Yunus 3 - Yegɗohiŋ Muci

Ɓi Niniw ɓoƴsohiɗ tumohaaɗ, Kooh ɗaasiɗ ɓa

¹ Wa a pul ŋ cuurnda, Nikiɗi kanakɗukka woo Yunus ne :

² « Kaɗa win-win Niniw, kur ka yakka. Kataa ɓa ini ŋ woo ɗa. »

³ Yunus gooñukka, kaɗta Niniw findi Nikiɗi woyoha. Niniw nikee kur yakoh na yakoh, a neeh kaahay onan ɓo' a tiinda ɓak po ɓak.

⁴ Wa a kaɗ po a aassa Niniw, a hooɓukka wil nga. A huflukka ɓi Niniw na hoosoocii : « Tasiɗ neeh ndaŋkiyaah-nikiis (40), Niniw ɗumbu ! »

⁵ Wa ɓi Niniw kerah woo keem, ɓa kossa Kooh ; ɓa katohha or, ɓa ɓekukka ɓi daah, ambohha ŋ ya uup yak po ŋ ya uup ƴin.

⁶ Wa woo ka ree ŋ nofaŋ buuraŋ Niniw, a kurukka ngaŋ ɓoofohaanaŋ ɗe, a wolukka lipkohaaɗaŋ ɗe, a ɓekukka daah, a baffa ŋ wet,

⁷ a woosohha ŋ ɗooƴ kur ka jen ne : « Buur na yakak ci sangohiɗ ɓooɓi na ɗoopaat ci, yakak na ƴin, ne ɓa kanaat ñam, ɓa kanaat an masuɓ,

⁸ yaa nu nga ɗah, ɓekkaat daah. Ɓi hooso meeɓuuɗ koolɗu, po ngaŋ Kooh, te yaa nu nik suungɗuk tiindohaaɗiŋ ɗe sepƴiɗi, na tumohaaɗ ci otiɗ ciŋ yaah ciŋ ɗe.

⁹ Yaa inah andi Kooh ɓoƴsanɗi liiɓohaaɗ, andi inwaaso ambanɗi ɗe, andi a heyɗi dokne paa finho dohɗiŋ aay-keeñiŋ ɗe, po ɓoo sooƴuu ? »

¹⁰ Ŋ ineem, Kooh inhisohha in ca ɓa haɓɗe ne ɓa pul ngaŋ tiindohaaɗ ca moɗaaɗiicaŋ ɓa. Taambohha nga inwaaso ammba Kooh ŋ in ca a kooɗkiɗee ɓa, te a mirndohɗi ca raakiɗ.