Saaŋ 4 - Yegɗohiŋ Muci

Yeesu na ɓitɓa genee Samari

^1-3 Farisen ca kerahha ne, ɓooɓa na woye ne taalubeeci Yeesu raak, na ɓi a na ɓokte, ɓeɗ uup ɓiŋ Yahya. Nikka haa ne a Yeesu ŋ haf ce a yi na ɓoktohe haa, e taalubeeciŋ ɗe na ɓoktohe. Wa Yeesu inah ne Farisen ca kerhiɗ woo keem, a kurkohha Yudee, a dokukka Galile.

⁴ Ŋ kaɗaŋ ɗe, nikka ne a joy lahoh Samari.

⁵ A kaɗeeɗa po a reesa ŋ kur ɓaah ŋ Samari na woyse Sikaar ŋ sero yohna Yaŋhooɓa onee kuɓkiŋ ɗe Yuusufa.

⁶ Ŋ ndaam, naacaŋ Yaŋhooɓa nikee nga. Wa Yeesu yaaɓ ŋ tiindiŋ ɗe, a ɓooffa ŋ sero naaca ; wa nikee ŋ leero noh.

^7-8 Taalubeeciŋ ɗe kaɗta roma kañam ŋ ɗooƴ kur ka. Ɗekka po ɓitiɓ ɓaah ŋ ɓi Samari hayya neye. Yeesu woosa ɗe ne : « On ndo ŋ an. »

⁹ Ɓitɓa loffa ɗe ne : « Waaw ! Fu yi Yawuut, fu min ndo na kiimoh masuɓ, mi ɓitiɓ gen Samari ? » Waam raak Yawuut ci tiimbkee tiimbuk ɓi Samari.

¹⁰ Yeesu loffa ɗe ne : « Fu inheen ini Kooh onoh ɗah te fu inheen yi na kiimee ɗa masuɓ ɗah, a fu hee ɗe kiime masuɓ, a on ɗa masmi na onohe kipes. »

¹¹ Ɓitɓa loffa ɗe ne : « Kilifaani naaci weɗi ye nooɗan, te fu raakɗi hoc, fu ɓayohan masmi na onohe kipes ŋ nde ?

¹² A fu uup caaciŋ ɓoo Yaŋhooɓa yi on ɓoo naacii e ? A aniɗ nga a yi na kuɓuuciŋ ɗe, po ɗoopaat ciŋ ɗe sah. »

¹³ Yeesu loffa ɗe ne : « Masmii, ɓo' nu an nga ɗah, a hey sifaɗkisse.

¹⁴ Waaye ɓo' nu an masmi mi na hee ɗe one ɗah, a moosanɗi sifaɗuk muk. Laam, wa na hee nikee culi na hee kaɗɗe ŋ ɗooƴ ce, wa on ɗe kipes ki heyɗi reehe. »

¹⁵ Ɓitɓa loffa ɗe ne : « Kilifaani, on ndo ŋ masmeem, ne ŋ sifaɗkissuu, wa etohissuu ne ŋ hayee neye ŋ ndii. »

¹⁶ Weɗ Yeesu woyoh ɗe ne : « Kaɗa fu ɓeeɗka ƴaar fu, fu hayis ndii. »

¹⁷ Ɓitɓa loffa ɗe ne : « Ŋ raakɗi ƴaar. » Yeesu woosa ɗe ne : « Fu woo keeh ŋ ini fu woo ne fu raakɗi ƴaar.

¹⁸ Fu raakeen ƴaar yatuus, te yi fu nik na ɗe woti-woti, a ƴaar fu haa. Fu woo keeh. »

¹⁹ Ɓitɓa woosa ɗe ne : « Kilifaani, ŋ hotiɗ nga ne fu woosuuɗ.

²⁰ Ɓoo ɓi ɓi Samari, caac ciŋ ɓoo, meeɗ ñaamuk Kooh ŋ tangoorii, waaye ɗu ɓi Yawuut ci, ɗu woo ne ɗiska joy ñaamkohu wa ɗaa ŋ Yerusalem. »

²¹ Yeesu woosa ɗe ne : « Ɓitɓi, kosa ini mi na woyee ɗa wii, jamano wii hay, wa nikanɗi ne ɗu joy ñaamkoh Baabi ŋ tangoorii, wala ŋ Yerusalem.

²² Ɗu ɓi Samariici, ɗu na ñaamke Kooh waaye ɗu inahɗi ɗe ; te ɓoo ɓi Yawuut ci, Kooh yi ɓoo na ñaamke, ɓoo inhiɗ ɗe ; laam muci lahoh ŋ Yawuut ci.

²³ Waaye jamano wa ɗii hay, te sah wa reyiɗ, ñaamkoh ci keeh-keeh ci, Fuuɗsi Hoolohngaani hey ɓa one ɓa ñaamkee Baabi findi a nikoh keeh-keeh. Ñaamkoh mand ɗaa ɓeɗ Baabi waaɗ.

²⁴ Kooh, a Fuuɗsiŋ kipes ki, weɗ tah ɓooɓi na ñaamkee ɗe joyiɗa tum taamboh ŋ Fuuɗsi Hoolohngaani na ɓayohe ŋ keeh ki. »

²⁵ Ɓitɓa woosa ɗe ne : « Ŋ inhiɗ ne Mucɗohi Gapohse yi na woyse Kiristaani hey haye. A hay ɗah, a hey ɓoo teeɓe in ci jen. »

²⁶ Yeesu woosa ɗe ne : « E ñam, mi yi na woye na ɗa. »

²⁷ Teemb ndeem taalubeeciŋ ɗe reyeeɗa. Ɓa feyuusa ŋ ini ɓa hot Yeesu woyeeɗa na ɓitiɓ waaye ali ɓo' kaañɗi meeksoh ne : Fu waaɗ ye ? Wala fu na woye ye na ɓitɓii ?

