Macce 1 - Yegɗohiŋ Muci

Faseehiŋ Yeesu Kiristaa

¹ Cii ceɗ tiik ciŋ caacuuciŋ Yeesu Kiristaa, setiŋ Dawuuda, setiŋ Ibrahiima.

² Ibrahiima a yi rim Isaahha, Isaahha rimmba Yaŋhooɓa, Yaŋhooɓa rimmba Yudaa na taambɗoh ciŋ ɗe.

³ Yudaa rimmba Seerah na Peeres, a rim ɓa na Tamaar. Peeres rimmba Hesroon, Hesroon rimmba Raam.

⁴ Raam rimmba Aminadaab, Aminadaab rimmba Nahson, Nahson rimmba Salmon.

⁵ Salmon rimmba Boos, a rim ɗe na Rahab, Boos rimmba Obed, a rim ɗe na Riit, Obed rimmba Yesay.

⁶ Yesay rimmba Dawuuda buuri, Dawuuda rimmba Suleymaan, a rim ɗe na ɓiti Uri.

⁷ Suleymaan rimmba Robowaam, Robowaam rimmba Abiya, Abiya rimmba Asaf.

⁸ Asaf rimmba Yosafat, Yosafat rimmba Yoram, Yoram rimmba Osiyas

⁹ Osiyas rimmba Yotam, Yotam rimmba Ahas, Ahas rimmba Esekiyaas

¹⁰ Esekiyaas rimmba Manasse, Manasse rimmba Amon, Amon rimmba Yosiyaas

¹¹ Yosiyaas rimmba Yekoñas na taambɗoh ciŋ ɗe ŋ jamanoona Israayel ci toorsee Babilon.

¹² Ŋ finho tooruukaŋ ɓa Babilon, Yekoñas rimmba Salacel, Salacel rimmba Sorobabel

¹³ Sorobabel rimmba Abiyud, Abiyud rimmba Eliyakim, Eliyakim rimmba Asoor

¹⁴ Asoor rimmba Sadok, Sadok rimmba Ahiim, Ahiim rimmba Eliyud

¹⁵ Eliyud rimmba Eleyasaar, Eleyasaar rimmba Mattaan, Mattaan rimmba Yakob,

¹⁶ Yakob rimmba Suseef yi ƴaar Maryaama yi rim Yeesu, Yeesu yi na woyse Mucɗohi Gapohse.

¹⁷ Fu marak ɗah, ca gomal ndaŋkiyaah na gomal nikiis (14) ŋ ini amboh ŋ Ibrahiima po ŋ Dawuuda. Ini nam kooɗoh ŋ Dawuuda po ŋ tooruukaŋ ɓooɓa ŋ Babilon ca gomal ndaŋkiyaah na gomal nikiis (14). Te ŋ tooruukaŋ ɓooɓa ŋ Babilon po ŋ Mucɗohi Gapohse ca gomal ndaŋkiyaah na gomal nikiis (14).

Raakuukaŋ Yeesu

¹⁸ Ŋ ini kaɗ ŋ Yeesu Kiristaa, a raakohu an : Maryaama yi yaay ɓa, a Suseef nguɗee cakiim nga ɗe ; waaye bala a tokan ɗe ɗah, wa nikka ne a rook ŋ tumohaaɗ ciŋ Fuuɗsi Hoolohngaani, Fuuɗsiŋ Kooh.

¹⁹ Suseef yi fiir ce nikee ɓo' yurhiɗ. Ŋ ineem a waaɗɗi ɗe wiñ, a tufukka ne a reehiɗ harmban ɓa, ɓa daka ŋ kehƴi.

²⁰ Wa a na liiɓsiɗohe ŋ ineem, malaaka Heɗ ɓoo teeɓukka ɗe ŋ heeƴ, woosa ɗe ne : « Suseef, setiŋ Dawuuda, kina neƴƴoh ɓay Maryaama ɓitiɓ, laam kuɓki nik ŋ rookiŋ ɗe a puloh ŋ Fuuɗsi Hoolohngaani.

²¹ A hey raake kuɓu ƴaar, teekaa ɗe Yeesu laam a yi na hee mucɗe cuuɓiŋ ɗe ŋ bakaaɗ ciŋ ɓa. »

²² Ineem raakohha ɗaa, ne woo kiŋ Heɗ ɓoo, wi a taambɗee ŋ nguɓ woosuuɗ, raak an :

²³ « Cafƴi inahɗi ƴaar, hey ambe rook ; a raak kuɓu ƴaar, yi teeksan Emanuwel » wi tokis : "Kooh yii na ɓoo".

²⁴ Wa Suseef yunuk, a haɓiɗta ini malaakaaniŋ Heɗ ɓoo nakee ɗe ; a ɓayya Maryaama ɓitiɓ.

²⁵ Waaye a hunɗi na ɗe po findi yeem raakoh kuɓu ƴaar, a teekka ɗe Yeesu.