Tum ci 9 - Yegɗohiŋ Muci

Sool kosiɗ Yeesu

¹ Ŋ ini kaɗ ŋ Sool, a genee dabgiɗ ap taalubeeciŋ Heɗ ɓoo. A kaɗta ŋ seeƴkiɗoha yakka,

² a meekissa ɗe kayit ca a ɓayan wuu sinaagog caŋ Damas ; ne a raak ɓi ƴaar mbaa ɓitiɓ nga taambɗee waasiŋ Yeesu ɗah, a amb ɓa, a ɓay ɓa Yerusalem.

³ Wa a kaɗ po a heeɗa ree Damas, ɗekka po ñiin puloh Eel ci willa ɗe, siñaarɗeeɗa.

⁴ A keennda ŋ kehƴi, a kerahha hooso woyeeɗa ɗe ne : « Sool, Sool, waaye tah fu tolfiɗee so ? »

⁵ A loffa ne : « A fu ɓa Heɗi ? » Hoosoora woosa ɗe ne : « E ñam Yeesu yi fu na tolfiɗe.

⁶ Waaye kurka, aasa ŋ kur ki, fu hey woyse nga ini fu joy tum. »

⁷ Ƴaaɓa hunee na ɗe tufukka, ɓa feyuusa po ɓa minɗi woo. Ɓa kerheen hoosoora waaye ɓa hoteeɗi ɓo'.

⁸ Sool kurukka, a marakka waaye a minisseeɗi hot. A ambuusa ŋ yaah, a nookuusa ne a reytinu Damas.

⁹ A rissa fuuliɗ neeh kaahay, a ñamɗi, a anɗi.

¹⁰ Waam, ŋ Damas, wa raakeen taalube nga teeku Anañaas. Heɗ ɓoo teeɓukka ɗe findi heeƴ, woosa ɗe ne : « Anañaas ! » Yeem loffa ne : « Yoo, Heɗi, ñam yii. »

¹¹ Heɗi woosa ɗe ne : « Kurka, fu kaɗ kahan Yudaa, ŋ mbeeddaana na woyse Mbeeddaani Yurhiɗi, fu meeksoh ƴaari na woyse Sool gen Tarsa. A yaa kiim Kooh.

¹² In hayɗohiɗ ɗe findi heeƴ, an ƴaar teeku Anañaas aasiɗ, degga ɗe yaah ciŋ ɗe ne a hotis. »

¹³ Anañaas loffa ne : « Heɗi, ŋ kerhiɗ ŋ ɓo' laayiɗ moɗaaɗiici ƴaareem tum ɓooɓiŋ ɗa ŋ Yerusalem.

¹⁴ Te ɓaat nga, ndii sah kilifaaciŋ seeƴkiɗoh ciŋ waasiŋ Musaa oniɗ ɗe ne a min amb ɓooɓi na kiime ŋ tiikiŋ ɗa jen. »

¹⁵ Waaye Heɗ ɓoo woosa Anañaas ne : « Kaɗa, laam ƴaareem, ñam kooɗ ɗe ne ŋ njirñiɗkoh ɗe. A hey inhiɗohe tiikiŋ ngo ŋ heet ci nikɗi Yawuut, na buur ciŋ ɓa na Israayel ci.

¹⁶ Mi ŋ haf fo, ŋ hey ɗe teeɓe juukiŋ miskiɗ ci a raakan sagu tiikiŋ ngo. »

¹⁷ Wa a kerah woo keem, Anañaas kaɗta. A aassa ŋ kahna, a degga Sool yaah ciŋ ɗe, a woosa ɗe ne : « Sool taambɗoh ho, Heɗi a yi tuuƴ co, Yeesu, yi teeɓuk ɗa ŋ waasi wi fu na haye ; a yi tuuƴ co ne fu hotis te fu riif na Fuuɗsi Hoolohngaani. »

¹⁸ Ŋ ɗiska ɗiska, in haa waasintoor pulohha ŋ has ciŋ ɗe, keennda, a hotisseeɗa. A kurukka, a ɓoktuusa.

¹⁹ Ƴutta, a ñammba, a raakissa hatil. Wa a ɓoktu po ƴutta, a tummba ɓi neeh ŋ ndaam na taalubeeca gen Damas.

Sool cambiɗ yegɗoh Yegɗohiŋ Muci

²⁰ Ŋ ɗiska ɗiska, a cammba yegɗoh ŋ sinaagog ca ne Yeesu a yi Kuɓkiŋ Kooh.

²¹ Ɓooɓa kerhee ɗe jen feyuusa, ɓa woyeeɗa ne : « Ca' ! Ƴaarii a yi meeɗ tumoh miskiɗ ŋ Yerusalem, a torhiɗee ɓooɓi na kiime ŋ tiikiŋ ƴaareem haa e ? Te a hay ndii ne a amb ɓooɓeem, a ɓay ɓa ŋ fiki kilifaacaŋ seeƴkiɗoh ca. »

²² Waaye Sool uupeeɗa nga uup ndeng ŋ ini a yegɗohe. Yawuut ca genee Damas raakɗi lofaah, laam a nikee teeɓeeɗa ɓa ne Yeesu a yi Mucɗohi Gapohse !

