Macce 18 - Yegɗohiŋ Muci

Ɓoyi uup ngaŋ Nguuriŋ-Ɗafki

¹ Waam weɗ taalubeeci reɓoh ŋ Yeesu, ɓa meekissa ɗe ne : « Ya ɓa uup ngaŋ Nguuriŋ-Ɗafki ? »

² A ɓeeɗukka komaaki ƴin, a tufkiɗta ɗe ŋ leerooɓa,

³ a woosa ne : « Ñam na woyee ɗu wa te wa keeh, ɗu ɓoƴsohɗi mandohaaɗ po ɗu mand na komaaki ɗah, ɗu aasanɗi ŋ Nguuriŋ-Ɗafki.

⁴ Weɗ tah, yaa nu ruhsiɗ haf ce po haa komaakndii ɗah, a yi uupan ŋ Nguuriŋ-Ɗafki.

⁵ Te yaa nu teyɗuk njaanj findi yii saguuso ɗah, a teyɗuk ko.

⁶ Yaa nu bakaaɗɗukoh yino ŋ komaakci ƴin ci kos so ɓii ɗah, ini hee ngisohe nga ɗe, weɗ ne a toku atoh ɓitiɗ ŋ mbooh, a diigɗu ŋ ɗiska uup nooɗ ŋ cookma.

⁷ Mas adinaani ! In ci na ɓaye ɓo' bakaaɗ laayiɗ ! Te ca minɗi nik raakaaɗi waaye mas ɓoyi na hee ca ɓeke !

⁸ Yaahiŋ ɗa wala kotiŋ ɗa waaɗ ɗa ɓek ŋ bakaaɗ ɗah, nguɗaa ca, fu mbet ca usiɗ ; aas ŋ kipes ki na yaah yino wala kot yino, weɗ ngisoh fu njafu na kot ciŋ ɗa kanak ci wala yaah ciŋ ɗa kanak ci ŋ yongkaaha ƴimanɗi muk.

⁹ Hasiŋ ɗa waaɗ ɗa ɓek ŋ bakaaɗ ɗah, nihsaa, fu mbeta usiɗ ; aas ŋ kipes ki na has yino weɗ ngisoh fu njafu na has ciŋ ɗa kanak ci ŋ yongkaaha yakka.

¹⁰ Kinaat heef ali yino ŋ ɓi ƴissuut cii ! Ee, ñam na woyee ɗu wa, malaakaaci na niiɗee ɓa nik ŋ Eel ci na gene hot jahran Baabiŋ ngo yi nik nga. [

¹¹ ]

Mbaal hotkiɗ

¹² Ɗu liiɓ ye ŋ inii ? Ɓo' raak mbaal teemet (100), yino muuƴ nga ɗah, a faɗanɗi ndaŋkiyaah-yasna-nikiis na yasna-nikiis ci (99) ŋ tangoora a kaɗ waaka yi muuƴ e ?

¹³ Ñam na woyee ɗu wa te wa keeh, a hot ɗe ɗah, sumi a suman nga, weɗ uupan wi a sum ŋ ndaŋkiyaah-yasna-nikiis na yasna-nikiis ci muuƴaaɗiici.

¹⁴ Wa mand ɗaa, Baabiŋ ɗu yi nik ŋ Eel ci waaɗɗi ne ali yino ŋ ɓi ƴin cii muuƴ.

Ɓaah fu bakaaɗ ɗah

¹⁵ Ɓaah fu bakaaɗ [nga ɗa] ɗah, kaɗa nga ɗe kiik fu, fu woo na ɗe. A kerhiɗ ɗa ɗah, fu raakiɗ keeñiŋ ɗe.

¹⁶ A kerhiɗɗi ɗa ɗah, huna na ɓo' yino wala kanak, fu kaɗis nga ɗe. Laam, Fiis ci woo ne : “ Seede kanak wala kaahay raak ɗah, in nu nik miniɗ tufkiɗu. ”

¹⁷ A sang ɓa kerhiɗ ɗah, woyaa ɓooɓiŋ Janguuni. A sang kerhiɗ Janguuni ɗah, ambaa ɗe findi kosaaɗi na juuti'oh.

