Pula 1 - Yegɗohiŋ Muci

Israayel ci tumuuɗ ñaam ŋ Misra

^1-4 Cii ceɗ tiik ciŋ kuɓuuciŋ Israayel yi na woyse Yaŋhooɓa, ɓi hay na ɗe Misra : Ruben, Simeyong, Lewi na Yudaa ; Issaakar, Sabuloon na Benyaamin ; Daan na Naftaali, Gaad na Aser ; yaa nu nga ɗah, na ɓi kahan ce.

⁵ Raak Yuusufa kuɓkiŋ Yaŋhooɓa yinoori nikee ŋ Misra. Ɓi kahan Yaŋhooɓa jen nikee ndaŋkiyaah-yasna-kanak (70).

⁶ Ŋ mirndaani Yuusufa kaannda, a yi na taambɗoh ciŋ ɗe na ɓooɓa ɓaahee na ɗe jamano jen.

⁷ Waaye Israayel ca nikka ɓasil, ɓa rimaatɗoheeɗa, ɓa ɓaatkeeɗa, po ɓa riiffa kur ka.

⁸ Wa kaɗeeɗa po buur wiiriis adgohha kur ka, raak ɗe inheeɗi in ŋ Yuusufa.

⁹ A woosa ɓooɓaŋ ɗe ne : « Markaat Israayel ci, ɓeɗ uup ɓoo laay, ɓa uupiɗta ɓoo hatil.

¹⁰ Hiñoh raak ɗah, ɓa miniɗ hun na ɓi sang ɓoo, ɓa ruuk ɓoo te ɓa pul kur ki, kon ɓoo tumohaat na liiɓoha po ɓa ɓaatkuu. »

¹¹ Weɗi ɓi Misra degoh Israayel ca panguk miskiɗ, ɓa kooɗta ɓi ɓo' ne ɓa tumɗukohee Israayel ca ŋ pangkeem ngaŋ uup doole. Ɓa pangkeeɗa, po ɓa taɓahha Pitom na Ramses, ca nikka kur-taah ɗaakkoha pesoha ŋ tiikiŋ Firawnaana, buuraŋ Misra.

¹² Waaye findi ɓa uup ɓa tumɗukoh panguk miskiɗ ɗah, Israayel ca na uupohe ɓaatkoh ɗaa, ɓi Misra neƴƴohha ɓa keeh-keeh.

¹³ Ŋ ineem, ɓa uupeeɗa ɓa nga uup ñaamɗukoh.

¹⁴ Ɓa yahha kipes kiŋ ɓa na panguk miskiɗ, ɓa haɓɗiɗukoheeɗa ɓa muul na ɗok, ɓa guurɗukoheeɗa ɓa, ɓa añaandkoheeɗa ɓa na panguk nu nik ne wa miskiɗ ɗah.

¹⁵ Wa raakeen dooñoh kanak ngaŋ ɓaŋ Heber ca, yinoora teeksee Sifara ya tas teekuusa Puwa.

¹⁶ Buura nakka ɓa ne : « Ɗu tufkohee ɓitiɓ ciŋ Heber ci ne ɓa ɓaslee kotii ɗah, markaat baahiɗ, kuɓki nik ƴaar ɗah, apaat ɗe, a nik ɓitiɓ ɗah, faɗaat ɗe a pes. »

¹⁷ Waaye dooñoh ca nupeen Kooh, weɗ tah ɓa haɓiɗɗi ineem, ɓa faɗta kuɓuuca ƴaar ca, ɓa apɗi ɓa.

¹⁸ Weɗi buura ɓeeɗkoh ɓa, woosa ɓa ne : « Wa ye tah ɗu tummba inii, ɗu faɗee kuɓuuci ƴaar ci ɓa pese ? »

¹⁹ Ɓa loffa ɗe ne : « Ɓitiɓ ciŋ Heber ci ɓa mandɗi na ɓiŋ Misra, ɓa ndeng ndeng. Bala dooñohi na ree ɗah, raakee ɓa raakiɗ kuɓu po ƴutiɗ. »

²⁰ Kooh baahohha dooñoh ca, ŋ ineem Israayel ca uupeeɗa nga ɓaatuk, po ɓa nikka laayoh na laayoh.

²¹ Kooh tummba dooñoh ca ɓasil, ɓa raakka ɓi kuɓu ŋ kerhiɗi ɓa kerhiɗ ɗe.

²² Firawnaana nakka ɓooɓaŋ ɗe jen ne : « Israayel ci raak kuɓu a nik ƴaar ɗah, njafaat ɗe ŋ kaliŋ Niil ; a nik ɓitiɓ ɗah, faɗaat ɗe a pes. »