²⁸ Ŋ ineem ɓitɓa faɗta neyohaanaŋ ɗe ŋ ndaam, a dokukka kur ka, a woosa ɓooɓa ne :

²⁹ « Hayaat ɗu hot ! Ŋ cohiɗ na ɓoyi woo so in ci ŋ tum jen. Andi a Mucɗohi Gapohse ? »

³⁰ Weɗ ɓi kur ka puloh, ɓa hayeeɗa ŋ Yeesu.

³¹ Bala ɓi kur ka reyan ɗah, taalubeeciŋ ɗe ñaakka nga ɗe woyeeɗa ɗe ne : « Jangɗohohi, ñama. »

³² Waaye a woosa ɓa ne : « Ŋ raakiɗ kañam ñamaah, wi ɗu inahɗi. »

³³ Taalubeeci woyeeɗa ŋ harmban ɓa ne : « Andi a ɓo' kom ɗe kañam ? »

³⁴ Yeesu woosa ɓa ne : « Kañam kiŋ ngo, weɗ ne ŋ tum waaɗ-waaɗiŋ Yi woos so te ŋ ɗiindoh pangki a nak ko.

³⁵ Ɓooɓa na woye ne : “ Ndii na caɓin nikiis weɗ nikan nguɗ. ” Waaye mi na woyee ɗu ne, jaɗtukaat ɗu marak yohon ci, ɗiski ca nik, ca ruundiɗ po ca suyiɗ, ca na seke nguɗu.

³⁶ Nguɗohi yii rahas wirndiŋ ɗe, te a hey nangɗohe mbong ciŋ ɗe ; mbong ceem, ɓeɗ ɓi raakan kipes ki heyɗi reehe. Ŋ ineem sokohi na nguɗohi hey hune, ɓa sum.

³⁷ Woyohaaɗii wa keeh ndii, an : “ Yii sok sok, yii nguɗta. ”

³⁸ Mi, ŋ tuuƴiɗ ɗu ne ɗu nguɗa ini ɗu guurɗi, ɓi ɓo' wiiriis ɓeɗ panguk, ɗu ɓii ñam opiŋ ɓa. »

³⁹ Ɓo' Samari laayiɗ gen kur keem, koseen Yeesu sagu woo ka ɓitɓa woyee ɓa ne : « A woyiɗ to in ci ŋ tum jen. »

⁴⁰ Weɗ tah po wa ɓi Samari hay ŋ Yeesu, ɓa kiimmba ɗe ne a nik na ɓa ; a nikka nga neeh kanak.

⁴¹ Ɓooɓa kosee ɗe uuppa nga laay sagu woo kaŋ ɗe.

⁴² Ŋ ndeem, ɓa woyeeɗa ɓitɓa ne : « Wa nikisɗi ne a woo kiŋ ɗa tah ɓoo kossa ɗe waaye ɓoo kerhootiɗ ɗe, te ɓoo inhiɗ ne wa keeh ne a yi Mucɗohiŋ Adina. »

Yeesu wirɗiɗ kuɓu dag buur

⁴³ Wa Yeesu tum neeh kanak ŋ kur ka, a kurkohha ndaam, a kaɗta Galile.

⁴⁴ Raak, a yi ŋ haf ce, a woyiɗ ne : « Woosuuɗ na eɗseeɗi cir ŋ kur ɓa. »

⁴⁵ Ɓi Galile, ɓa nameen kaɗ ŋ feetaŋ Paak ŋ Yerusalem, weɗ tah, wa a ree nga, ɓa taambɗukka ɗe taambɗuk moɗoɗ, laam ɓa hoteen ina a haɓiɗ ŋ Yerusalem jen, ŋ feeta.

⁴⁶ Yeesu dokukka Kanaa ngaŋ Galile, ɗiska a ɓoƴsohee masma biiñ. Wa raakeen dag buur ŋ Kapernawum yi kuɓkiŋ ɗe ƴaari kosaaye.

⁴⁷ Wa a kerah ne Yeesu kurkohiɗ Yudee hayiɗ Galile, a kaɗta ɗe raaka ne a kiim ɗe ne a hay, a wirɗiɗ ɗe kuɓkiŋ ɗe, raak yeem heeɗa kaane.

⁴⁸ Yeesu woosa ɗe ne : « Ɗu hotɗi firnde wala keemaan ɗah, ɗu kosanɗi muk ! »

⁴⁹ Waaye daga loffa ɗe ne : « Kilifaani, haya bala kuɓkiŋ ngo kaanan ɗah. »

⁵⁰ Yeesu woosa ɗe ne : « Kaɗa, kuɓkaŋ ɗa wiriɗ, a yaa pes ! » Ƴaara kossa ina Yeesu woo, a kaɗta.

⁵¹ Wa a kaɗe, ñaam ciŋ ɗe hayya cohe na ɗe, ɓa woosa ɗe ne : « Kuɓkiŋ ɗa wiriɗ, a yaa pes ! »

⁵² A meekissa ɓa ne : « A ngisoh ŋ winde wahtu ? » Ɓa loffa ɗe ne : « Wotɓa, ŋ njooloor, ŋ ineer (1h), weɗ dohɗiŋ faaniŋ ɗe cootoh. »

⁵³ Baabiŋ kuɓki inahha ne wa ŋ wahtuuni Yeesu woyoh ɗe ne : « Kuɓkiŋ ɗa wiriɗ, a yaa pes ! » Jaarra, a nikka ɓo' kosiɗ, a yi na ɓi kahan ce jen.

⁵⁴ Wa nikka firndeeni Yeesu kanakɗoh tum ŋ pulohaŋ ɗe Yudee a kaɗta Galile.