Pula 33 - Yegɗohiŋ Muci

Kooh waaɗisɗi ɓend Israayel ci

¹ Nikiɗi woosa Musaa ne : « Kaɗa, fu na cuuɓi fu pulɗoh Misra, kurkaat ndii, ɗu kaɗ kur ka ŋ giñɗee Ibrahiima na Isaahha na Yaŋhooɓa ne ŋ hey wa eɗe ɓi rimkohan nga ɓa.

² Ŋ hey woose malaaka, a nik ŋ fikiiɗu, ŋ hey aañe Kanaan ci na Amoor ci na Hit ci na Peris ci na Hiw ci na Yebuus ci.

³ Wa kur riifɗiɗ na miis na kuum. Kaɗaat, waaye ŋ hunanɗi na ɗu, ŋ nikanɗi ŋ ɗiski ɗu nikan. Ɗu cuuɓ ndengiɗ haf, ŋ sang ɗu ɗumb ŋ waas. »

⁴ Wa woo ki ndengɗi Kooh woo weem ree ŋ cuuɓa, ɓa nikka ŋ neɓaaɗi po ali ɓo' ɓekukɗi in moɗiɗ nga ɓa.

⁵ Laam, Nikiɗi nameen woo Musaa ne : « Woya Israayel ci ne : “ Ɗu cuuɓ ndengiɗ haf ! Ŋ nik ŋ harmban ɗu ƴissuut ɗah, ŋ hey ɗu ɗumbe. Saɓsukohaat na ɓekkaah ciŋ ɗu moɗiɗ ci, ƴut ɗah, ŋ hey inhe ini ŋ tuman ɗu. ” »

⁶ Ɓa saɓsukohha na ca ndaam, ɓa ɓekisɗi ca ina amboh ŋ tangooraŋ Horeb.

Musaa haɓɗohaahiɗ ɗiip cohoha ŋ finho dala

⁷ Musaa meeɗ ɓay ɗiip, a yipa usohiɗ na dala, a teekee wa "Ɗiipi-na-Cohohse". Ɓo' nu waaɗta woo na Nikiɗi ɗah, a pul dala, a kaɗ ŋ Ɗiipa-na-Cohohse.

⁸ Musaa kaɗeesa nga ɗah, ɓi cuuɓi jen kuruk, yaa nu nga tufuk ŋ nguɓu ɗiipiŋ ɗe, ɓa markee ɗe po a aas.

⁹ Musaa aassa ɗah, eela yipee findi kumbin hay po ŋ nguɓu ɗiipa, wa tufuk nga, jaar Nikiɗi woyee na ɗe.

¹⁰ Israayel ca hottaa rek ɗah, yaa nu nga ɗa ƴek ŋ nguɓu ɗiipiŋ ɗe.

¹¹ Nikiɗi woyee na Musaa jahran findi ɓo' na ɓo'. Ƴutta ɗah, Musaa dokuk ŋ dala waaye, dagiŋ ɗe na woyse Yosuwe, kuɓu Nun, tas ŋ ɗooƴ ɗiipa. Raak ɗe fiir.

Musaa kiimiɗ Kooh ne a ambaat nga rek

¹² Wa raakka mbeh, Musaa woosa Nikiɗi ne : « Marka ! A fu nak ko ne ŋ ɓay cuuɓii waaye fu teeɓɗi so yi hunan na so. Moona a fu woyee so ne : “ Ŋ inhiɗ ɗa na tiikiŋ ɗa, ŋ hey ɗa baahohe. ”

¹³ Ɗiski wa nik, nik ne fu baahohiɗ to ɗah, teeɓ po tiindohaaɗ ciŋ ɗa ; ŋ hey ɗa inhe baahiɗ te fu hey yo baahohisse. Kina alkoh ne cuuɓii, wa cuuɓiŋ ɗa ! »

¹⁴ Nikiɗi loffa Musaa ne : « Mi ŋ haf fo, ŋ hey hune na ɗa ne ŋ iɗsiɗ ɗa. »

¹⁵ Musaa woosa ne : « Nik ne fu ŋ haf fu, fu heyɗi ɓoo ɓende ɗah, kina ɓoo kurkiɗoh ndii.

¹⁶ Fu ɓendɗi ɓoo ɗah, wa inhohsan na ne fu baahohiɗ to, mi na cuuɓiŋ ɗa ? Huni fu hunan na ɓoo weɗ tahan ɓoo ɗaloh na cuuɓ ciŋ kehƴi jen. »

¹⁷ Nikiɗi woosa Musaa ne : « Ŋ baahohiɗ ɗa te ŋ inhiɗ ɗa ŋ tiikiŋ ɗa, tahha po ŋ hey name tum ini fu kiim mbo weem. »

Musaa kiimiɗ Kooh ne a teeɓ ɗe yaki a yak

¹⁸ Musaa woosa ɗe ne : « Ŋ kiim ɗa wa kiim, teeɓ po yaki fu yak ! »

¹⁹ Nikiɗi woosa ɗe ne : « Ŋ hey taambɗe baah kiŋ ngo jen ŋ fikiifu te ŋ hey woye tiikiŋ ngo "Nikiɗi" ŋ ɗafka ; ŋ baahohee ɓoyi ŋ baahoh, ŋ yirmee ɓoyi ŋ yirim.

²⁰ Waaye fu minanɗi hot fikiiriŋ ngo, laam ali ɓo' minɗi so hot te a taalndiɗ a pesisse.

²¹ Seka, ɗisik weɗi ŋ ndii, ŋ serooso ; fu na hee tufke ŋ ɗafuk atoh fi.

²² Siñaariŋ yaki ŋ yak taambee ɗah, ŋ hey ɗa ɗasɗe ŋ nungiŋ atoh fi, ŋ ɗip ɗa na yaahiŋ ngo po ŋ taamb.

²³ Ŋ nihis yaahiŋ ngo ɗah, fu hey hote finhooriŋ ngo, waaye fikiiriŋ ngo minanɗi hotu. »