Pula 14 - Yegɗohiŋ Muci

Firawna ñaakɗiɗ Israayel ca

¹ Wa ɓaa hee pule Etam, Nikiɗi woosa Musaa ne :

² « Woya Israayel ci ne ɓa welaat, ɓa yip ɗiip ciŋ ɓa ŋ sero Pi-Ayrot, ŋ harmban Migdol na cookma. Yipaat ɗiip ciŋ ɗu ndaam, yurhiɗkoh na Ba'al-Sefon ŋ sero cookma.

³ Firawna hey woye ne : “ Israayel ci muuƴiɗ ŋ bilaf fa ; kehƴa hulanga rangiɗ ɓa. ”

⁴ Ŋ hey ndengɗe keeñiŋ ɗe po a taambiɗ ɗu. Teemb ndeem, ŋ hey teeɓohe yaki ŋ yak, ŋ in ci ŋ tuman ɗe, a yi na hiñohoh ciŋ ɗe, te ɓi Misra hey inhe ne ñam Nikiɗi. » Israayel ca tumohha in ceem jen ɗaa.

⁵ Wa Firawna woyu ne Israayel ca saandohiɗ, a yi na ɓooɓaŋ ɗe ɓoƴsohha liiɓohaaɗ ŋ ini kaɗ ngaŋ Israayel ca. Ɓa woosa ne : « Ɓoo haɓiɗ ye cii ? Wa ye tah ɓoo faɗee Israayel ci ɓa cootee, ɓoo raakissuu ñaam ci na hee ɓoo pangkiɗisse ? »

⁶ Firawna nakohha tokɗiɗu wotiiraŋ ɗe, a hunnda na hiñohoh caŋ ɗe,

⁷ a ɓayya wotiir caŋ Misra jen po ca teemet-yasna-yinooca (600) uupee baah nga ; waa nu nga ɗah, ɓayya hiñohoh kaahay.

⁸ Nikiɗi ndengiɗta keeñiŋ Firawna, buuraŋ Misra. Yeem taambiɗta Israayel ca, raak ɓeem puleeɗa na ndeng fit.

⁹ Hiñohoh caŋ Misra jen taambiɗta ɓa, ɓum tiindeeɗa, ɓinooɓi rappa panis, ɓi tas aassa ŋ wotiir caŋ Firawna, ɓa ñaakɗeeɗa ɓa po ɓa rahsohha ɓa ŋ sero Pi-Ayrot, yurhiɗkoh na Ba'al-Sefon, ɗiska ɓa yipee ɗiip caŋ ɓa ŋ sero cookma.

¹⁰ Wa Firawna kaɗ po a heeɗa rahse Israayel ca, ɓeem marakka, hotta ne ɓi Misra ɓii hay nga ɓa. Ɓa neƴƴohha lool, ɓa leehkeeɗa naafu ŋ Nikiɗi.

¹¹ Ɓa woosa Musaa ne : « Misra raakɗi raakɗi ruy-ruy po fu ɓayya ɓoo ŋ bilaf fii ne ɓoo kaanoh nga e ? Fu haɓiɗ ɓoo ye cii, wee tah fu kooɗohha ɓoo Misra ?

¹² Inii weɗ ɓoo woyee ɗa wa ɓoo nik ŋ kur ka haa e ? Ne “ Faɗa ɓoo moɗoɗ, ɓoo nik ñaam ciŋ ɓi Misra. ” Weɗ ngisoh kaan ŋ bilaf fii. »

¹³ Musaa loffa ɓa ne : « Kinaat neƴƴoh, tufkaat ɗu marak findi Nikiɗi mucɗohan ɗu woti. Ɓi Misra ɓi ɗu na hote ɓii, ɗu hotissanɗi ɓa muk.

¹⁴ Yeeɓkaat rek. Nikiɗi a yi na hee ɗu hiñohɗe. »

Taambaŋ Israayel ci ŋ ɗooƴ cookma

¹⁵ Nikiɗi woosa Musaa ne : « Wa ye tah fu leehkee nga so ? Woya Israayel ci ɓa deguk ŋ waasi.