¹⁸ Ñam na woyee ɗu wa te wa keeh : In nu ɗu sangoh ŋ kehƴi ɗah, wa hey nike ini Kooh sangoh ŋ Eel ci, te in nu ɗu teyɗuk ŋ kehƴi ɗah, wa hey nike ini Kooh teyɗuk ŋ Eel ci.

Hun kiim Kooh

¹⁹ Ñam woyis ɗu wa [te wa keeh] : Ɓo' kanak kerhiɗoh nga ɗu ndii, ŋ kehƴi, ne ɓa kiim Kooh ŋ in nu wa min nik ɗah, Baabiŋ ngo yi nik ŋ Eel ci hey ɓa wa haɓɗiɗe.

²⁰ Laam ɗisik nu kanak mbaa kaahay coh ŋ tiikiŋ ngo ɗah, mi yii ŋ harmban ɓa. »

Ɗaastiɗoh

²¹ Weɗ Piyeer reɓoh ŋ Yeesu, a meekissa ɗe ne : « Kilifaani, ɓaah ho tumee so in ɗah, ŋ joy ɗe ɗaas po waas hend na ? Waas yasna-kanak e ? »

²² Yeesu loffa ɗe ne : « Ŋ wooɗi ɗa waas yasna-kanak rek waaye, waas ndaŋkiyaah-yasna-kanak waas yasna-kanak (70×7).

²³ Laam, Nguuriŋ-Ɗafki mand na inii : A nikee buur, a waaɗta ne dag ciŋ ɗe teeɓ ɗe ini a dengkohee ɓa.

²⁴ Wi a camb, a komuusa dagi joy ɗe wirind saaku hanjar junni-ndaŋkiyaah (10.000).

²⁵ A minɗi ɗe wirind. Ŋ ineem buuri nakohha ne dagi toonsaat findi ñaam a yi na ɓitiice na kuɓuuciŋ ɗe na in ci a raak jen, a wirndohu kombot ciŋ ɗe.

²⁶ Waaye dagi ƴekka ŋ fiki kilifaaniŋ ɗe, a woosa ɗe ne : “ On ndo ƴissuut, ŋ hey ɗa ca wirnde jen ! ”

²⁷ A misikka kilifaani lool, yeem ɗaassa ɗe kombot ki, a faɗta ɗe, a cootta.

²⁸ Wi dagi pul, a cohha na ƴaar ɓaah na ɗe panguk, yi joy ɗe wirind dinaar teemet (100) dong, a ammba ɗe, a ooƴca ɗe ; a woosa ɗe ne : “ Wirind ndo koporiŋ ngo ! ”

²⁹ Ƴaari ƴekka ŋ fikiice kiimeeɗa ɗe an : “ On ndo ƴissuut rek, ŋ hey ɗa wirnde. ”

³⁰ Waaye dagi sannga tic, a taƴca ƴaari ŋ kaso, a sekeeɗa ne a wirind ɗe.

³¹ Dag ci ɓinooɓi hotta ini raak, wa misikka ɓa lool, ɓa kaɗta, ɓa naandsukka kilifaana findi wa raakoh jen.

³² Weɗi kilifaaniŋ ɗe nakoh ɗe ɓeeɗkiɗu, a woosa ɗe ne : “ Fu dag añaandiɗ ! Fu ɗaasnukiɗ to po ŋ ɗaassa ɗa ini fu joyee so wirind jen.

³³ Morom fu joyeen ɗa nam misik findi fu miskohee so. ”

³⁴ Kilifaani ayrukka, a taƴca daga ŋ kaso ne a mbugalu. Daga nikka nga, a sekeeɗa ne a wirind kombot kaŋ ɗe jen. »

³⁵ Yeesu degga nga ne : « Baabiŋ ngo yi ŋ Eel ci tumohan na ɓo' nu nga ɗu ɗaa ne ɗu ɗaasɗi morom ciŋ ɗu na keeñ soosiɗ ɗah. »