Saaŋ 20 - Yegɗohiŋ Muci

Yeesu hultiɗ

¹ Wa nikee mbehi taamb ŋ mbehi na iɗsiɗkohse na ɓaaɓa teel, raaka ris ñuus, Mari Makdala kaɗta ruy-ruyaŋ Yeesu. Wa a ree, a hotta ne atoh fa rangee wa ɓakɗuuɗ.

² Weɗi a nupoh ŋ Simong Piyeer na taalubeena yinoora, yi Yeesu keeñkohee, a woosa ɓa ne : « Ɓa kooɗohiɗ fiɗaafiŋ Heɗi ŋ ruy-ruya, te ɓoo inahɗi ɗiski ɓa ɗaaka ! »

³ Piyeer na taalubeena yinoora pulla ne ɓa kaɗ ruy-ruya.

⁴ Ɓa kanak jen, ɓa hunnda, ɓa nupeeɗa, waaye taalubeena yinoora uuppa gaaw Piyeer, a kocca ɗe ree.

⁵ A huusukka, a hotta uufa liwsee ŋ faaniŋ ɗe, waaye a aasɗi.

⁶ Simong Piyeer nikee ñaakɗeeɗa ɗe, a reesa, a aassa, a hotta uufa deguuɗ ŋ ɗisik.

⁷ A nammba hot wa wilɗassee ŋ hafa. Wa nikeeɗi na winoora, wa nikee lemuuɗ, wa deguusa kiik wa.

⁸ Taalubeena yinoora hannda nam aas ; a hotta, a kossa.

⁹ Fiis ci woyeen ne Yeesu joyiɗ hulit, waaye ɓa inheeɗaa paaɗ.

¹⁰ Taalubeeca kanak ca haadda.

Mari Makdala hotiɗ Yeesu

¹¹ Waam raak Mari ŋ hara, ŋ sero ruy-ruya, fuɗeeɗa, a huusukka, a markeeɗa ŋ ɗooƴa.

¹² A hotta malaaka kanak ɓekkiɗ kulɓa yaanow, ɓoofiɗ ŋ ɗiska fiɗaafaŋ Yeesu degse, yinoora ɓooffa teemb ŋ ɗiska hafi nike, ya tas teemb ŋ kot ci.

¹³ Ɓa woosa ɗe ne : « Ɓitɓi, fu na fuɗe ye ? » A loffa ɓa ne : « Ɓa ɓayiɗ fiɗaafiŋ Heɗ to, te ŋ inahɗi ɗiski ɓa ɗaaka. »

¹⁴ Wa a woo ineem, a heelukka, a hotta Yeesu tufkiɗ ; waaye a inhiseeɗi ɗe.

¹⁵ Yeesu woosa ɗe ne : « Ɓitɓi, fu na fuɗe ye ? Fu na waake ya ɓa ? » Mari liiɓpa ne a pangkohiŋ nguuki ɓa nikoh, a loffa ne : « Kilifaani, nik ne a fu ɓay fiɗaafi ɗah, teeɓ po ɗiski fu ɗaaka, ŋ kaɗa ɓaya. »

¹⁶ Yeesu woosa ɗe ne : « Mari ! » Mari wiirukka, woosa ɗe ŋ peɗeem Yawuut ne : « Rabbuuni ! » Wa tokis "jangɗohohi".

¹⁷ Yeesu woosa ɗe ne : « Kinaa so amb ndii laam ŋ rapɗi ŋ Baabi paaɗ. Waaye kaɗa ŋ ɓooɓiŋ ngo, fu woo ɓa ne mi yii rap ŋ ɗiskaŋ Baabiŋ ngo, yi nam nik Baabiŋ ɗu ; Koohiŋ ngo, yi nam nik Koohiŋ ɗu ! »

¹⁸ Ŋ ineem Mari Makdala kaɗta ŋ taalubeeca, a woosa ɓa ne : « Ŋ hotiɗ Heɗi ! » A woosa ɓa ina a woo ɗe jen.

Taalubeeci hotiɗ Yeesu

¹⁹ Mbaɗi na niina, taalubeeca cohha ŋ kahan, ɓa rangukka nga sagu neƴƴoh kilifaacaŋ Yawuut ca. Ɗekka po Yeesu nikka ŋ leerooɓa, a woosa ɓa ne : « Nikaat ŋ jam ! »

²⁰ A teeɓpa ɓa ɗiski a maangsee ŋ yaah ciŋ ɗe na hambuusiŋ ɗe. Ɓa summba lool ŋ hoti ɓa hot Heɗi.

²¹ Yeesu woyissa ɓa ne : « Jam nikaat na ɗu ! Findi Baabiŋ ngo woosoh ho, mi yii nam ɗu woosoh ɗaa. »

²² Ŋ finho woo keem a fuuɗissa nga ɓa, a woosa ɓa ne : « Rahsaat Fuuɗsi Hoolohngaani !

²³ Ɓi ɗu ɗaasan bakaaɗ ciŋ ɓa, ɓa hey ɗaasse. Ɓi ɗu ɗaasanɗi bakaaɗ ciŋ ɓa, ɓa ɗaassanɗi. »

Yeesu na Tomaa

²⁴ Waam raak Tomaa yi na woyse Siisi te a ɓaahha ŋ taalubeeci ndaŋkiyaah na kanak ci (12), a nikeeɗi na ɓa wa Yeesu hay nga ɓa.

²⁵ Taalubeeci ɓinooɓi woyeeɗa ɗe ne : « Ɓoo hotiɗ Heɗi. » Waaye Tomaa loffa ɓa ne : « Feeh ŋ hotɗi daaƴohiiciŋ pontooci ŋ yaah ciŋ ɗe, ŋ ɓekɗi ndukniŋ ngo ŋ ɗiski pontooci daaƴsee te ŋ ɓekɗi yaahiŋ ngo ŋ hambuusiŋ ɗe ɗah, ŋ kosanɗi wa. »

²⁶ Mbeha dokkissa, taalubeeci cohissa ŋ kahna, Tomaa nikee na ɓa. Buntaaca jen rangseen, ɗekka po Yeesu pulla, tufukka ŋ leerooɓa. A woosa ɓa ne : « Jam nikaat na ɗu ! »

²⁷ A hannda woo Tomaa ne : « Ɓaya ndukniŋ ɗa ndii, fu marak yaah ciŋ ngo. Raɗsa yaahiŋ ɗa fu ɓeka ŋ hambuusiŋ ngo. Kana nikis kosaaɗi, kosa kotii. »

²⁸ Tomaa loffa ɗe ne : « Heɗ to na Koohiŋ ngo ! »

²⁹ Yeesu woosa ɗe ne : « Hoti fu hot to, weɗ tah ɗa kos ! Ɓa neɓɗiɗ, ɓi kos te ɓa hotɗi ! »

Ini tah teerndii fiisu

³⁰ Yeesu tumissiɗ ŋ fiki taalubeeciŋ ɗe firnde wiiriis laayiɗ waaye ca fiisuuɗi ŋ teerndii.

³¹ Firndeeci fiisu cii fiisu ne ɗu kos ne Yeesu a yi Mucɗohi Gapohse, Kuɓkiŋ Kooh, te koseem on ɗu kipes ŋ tiikiŋ ɗe.