¹⁶ Ɓaya ndooɗiŋ ɗa ŋ yaah, fu yurhiɗa ŋ cookmi. Fu paysoh cookmi kanak, Israayel ci min taamb nga te kot ciŋ ɗu iiri'uu.

¹⁷ Ini kaɗ nga so, ŋ hey ndengɗe keeñ ciŋ ɓi Misra po ɓa taambiɗ ɗu ŋ ɗooƴ cookmi. Teemb ndeem, ŋ hey teeɓohe yaki ŋ yak, ŋ in ci ŋ tuman Firawna na hiñohoh ciŋ ɗe na wotiir ciŋ ɗe na ɓooɓi rap panis.

¹⁸ Ŋ hey teeɓohe yaki ŋ yak ŋ in ci ŋ tuman ɓa, ɓi Misra inah ne ñam Nikiɗi. »

¹⁹ Ƴutta, malaakaaniŋ Kooh, yi meeɗ adug ŋ fiki Israayel ca, kaɗta ŋ finhooɓa, eela yipee haa kumbin ŋ fikiiɓa nammba kaɗ ŋ finhooɓa.

²⁰ Wa nikka ŋ harmban dal ca kanak ca, dalaŋ Misra na waŋ Israayel. Eelaam nikka ñuus ŋ ɓaka winoora, waaye weka reesa, wa ñiiniɗta ɓaka tas ne cuuɓ ca kanak ca minuu reɓɗukoh na wek.

²¹ Wa Musaa raɗis ndooɗaŋ ɗe ŋ ɗafuk cookma, Nikiɗi neehha puuɗis ŋ pulohaaɗ-noh, puuɗis raakiɗ hatil. A paysohha cookma kanak, merhey mi suyɗi nikka ŋ harmbana.

²² Israayel ca taammba nga te ɓa iiriiɗi, raak masma ɗingkiɗ findi miir ŋ yaah-ñaahum na yaah-sing.

²³ Ɓi Misra ñaakɗeeɗa ɓa na panis caŋ ɓa na wotiir caŋ ɓa jen ŋ ɗooƴ cookma.

²⁴ Na wiisaaɗiina, Nikiɗi, yi nikee ŋ ɗooƴ kumbinaŋ yongkaaha na eela, marakka ŋ dalaŋ ɓi Misra, a saɓsohha ɓa na sagoocaŋ ɓa.

²⁵ A tummba po panuucaŋ wotiir caŋ ɓa minisɗi kaɗ kaɗ yurhiɗ, ineem tahha po ɓa minisɗi nupiɗ baahiɗ. Ɓa woosa ne : « Ɓoo saandohaat, Nikiɗi yii hiñohiɗ Israayel ci. »

²⁶ Nikiɗi woosa Musaa ne : « Raɗsa ndooɗiŋ ɗa ŋ cookmi ne masmi dokkis findi wa nikohe, wa on ɓi Misra, wotiir ci na ɓi rap panis ci. »

²⁷ Musaa tumohha ineem ɗaa. Ŋ wiisaaɗiina, cookma dokukka findi wa mande, ɓi Misra saandoheeɗa, ɓa cohha na masma, Nikiɗi julla ɓa ŋ ɗooƴ cookma.

²⁸ Masma dokukka, wa onnda wotiir caŋ Firawna na ɓooɓa rapee panis ca jen. Hiñohoh ca dabee Israayel ca jen tassa ŋ cookma ; ali ɓo' pulɗi nga.

²⁹ Waaye Israayel ca taambeen ŋ cookma te ɓa iiriiɗi, raak masma ɗingkiɗ findi miir ŋ yaah-sing na yaah-ñaahum.

³⁰ Mbaɗi, Nikiɗi muciɗta ɓa ŋ yaah ciŋ ɓi Misra. Ɓa hotta fiɗaaf caŋ ɓi Misra ŋ sereendaŋ cookma.

³¹ Israayel ca hotta hatili Nikiɗi mucɗoh ɓa nga ɓi Misra, ɓa neƴƴohha ɗe, ɓa kossa Nikiɗi na Musaa ñaamiŋ ɗe.