bababakala ayi babaketo.

²⁴ Naholi wuzinga makumi mole ayi vua di mimvu, ayi wubuta Tela.

²⁵ Landila mbutukulu yi Tela, Naholi wuzinga diaka khama mosi ayi kumi vua di mimvu, wubuta bana bankaka bababakala ayi babaketo.

²⁶ Tela wuzinga lusambudi lu mimvu, wubuta Abalami, Naholi ayi Halani.

²⁷ Tala kikhulu ki nkuna Tela: Tela wubuta Abalami, Naholi ayi Halani. Halani, wubuta Loti.

²⁸ Halani wufua mu thangu se diandi Tela wukhidi wu moyo, mu tsi yi kabutukila ku Uli mu tsi ba Kaladeya.

²⁹ Abalami ayi Naholi bakuela baketo. Zina di nketo Abalami, Salayi ayi zina di nketo Naholi, Milika, muana wunketo wu Halani. Halani wuba se di Milika ayi Iska.

³⁰ Salayi wuba sita, kasi ba ko ayi muana.

³¹ Landila momo, Tela wubonga muana andi Abalami ayi Loti, ntekolo andi, muana Halani ayi Salayi, nzitu andi, nketo muana andi Abalami, batotuka va kimosi mu Uli, mu tsi Kaladeya mu kuenda ku tsi Kanana, batula ku Halani, bakala kuna.

³² Tela wuzinga khama zole ayi mvu mintanu ayi wufua ku Halani.