Macce 4 - Yegɗohiŋ Muci

Seytaani jaɗɗiɗ Yeesu fiir

¹ Ŋ ineem, Fuuɗsi Hoolohngaani, Fuuɗsiŋ Kooh ɓayya Yeesu ŋ nduufa, ne Seytaani jaɗiɗ ɗe fiir.

² A orra noh ndaŋkiyaah-nikiis (40) na wek ndaŋkiyaah-nikiis (40) ; ŋ mirndaani a aɗukka.

³ Seytaani, yi na jaɗɗohe fiir, reɓpa woosa ɗe ne : « Nik ne fu Kuɓkiŋ Kooh ɗah, woya atoh cii, ca ɓoƴsuk mbuuru. »

⁴ Yeesu loffa ɗe ne : « Fiis ci Hooliɗ ci woyiɗ ne : “ Ɓo' na pesohe mbuuru dong haa, waaye na woo nu nik ne wa puloh ŋ nguɓiŋ Kooh ɗah. ” »

⁵ Seytaani ɓayya ɗe Yerusalem, ŋ jol Kahnaŋ Kooh ;

⁶ a woosa ɗe ne : « Nik ne fu Kuɓkiŋ Kooh ɗah, faɗsuka ŋ kehƴi. Fiis ci Hooliɗ ci woyiɗ ne : “ Kooh hey nake malaakaaciŋ ɗe, ca ɓay ɗa ŋ yaah ciŋ ca po kot ciŋ ɗa laɓkanɗi ŋ atoh. ” »

⁷ Yeesu loffa ɗe ne : « Fiis ci namiɗ woo ne : “ Fu joyɗi markisuk Heɗ ɓoo, Koohiŋ ɗa. ” »

⁸ Seytaani rapɗissa ɗe ŋ jol tango njooloh na njooloh. A teeɓpa ɗe nguur ciŋ adinaani jen na yaki ca yak.

⁹ A woosa ɗe ne : « In cii jen, fu ƴekiɗ to ne fu ñaamuk ko ɗah, ŋ hey ɗa ca one. »

¹⁰ Yeesu loffa ɗe ne : « Seytaani, us so ! Fiis ci woyiɗ ne : “ Ƴekɗa Kooh Heɗ fu, te fu ñaamuk a yi dong. ” »

¹¹ Weɗ Seytaani faɗoh ɗe ndaam, jaarra malaakaaca hayya, taambkoheeɗa ɗe.

Yeesu cambiɗ pangkiŋ ɗe ŋ Galile

¹² Ŋ jamanoonaam, Yahya Ɓoktohi ambseen ŋ kasoona ; wa Yeesu keraha, a kaɗta Galile.

¹³ A kurkohha Nasareet a kaɗta gena ŋ Kapernawum ŋ sero cookma, ŋ kehƴaŋ cuuɓ ciŋ Sabuloon na Naftaali.

¹⁴ Jaarra ini woosuuɗi Esayi woyee raakka, an :

¹⁵ « Kehƴiŋ Sabuloon na Naftaali, wa nikka yaah-cookmi, ŋ ɓakiŋ Yurdan winoori, weɗ Galile, kur kiŋ ɓooɓi nikɗi Yawuut,

¹⁶ cuuɓi ɓoofee ŋ ñuusi hotiɗ siñaar yakak, te ɓi ɓoofee ŋ kur ki kakaan ki ñuusiɗ, siñaar hayiɗ nga ɓa. »

¹⁷ Ini amboh ndeem, Yeesu cammba woytoh ɓooɓa ŋ ini kaɗ ŋ waas Kooh an : « Ɓoƴsohaat pesohaaɗ, Nguuriŋ-Ɗafki reɓiɗ. »

Yeesu ɓeeɗkiɗ ɓi seeɓoh

¹⁸ Wa raakka mbeh, Yeesu tiindeeɗa ŋ sereendaŋ Cookmaŋ-Galile, a hotta seeɓoh kanak mbaaleeɗa cuurund ŋ cookma, ɓa nikee Simong yi na woyse Piyeer na taambɗoh ce Andare.

¹⁹ A woosa ɓa ne : « Ñaakɗaat to, ŋ hey ɗu tume seeɓoh ɓo'. »

²⁰ Ɓa jaarra faɗ mbaal caŋ ɓa ndaam, ɓa ñaakiɗta ɗe.

²¹ A kaɗissa ƴissuut, a hotissa taambɗoh kanak, Saak na Saaŋ, kuɓuuciŋ Sebede, a raak ɓa ŋ gaala na baab ɓa, ɓa haɓiɗtineeɗa mbaal caŋ ɓa. A ɓeeɗukka ɓa ne ɓa hun na ɗe.

²² Ɓa jaarra faɗ gaala na baab ɓa, ɓa ñaakiɗta ɗe.

Yeesu wirɗiɗ kosaayiɗ laayiɗ

²³ Yeesu wileeɗa Galile jen a jangɗoheeɗa ŋ sinaagog ca, a woyeeɗa Yegɗohiŋ Muci, wi kaɗ ŋ Nguuriŋ-Ɗafki, a wirɗeeɗa kosaay ca na ɓeenduk ca jen, ca ambee ɓooɓa.

²⁴ Laamtohiŋ tiikiŋ ɗe willa kur kaŋ Siri jen. A komuusa ɓooɓa raakee miskiɗ jen sagu kosaay ca ambee ɓa, kosaay nu wa min nik ɗah, ɓa jiini ambe, ɓa raakee kombeɗ-mbeɗ na ɓa lafñe, a wiriɗta ɓa.

²⁵ Mboolo laayiɗ ñaakiɗta ɗe, ɓooɓeem pulohee Galile, Dekapool, Yerusalem, Yudee, na ɓaka faahaŋ Yurdan.