Tum ci 14 - Yegɗohiŋ Muci

Pool na Barnabaas ŋ Ikoñum

¹ Wa Pool na Barnabaas nik ŋ Ikoñum wa nikohissa ɗaa : Ɓa aassa ŋ sinaagogaŋ Yawuut ca. Ɓa woyeeɗa na ɓooɓa ŋ woo kiŋ Kooh po Yawuut na nikaaɗi Yawuut laayiɗ kossa.

² Waaye Yawuut ca kosaaɗiica tummba po ɓi nikɗi Yawuut raakka liiɓohaaɗ moɗaaɗi ŋ ɓaah caŋ ɓoo kosiɗ ca.

³ Hondohɗi nak Pool na Barnabaas taalndiɗta nikka ŋ kur-taaha. Ɓa woyeeɗa woo kiŋ Kooh na hel daliɗ, laam ɓa oolkeen Heɗ ɓoo te a ndengɗeen ne woo ki teeɓoh baahohiŋ ɗe wa keeh. Ŋ ineem a onnda ɓa, ɓa tumeeɗa ɓi keemaan na ɓi in feyohiɗ.

⁴ Ɓooɓaŋ kur ka kerhiɗohɗi, ɓa paysukohha kanak : Ɓum lannga na Yawuut ca, ɓinooɓa lannga na Apootar ci.

⁵ Yawuut ca na nikaaɗi Yawuut ca hunnda na kilifaacaŋ ɓa, ɓa kooɗukka tum Pool na Barnabaas miskiɗ, ɓa tap ɓa atoh po ɓa ap ɓa.

⁶ Waaye wi ɓa inaha, ɓa kaɗta naafka ŋ kur-taah caŋ Likawni cii : Listar, Derbe na ina wil ca.

⁷ Ɓa woyeeɗa Yegɗohiŋ Muci ŋ ndaam.

Pool na Barnabaas ŋ Listar

⁸ Ŋ Listar, wa raakeen ƴaar minaaɗi tufuk nga ; a rimuk rimuk na ineem, a moosɗi tiindoh. A nikka ɓoofiɗ,

⁹ a sikɗukeeɗa woo kiŋ Pool. Pool iiƴca ɗe, hotta ne ƴaara raakiɗ kos ne a min wirɗu,

¹⁰ a woosa ɗe ŋ ɗafka ne : « Kurka, fu tufuk koc na kot ciŋ ɗa ! » Ƴaara kurukka japit, a tiindeeɗa.

¹¹ Wa mboolnda hot ini Pool haɓiɗ, ɓa leehukka, ɓa woosa ŋ Likawni peɗmaŋ ɓa ne : « Hee, kooh ci ɓayiɗ mandohaaɗ ɓo', ca ruhsiɗ nga ɓoo. »

¹² Ɓa teekka Barnabaas Sos, ɓa teekka Pool Hermes, laam a yi ɓayohee woo ki.

¹³ Wa raakeen ŋ aasohaanaŋ kur ka ɗiska ɓa meeɗ ñaamkoh Sos. Seeƴkiɗoha ɓayya, ŋ fiki buntaanaŋ wa, ɓi naar inoh ɓekɗuuɗ tokkaah haɓɗohuuɗ pos. A waaɗta hun na mboolnda ne a seeƴkoh ca Barnabaas na Pool.

¹⁴ Wa Barnabaas na Pool kerah ineem, ɓa faarra kulɓaacaŋ ɓa sagu araami wa araam, ɓa faɗsukka mboolnda, ɓa woyeeɗa ŋ ɗafka ne :

¹⁵ « Ƴaaɓiŋ ngo, wa ye ɓek ɗu ŋ inii ? Ɓoo nam nik ɓo' njaay findiiɗu. Ɓoo hay ne ɓoo woo ɗu yegɗoh neɓiɗ ne ɗu faɗ in ci raakaaɗi njiriñ ci te ɗu wiiruk ŋ Koohi na pese, yi fer Eel ci na kehƴi na cookmi na in ci nik nga ca jen.

¹⁶ Wotɓa, a faɗeen cuuɓ ci jen, waa nu nga ɗa taambɗeeɗa waasiŋ ɗe.

¹⁷ Hondohɗi a taalndiɗta a teeɓeeɗa ɓa baah kiŋ ɗe : A ruhsiɗeeɗa toɓi ŋ eel ci wuu ɗu, a laaɓɗeeɗa yohon ci ŋ jamanooniŋ wa, a oneeɗa ɗu kañam, a riifɗeeɗa keeñ ciŋ ɗu na sum. »

¹⁸ Na woo ceem jen sah, wa yooɓeeɗi ŋ Barnabaas na Pool ne ɓa hondoh mboolnda seeƴuk wuu ɓa.

¹⁹ Wa ineem coot, ɓi Yawuut pulohha Añcos-Pisidi na Ikoñum, ɓa tummba po mboolnda lannga na ɓa. Ɓeem tapeeɗa Pool atoh ne ɓa ap ɗe, ƴutta ɓa faseeɗa ɗe po ɓa pulla kur ka, ɓa liiɓee ne a kaaniɗ.

²⁰ Waaye wa taalubeeca hay ndeerra ɗe, Pool kurukka, a aassa kur ka. Ŋ Kooh-wiisiina, a hunnda na Barnabaas, ɓa kaɗta Derbe.

Pool na Barnabaas dokkiɗ Añcos

²¹ Pool na Barnabaas woosa Yegɗohiŋ Muci ŋ Derbe, ɓi ɓo' laayiɗ ndaam kossa, ɓa nikka taalube. Ŋ ineem, ɓa dokukka Listar, Ikoñum na Añcos-Pisidi,

²² ɓa ndengtineeɗa taalubeeca, ɓa ñaaheeɗa ɓa ne ɓa amb ndengiɗ kosi ɓa kos. Ɓa woosa ɓa ne : « Ɓoo joyiɗ taamb ŋ miskiɗ laayiɗ ɓoo han aas ŋ Nguuriŋ-Kooh. »

²³ Jangu nu nik ɗah, Pool na Barnabaas tannda ɓi yakak nga ne ɓeem adgoha, ɓa kiimeeɗa Kooh, ɓa oreeɗa, ɓa faɗta ɓa ŋ yaah Heɗ ɓoo yi ɓa kose.

²⁴ Ɓa pulohha ndeem, ɓa lahha ŋ ɗooƴ Pisidi, ɓa kaɗta Pamfili.

²⁵ Ɓa yegɗohha woo kiŋ Kooh ŋ Perge, ƴutta ɓa kaɗta Attali.

²⁶ Ŋ ndaam, ɓa aassa bato ne ɓa wiiruk Añcos, ɗiska kosiɗ ca wikohee ɓa Kooh ne a baahohaat ɓa ŋ pangki ɓa mitiɗ wii.

²⁷ Wa Pool na Barnabaas ree Añcos, ɓa cohɗohha ɓi Janguuna, ɓa naandsukka ɓa in ci Kooh haɓiɗ taamboh nga ɓa jen, na findi a rangsiɗoh ɓooɓi nikɗi Yawuut waasiŋ kosi.

²⁸ Ɓa tassa ŋ ndaam in maañiɗ na taalubeeci.