Macce 2 - Yegɗohiŋ Muci

Ɓi heɗ haf hayiɗ ñaamke Yeesu

¹ Yeesu raakohu Betlehem ŋ kur kaŋ Yudee ŋ jamanoona Herod nikoh buur. Ɓi heɗ haf kurkohha pulohaaɗ-noh, ɓa hayya Yerusalem.

² Ɓa meeksoheeɗa an : « A nde kuɓki han raaku, yi nikan buuriŋ Yawuut ci ? Ɓoo hotiɗ horiŋ ɗe ŋ pulohaaɗ-noh. Te ɓoo hay ne ɓoo ñaamuk ɗe. »

³ Wa Herod buuri kerah ineem, a feyuusa lool, a yi na ɓi Yerusalem jen.

⁴ A cohɗohha kilifaacaŋ seeƴkiɗoh caŋ waasiŋ Musaa na jangɗohoh caŋ wa jen, a meekissa ɓa ɗiski Mucɗohi Gapohse joy rimohu.

⁵ Ɓa loffa ɗe ne : « A joy raakohu Betlehem ŋ Yudee ŋ ini woosuuɗi fiis wii :

⁶ “ Fu Betlehem ŋ kur kiŋ Yudee, fu ɓaahɗi muk ŋ ci uup ƴissuut ŋ kur ciŋ Yudee sagu pulohi kilifaani pulohan nga ɗa, kilifaani niiɗan cuuɓiŋ ngo Israayel. ” »

⁷ Herod ɓeeɗukka heɗ haf ca, a ɗaayya na ɓa, ne ɓa teeɓ ɗe hooliɗ, jamanooni hora hotkoh.

⁸ A tuuƴca ɓa Betlehem, a woosa ɓa ne : « Kaɗaat ɗu meeksoha kuɓki meeksoh hooliɗ, ɗu hot ɗe ɗah, ɗu woo so, ŋ nam ɗe kaɗ ñaamka. »

⁹ Wa heɗ haf ca sikɗuk buura po ƴutta, ɓa kaɗta. Hora ɓa hotee ŋ pulohaaɗ-noh pulissa, wa nikka ŋ fikiiɓa, wa kaɗeeɗa po wa tiimmba ɗiska kuɓka nik, wa tufukka.

¹⁰ Hora ɓa hotee, ɓa sumeen nga keeh-keeh po ɓa minisɗi.

¹¹ Ɓa aassa ŋ kahna, ɓa hotta kuɓka na Maryaama yaay ɓa ; ɓa ƴekiɗta Yeesu, ɓa ñaamukka Yeesu. Ɓa puliɗta alala ɓa ɓayndohe, ɓa eɗta ɗe urus, cuuraay na miir.

¹² Ƴutta Kooh teeɓpa ɓa ŋ heeƴ ne, ɓa haadee ɗah, ɓa kinaat taamb ŋ Herod. Ɓa kooɗta waas wiiriis, ɓa dokukka kur ɓa.

Suseef na Maryaama saandohiɗ ŋ Misra

¹³ Wa heɗ haf ca coot, malaaka Heɗ ɓoo teeɓukka Suseef ŋ heeƴ, a woosa ɗe ne : « Suseef, Herod hey nakohe kuɓki waaku ne a ap ɗe, mbaa kurka fu ɓay kuɓki na yaay ɓa, fu saandoh Misra, fu nik nga po mbaɗna ŋ woyan na ɗa. »

¹⁴ Suseef kurukka, a ɓayya kuɓka na yaay ɓa ŋ ɗooƴ weka, a kaɗta na ɓa Misra.

¹⁵ Ɓa nikka nga po Herod kaannda. Ŋ ineem, ina Heɗ ɓoo woyee raakka, woo ki a taambɗee ŋ nguɓ woosuuɗ an : « Ŋ ɓeeɗkiɗ kuɓkiŋ ngo ne a pul Misra. »

¹⁶ Wa Herod inah ne heɗ haf ca ñaañoh ɗe ñaañoh, a ayrukka lool. A tuuƴohha ŋ kur kaŋ Betlehem na ina wila ne komaakca ƴaar ca raak kiis kanak ruhussa jen, apsaat. A kindoha ŋ jamanoona heɗ haf ca woyee ɗe.

¹⁷ Wa nikohha ɗaa findi woosuuɗi Yeremi woyohee wa, an :

¹⁸ « Hooso kerhuuɗ ŋ kur ki na woyse Rama, ca fuɗ laayiɗ na rooy keeh-keeh. A Rasel na fuɗe komaakciŋ ɗe, ɓa kaaniɗ, weɗ tah a waaɗɗi giifɗu. »

¹⁹ Ŋ finho kakaan kaŋ Herod, malaaka Heɗ ɓoo teeɓukka Suseef ŋ heeƴ ŋ Misra,

²⁰ a woosa ɗe ne : « Kurka, fu ɓay kuɓki na yaay ɓa, ɗu dokuk Israayel, ɓooɓa waaɗee ɓay kiñin kiŋ ɗe ɓa kaaniɗ. »

²¹ Suseef kurukka, a ɓayya kuɓka na yaay ɓa, a haadda Israayel.

²² Waaye wa a kerah ne e Arkelawus namsiɗ baab ɓa Herod ŋ hafaŋ kur kaŋ Yudee, a neƴƴohha kaɗ nga. Heɗ ɓoo woytohha ɗe ŋ heeƴ, ŋ ineem, a kaɗta Galile,

²³ a gennda nga, ŋ kur ka na woyse Nasareet. Ina woosuuɗ ci woyee raakka, ne Mucɗohi Gapohse ɓeeɗkohsan ƴaariŋ ɓi Nasareet.