Yunus 1 - Yegɗohiŋ Muci

Yunus waaɗ penduk nakohiŋ Kooh

¹ Yunus, a nikee kuɓu Amitay. Raakka mbeh, Nikiɗi woosa ɗe ne :

² « Kaɗa win-win Niniw, kur ka yakka, looƴkaa ɓa ne aƴaarkaŋ ɓa reyiɗ nga so. »

³ Waaye Yunus taambohha ndeem a saandohha Tarsis, ne a fus Nikiɗi. A reesa ŋ Joppa, a raakka nga batoona na kaɗe Tarsis, a wirinnda, a aassa na ɓi ɓo' ŋ batoona na hee ɓa coottohe nga ne a min ki us Nikiɗi.

⁴ Waaye, wa ɓa nik ŋ ɗooƴ cookma, Nikiɗi fuuɗissa ŋ ɗafuk cookma puuɗis ayrukiɗ, pahul yakak yoppa cookma po batoona waaɗeeɗa ɓaltukoh.

⁵ Ɓooɓa ambohee batoona neƴƴohha ; yaa nik nga ɓa looƴukka tiikaŋ koohaŋ ɗe, ɓa aammba unung caŋ ɓa ŋ cookma ne ɓa eɗfiɗ batoona. Raakka waam Yunus ruhsiɗ ngaŋ tasaŋ batoona ; a nikee faankiɗ, a neeheeɗa pani nooɗiɗ.

⁶ Ƴaara adgiɗee amboh ca reɓpa ɗe, woosa ɗe ne : « Fu neehang ye ? Kurka, koolɗa hooso po ŋ koohiŋ ɗa ! Wa miniɗ raak Kooh liiɓsiɗoh ɓoo po ɓoo sooƴuu. »

⁷ Ŋ ndeem, ɓa woytiɗohha an : « Ɓoo markiskaat ŋ petaaw ci, ɓoo marak miskiɗi rahas ɓoo puloh nga ɓa. » Ɓa markisukka, petaaw ca teeɓohha Yunus.

⁸ Ɓa woyissa ɗe ne : « Teeɓa ɓoo ɓoyi ɓek ɓoo inii ! Fu na haɓɗe ye ? Fu kurkoh nde ? Kur ɗu teeku na ? Fu ɓaah ngaŋ winde cuuɓ ? »

⁹ A loffa ɓa ne : « Ŋ Heber, Nikiɗi, a yi mi na yakɗe, Kooh ŋ ɗafki, yi fer cookmi na kehƴi. »

¹⁰ Wa ɓa kerah woo kaŋ ɗe, amboh ca neƴƴohha, ɓa tummba ɗe ne : « Fu haɓiɗ ye an ? » Ɓa inheen ɓal ne a na saandohe fusoha Nikiɗi laam a naandsukeen ɓa wa.

¹¹ Ɓa meekissa ɗe ne : « Ɓoo na hee na tumtiɗohe na ɗa po cookmi yeeɓuk ? » Laam raak cookma koolɗukeeɗa koolɗuk.

¹² A loffa ɓa an : « Meeɓaat to ɗu biir ro ŋ cookmi, ɗah cookmi hey yeeɓke. Laam ŋ inhiɗa, wa nga so findi wa taamboh po pahuli ayrukiɗii bipukka ŋ ɗafuk ɗu. »

¹³ Joy ne ɓa tum ini a woo, amboh ca joowwa ne ɓa teer ŋ tefsa, waaye ŋ ɓarang ɓarang, laam cookma nikee uupeeɗa ɓa uup ayruk.

¹⁴ Ŋ ineem, ɓa kiimmba Nikiɗi ne : « Cey ! Nikiɗi, kana ɓoo ap sagu ƴaarii ! Te kan ɓoo yamb kakaan ɓo' yurhiɗ. Laam a yaf, Nikiɗi, tum findi wa neɓoh ɗa. »

¹⁵ Ɓa jaarra, ɓa meeɓpa Yunus, ɓa njaffa ɗe ŋ cookma, cookma hannda seemiɗ ɗuuɗaŋ wa.

¹⁶ Ɓooɓa neƴƴohha ŋ Nikiɗi ; ɓa seeƴkiɗta ɗe, ɓa giñiɗta ɗe ne ɓa hey ɗe tumɗe in, ɓa cooteeɗa.