1 Mose 1 - Bible en Kiyombe

THONONO NZA AYI BATU 1-11 Nzambi vengi zulu, ntoto ayi batu

¹ Vana thonono Nzambi wuvanga zulu ayi ntoto.

² Ntoto wuba kadi tsundu ayi phavala ayi tombe kiba va mbata phinda minlangu ayi Pheve yi Nzambi yiba vevilanga va mbata minlangu beni.

³ Nzambi wukamba: «Bika kiya kiba!» Buna ki ya kiba.

⁴ Nzambi wumona ti kiya kiba kimbote, buna wuvambisa kiya ayi tombe.

⁵ Nzambi wutedila kiya muini ayi tombe builu. Masika maba ayi nsuka wuba: kiawu kiba lumbu kithete.

⁶ Nzambi wubuela kamba: «Bika luyalungunu luba va khati muvambisa minlangu mu ndambu zole».

⁷ Nzambi wuvanga luyalungunu ayi wuvambisa minlangu mitsi ayi minlangu miyilu. Bobo phe bubela.

⁸ Nzambi wutedila luyalungunu, zulu. Masika maba ayi nsuka wuba: kiawu kiba lumbu kinzole.

⁹ Nzambi wukamba: «Bika minlangu midi kutsi zulu mikutakana va fulu kimosi muingi ntoto wuyuma wumonika.» Bobo phe bubela.

¹⁰ Nzambi wutedila tsi yiyuma ntoto, ayi wutedila lukutukunu lu minlangu mbu. Nzambi wumona diawu diambu dimbote.

¹¹ Nzambi wukamba: «Bika ntoto wubuta biti, bimbutanga mbongo, minti midi makundi malenda buta makundi banga buididi ziphila zi minti, muingi mibutana va ntoto.» Bobo phe bubela.

¹² Ntoto wubuta biti, biti bidi na mbongo banga buididi buphila buawu, minti mimbutanga makundi madi na mbongo banga buididi ziphila ziawu. Nzambi wumona diawu diambu dimbote.

¹³ Masika maba ayi nsuka wuba: Kiawu kiba lumbu kintatu.

¹⁴ Nzambi wukamba: «Bika bima binkienzulanga luyalungunu lu zulu biba muvambisa muini ayi builu, bika biba bidimbu mu songa zi tsungi, bilumbu ayi mimvu.

¹⁵ Bika bima beni bilezima ku zulu mukienzula ntoto.» Bobo phe bubela.

¹⁶ Buna Nzambi wuvanga bima biole bineni binkienzulanga : kimosi kilutidi tola, thangu, mu yala mu muini ayi kilutidi keva, ngonda, mu yala mu builu ayi wubuela phe zimbuetete.

¹⁷ Nzambi wutula biawu mu luyalungunu lu zulu muingi bikienzulanga ntoto,

¹⁸ biyala mu muini ayi mu builu, ayi mu vambisa kiya ayi tombe. Nzambi wumona diawu diambu dimbote.

¹⁹ Masika maba ayi nsuka wuba: kiawu kiba lumbu kinya.

²⁰ Nzambi wubuela kamba: «Bika minlangu mifundubula bibulu bimoyo, bika zinuni phe zitilumuka va yilu ntoto kutsi luyalungunu lu zulu.»

²¹ Nzambi wuvanga bulu bitsisi beni bi nlangu bimvemanga ayi bimfunananga mu nlangu ayi bulu bibio bidi mavavi, bibio bidi moyo ayi binkibanga banga buididi ziphila ziawu ayi zinuni zizio banga buididi ziphila ziawu. Nzambi wumona diawu diambu dimbote.

²² Nzambi wusakumuna biawu ayi wukamba: «Butananu, niekeno ayi wesanu nlangu mi mimbu, ayi bika zinuni phe ziwoka va ntoto!»

²³ Masika maba ayi nsuka wuba: kiawu kiba lumbu kintanu.

²⁴ Nzambi wukamba: «Bika ntoto wubuta mintindu mimio mi bibulu bidi moyo banga buididi buphila buawu: bulu biyodama, bulu bifioti ayi bulu binsitu banga buididi ziphila ziawu!» Bobo phe bubela.

²⁵ Buna Nzambi wuvanga ntindu mimio mi bibulu: Bibulu binsitu banga buididi buphila buawu, bibulu biyodama banga buididi buphila buawu, bibio bidi moyo bindiatanga va ntoto banga buididi buphila buawu. Nzambi wumona diawu diambu dimbote.

²⁶ Nzambi wukamba: «Bika tuvanga mutu mu kifuani kieto, banga butuididi. Bika kayala mbizi zidi mu mbu, zinuni zidi ku zulu, bibulu biyodama, ntoto wumvimba ayi bibulu bibio bindiatilanga mu vumu va ntoto!»

²⁷ Nzambi wuvanga Mutu mu kifuani kiandi, Mu kifuani ki Nzambi Wubavanga. Wubavanga Bakala ayi nketo.

²⁸ Nzambi wubasakumuna ayi wubakamba: «Butananu, niekeno, wesanu ntoto ayi yalanu wawu. Yinimisanu mbizi zimbu, zinuni zi zulu ayi bibulu bibio bidi moyo bindiatilanga mu vumu va ntoto.»

²⁹ Nzambi wukamba: «Tala, ndiluveni biti bidi na mbongo va mbata ntoto wuwo ayi minti mimio mimbutanga makundi madi na mbongo. Bibio mabiba bidia bieno.

³⁰ Pheni mu dia biti bibio bikhunzu kudi bibulu bibio va ntoto, kudi zinuni zizio zintilumukanga ayi kudi bibio bidi moyo binkibanga va ntoto bidi muela wumoyo.» Bobo phe bubela.

³¹ Nzambi wumona ti bibio bikavanga biba bimbote beni. Masika maba ayi nsuka wuba: kiawu kiba lumbu kinsambanu.