Pula 19 - Yegɗohiŋ Muci

Kooh ambtiɗohiɗ na Israayel ci

^1-2 Mbeha koc ŋ caɓna kaahayɗoh ŋ finho pulohaŋ ɓa Misra, Israayel ca kurkohha Refidim, ɓa kaɗta kehƴa hulangaŋ Sinaay ; ɓa yippa ɗiip caŋ ɓa nga ŋ sero tangoora.

³ Musaa rapeeɗa ŋ tangoora ne a coha na Nikiɗi Kooh. Weɗ Nikiɗi ɓeeɗkoh ɗe ŋ ɗafuk tangoora, a woosa ɗe ne : « Inii weɗ fu na hee woye kuɓuuciŋ Yaŋhooɓa, Israayel ci : Nikiɗi woo ne :

⁴ “ Ɗu hotootiɗ findi ŋ tumoh na ɓi Misra, ŋ ɓayya ɗu nga so findi caango na raɗsohe paɓ ciŋ ɗe, a deg ƴiil ciŋ ɗe nga.

⁵ Markaat, kehƴi jen ñam raaka, ɗu kerah woo kiŋ ngo te ɗu taambiɗ ambtiɗohiŋ ngo na ɗu ɗah, ŋ cuuɓ ci jen, a ɗu nikan cuuɓiŋ ngo.

⁶ Ɗu hey nike cuuɓ hooliɗ wuu so, ɗu nik seeƴkiɗoh ci na hee nike ŋ harmban ndo na cuuɓ ci cinooci. ” Inii weɗ fu na hee woye Israayel ci. »

⁷ Musaa kaɗta ŋ mboolnda, a cohɗohha yakak ca, a woosa ɓa ini Nikiɗi nak ɗe jen.

⁸ Mboolnda jen hunnda woosa ɗe ne ɓa hey haɓɗe in ci Nikiɗi nakoh jen. A kaɗta, a woosa Nikiɗi ineem.

⁹ Nikiɗi woosa Musaa ne : « Marka ŋ hey haye po nga ɗa, ŋ ɗooƴ eel ñuusiɗ, Israayel ci hey yo kerhe woyee na ɗa, ɓa ooluk ɗa po faw. » Wa Musaa wik Nikiɗi woo kaŋ mboolnda,

Nikiɗi yipkiɗ ŋ tangooraŋ Sinaay

¹⁰ Nikiɗi woosa ɗe ne : « Dokka ŋ mboolnda, woyaa ɓa ne, woti na kim, ɓa ɓoktukaat, ɓa naaw kulɓaaciŋ ɓa.

¹¹ Mbehi kaahayɗoh, wa raakaat ɓa ƴutiɗ, mbaɗi ŋ hey yipke ŋ tangooriŋ Sinaay, ŋ fikiiɓa jen.

¹² Fu hey ɓa teeɓe ɗiski ɓa topan ŋ sereendiŋ tangoori. Te fu woo ɓa ne ɓa wortukaat, ɓa kinaat ree ŋ tangoori, ɓa kinaata laal. Ɓo' nu laala ɗah, a hey apse.

¹³ A nik ɓo', a nik ɗoopaat, ali ɓo' joyɗi ɗe laal. A tapsan tapu atoh wala ɓis. Kaɗ po ɗu kerah kuluɓ ɗah, raak ɓi han min rap ŋ tangoori. »

¹⁴ Musaa ruhussa ŋ mboolnda, a tummba po ɓa ɓoktukka, ɓa naawwa kulɓaacaŋ ɓa.

¹⁵ A woosa ɓa ne : « Faaha kim raakaat ɗu ƴutiɗ, te kinaat faanuk na ɓitiɓ ciŋ ɗu. »

¹⁶ Ŋ neeha kaahayɗoh ŋ wiisaaɗiina, wa melñeeɗa, wa indngeeɗa, eel ñuusiɗ nikka ŋ ɗafuk tangoora, ɓa kerahha kuluɓ roofiɗ nga ; ɓooɓa, ŋ ɗiska ɓa nikee ŋ dala, ɓa tiitta jen po ɓa saakɗoheeɗa.

¹⁷ Musaa puliɗta ɓa ŋ dala, a ɓayya ɓa ŋ sereendaŋ tangoora ne ɓa tufuk ŋ fiki Kooh.

¹⁸ Nikiɗi yipkeen nga ŋ ɗooƴ jaal yongkaah, tahha po tangooraŋ Sinaay nikee ɗuukeeɗa, ɗuukra kurkeeɗa jututut findi ɗuuku puur ; tangoora jen yoondeeɗa yoond keeh-keeh.

¹⁹ Kuluɓ ka uupeeɗa nga uup roof, Musaa woyeeɗa, a kerheeɗa hoosooriŋ Kooh lofeeɗa ɗe ŋ indnga.

²⁰ Nikiɗi yipukka ŋ tangoora ŋ suunaŋ wa, a ɓeeɗukka Musaa ; yeem rappa.

²¹ Nikiɗi woosa ɗe ne : « Ruhsa fu woya na mboolnda, waaɗ to hot kinaat ɓa ɓek ŋ cootuk ɗiski ɓa topɗu wala laayiɗ nga ɓa hey kaane.

²² Te sah seeƴkiɗoh ci joy hay nga so, ɓa joyiɗ farsuk, bala ŋ keenan ɓa ɗah. »

²³ Musaa loffa ɗe ne : « A fu woyee ne ŋ haɓɗaat ɗiski ɓooɓi na hee tope ŋ sereendiŋ tangoori, ŋ tuma ɗisik hooliɗ wuu fu, weɗ tah po mboolndi minanɗi rap ŋ ɗafuk tangoori. »

²⁴ Ŋ ineem Nikiɗi woosa Musaa ne : « Ruhsa, fu hayee ɗah, fu hun na Aaruna. Waaye ŋ ini kaɗ ŋ mboolndi na seeƴkiɗoh ci, waaɗ rap ŋ ɗiskiŋ ngo kinaat ɓa ɓek ŋ cootuk ɗiski ɓa topɗu, bala ŋ keenan ɓa ɗah. »

²⁵ Musaa yipukka ŋ mboolnda, a woosa na ɓa.