²³ Wa tummba in maañiɗ, Yawuut ci kerhiɗohha ne ɓa ap ɗe.

²⁴ Sool yeggaa, raak ɓa niiɗeeɗa yahndeer caŋ kur-taaha noh na wek ne ɓa min ɗe ap.

²⁵ Waaye taalubeeciŋ ɗe ɓayya ɗe na wek, ɓa ɓekka ɗe ŋ dammba yakiɗ, ɓa yoorra ɗe huntiɗkohiɗ na miira.

Sool kaɗiɗ Yerusalem

²⁶ Wa Sool puloh ndaam, a kaɗta Yerusalem, a jeemmba hun na taalubeeci waaye ɓa jen ɓa neƴƴohha ɗe, ɓa koseeɗi kitaalubeekiŋ ɗe.

²⁷ Weɗ Barnabaas ɓayoh ɗe, kaɗta na ɗe ŋ Apootar ca, a naandsukka ɓa findi Sool hotoh Heɗ ɓoo ŋ waas Damas na findi Heɗi woyoh na ɗe, na oolki a oolkee woo ŋ tiikiŋ Yeesu ŋ ndaam.

²⁸ Ŋ ineem, a nikka na ɓa ŋ ɗooƴ Yerusalem, a hunnda na ɓa, a woyeeɗa ŋ tiikiŋ Heɗi te a neƴƴohɗi.

²⁹ A woyeeɗa, a taastiɗoheeɗa na Yawuut ci na jombe gerek, waaye ɓeem jeemeeɗa ɗe ap.

³⁰ Wa ɓaah caŋ ɓoo kosiɗ ca keraha, ɓa ɓayya ɗe po ŋ Seesare, ɓa cootiɗta ɗe Tarsa.

³¹ Waam raak, kosiɗ caŋ Yudee jen na Galile na Samari, raakiɗ jam. Kosiŋ ɓa ɓaatkeeɗa, ɓa peseeɗa ŋ nup Kooh Heɗ ɓoo, te ɓa uupeeɗa nga uup laay, taamboh ŋ ɓaatɗohiŋ Fuuɗsi Hoolohngaani.

Piyeer ŋ Lidda, wirɗukaŋ Enee

³² Piyeer kaɗeeɗa ŋ ɗisik nu nik ŋ kur ka. Wa raakka mbeh, a kaɗta marka ɓo'-Kooh ca genee Lidda.

³³ A cohha na ƴaar nga teeku Enee. Ƴaareem tumiɗ kiis yasna-kaahay ŋ fiƴaang, a lafñee lafañ.

³⁴ Piyeer woosa ɗe ne : « Enee, Yeesu Kiristaa a yii wiriɗ ɗa, kurka fu raɗoot fiƴaangiŋ ɗa. » Jaarra, Enee kurukka.

³⁵ Wa ɓooɓa gen Lidda na kur caŋ Saroon hot ɗe, ɓa ɓoƴsohha pesohaaɗ, ɓa kossa Heɗ ɓoo.

Piyeer hultiɗiɗ Tabita ŋ Yope

³⁶ Wa raakeen ŋ Yope taalube Yeesu ɓitiɓ teeku Tabita, wa tokis "Dorkas" ŋ gerek, weɗ "Ngaay". A meeɗ gen ŋ tum in baahiɗ na ɓaatɗoh ñakiɗ ci.

³⁷ Ŋ neeh caam, a keennda kosaay, a kaannda. Ɓa ɓookka fiɗaafa, wa deguusa ŋ tuuƴ, ŋ ɗafuk kahna.

³⁸ Taalubeecaŋ Yope kerheen ne Piyeer yaa ŋ Lidda. Lidda usoheeɗi na Yope. Ɓa woossa ƴaar kanak ne ɓa kaɗ ŋ Piyeer, ɓa kiim ɗe ne a hay nga ɓa win-win.

³⁹ Piyeer kurukka, a hunnda na ɓa. Wa a ree, ɓa ɓayya ɗe ŋ tuuƴa ŋ ɗafka. Ɓitiɓ ca fu inah ne ƴaar caŋ ɓa kaaniɗ, hayya cohe na ɗe. Ɓitiɓ ceem, Dorkas meeɗeen ɓa haɓɗiɗ kulɓa wa a na pese. Ɓa taambkohha Piyeer na fuɗ, ɓa teeɓeeɗa ɗe kulɓaaceem.

⁴⁰ Piyeer puliɗta ɓa jen, a ƴekka, a kiimeeɗa Kooh, ƴutta, a yurhiɗkohha na fiɗaafi, a woosa ne : « Tabita kurka ! » Tabita marakka, a hotta Piyeer, a ɓooffa.

⁴¹ Piyeer onnda ɗe yaah, ɓaatɗohha ɗe ne a kuruk ; ƴutta a ɓeeɗukka ɓo'-Kooh ca na ɓitiɓ ca ƴaar caŋ ɓa kaane, a teeɓpa ɓa ɗe pesiɗ.

⁴² Ineem yeguusa ŋ Yope jen, ɓo' laayiɗ kossa Heɗ ɓoo.

⁴³ Ŋ finho ineem, Piyeer tassa ŋ Yope ɓi neeh, a dale ŋ kahan ƴaar teeku Simong. Simong yeem nikee fortoh und.