Maarko 1 - Yegɗohiŋ Muci

Cambohaaniŋ Yegɗohiŋ Muci

¹ Yegɗohiŋ Muci, ŋ ini kaɗ ŋ Yeesu Kiristaa, Kuɓkiŋ Kooh, camboh an :

² Ngaŋ findi wa fiisohu ŋ teerndiŋ woosuuɗi Esayi ne : « Marka, ŋ hey tuuƴe woosuuɗiŋ ngo, a adug ɗa, ne a haɓɗiɗ ɗa waasi. -

³ E hoosoora na leehke ŋ nduufa an : “ Paɗaat waasiŋ Heɗ ɓoo, haɓɗiɗaat ɗe waas ci, ca yurah. ” »

⁴ Ŋ ineem Yahya Ɓoktohi hotukka, a ɓokteeɗa ɓooɓa na masuɓ ŋ nduufa. A inhiɗeeɗa ɓa ne ɓa hayaat ɓa ɓoktuk, wa teeɓoh ne ɓa teyiɗ ɓoƴsoh pesohaaɗ, ɓa min ɗaasu bakaaɗ ciŋ ɓa.

⁵ Ɓooɓa genee Yudee na ɓaŋ Yerusalem jen, kaɗeeɗa nga ɗe. Ɓa teyɗukeeɗa bakaaɗ caŋ ɓa, a ɓokteeɗa ɓa ŋ kalaŋ Yurdan.

⁶ Yahya meeɗ ɓekuk kulɓa haɓɗohuuɗ find ngeelemb, a toka ŋ kinoh kiŋ ɗe na und. A meeɗta ñam paƴ na yeeleel kuum.

⁷ A yegɗoheeɗa an : « Raakiɗ ɓoyi na haye ŋ finhooso, a yi uup po yak, ŋ yeyyooɗi nik ñaamiŋ ɗe ne ŋ hiir ŋ toksiɗee ɗe liiɓ ciŋ ñafaɗ ciŋ ɗe.

⁸ Mi na ɓoktee ɗu na masuɓ waaye a yi, a ɓoktohan ɗu Fuuɗsi Hoolohngaani. »

Ɓoktukaŋ Yeesu

⁹ Ŋ jamanoonaam, Yeesu pulohha kur ka na woyse Nasareet ŋ Galile, Yahya Ɓoktohi ɓokitta ɗe ŋ Yurdan.

¹⁰ Wa Yeesu pulee ŋ masma, a hotta Eel ci faarkiɗ, Fuuɗsi Hoolohngaani, Fuuɗsiŋ Kooh yipkeeɗa nga ɗe ŋ mandohaaɗ banuut.

¹¹ Hooso kurkoh ŋ Eel ci kerhukka an : « A fu Kuɓkiŋ ngo ŋ waaɗ keeh-keeh te ŋ neɓuuɗ nga ɗa lool. »

Seytaani jaɗɗiɗ Yeesu fiir

¹² Jaarra Fuuɗsi Hoolohngaani hiirra Yeesu ŋ kaɗ nduufa.

¹³ A nikka nga neeh ndaŋkiyaah-nikiis (40), Seytaani jaɗɗeeɗa ɗe fiir. A nikee ŋ ɗiska inah ne ca ɗoopaat-nduuf dong nikee nga, malaakaaca taambkoheeɗa ɗe.

Taalubeeci Yeesu koc ɓeeɗuk

¹⁴ Ŋ jamanoona Yahya Ɓoktohi rangohu ŋ kasoona, weɗ Yeesu kaɗoh Galile, a woyeeɗa Yegɗohiŋ Muci, wi puloh ŋ Kooh.

¹⁵ An : « Jamanooni gapsee reyiɗ. Nguuriŋ-Kooh reɓiɗ ! Ɓoƴsohaat pesohaaɗ te ɗu kos Yegɗohiŋ Muci ! »

¹⁶ Wa raakka mbeh, a hunnda na sereendaŋ Cookmaŋ-Galile, a kaɗeeɗa. A hotta seeɓoh kanak mbaaleeɗa cuurund ; ɓa nikee Simong na taambɗoh ce Andare.

¹⁷ A woosa ɓa ne : « Ñaakɗaat to, ŋ hey ɗu tume ɗu nik seeɓoh ɓo'. »

¹⁸ Ɓa jaarra faɗ mbaal caŋ ɓa ndaam, ɓa ñaakiɗta ɗe.

¹⁹ A kaɗissa ƴissuut, a hotta kuɓuuciŋ Sebede ŋ gaal haɓiɗtineeɗa mbaal caŋ ɓa ; ɓa nikee Saak na taambɗoh ce Saaŋ.

²⁰ A jaarra ɓa ɓeeɗuk ne ɓa ñaakiɗ ɗe. Ɓa faɗta baab ɓa Sebede na pangkoh caŋ ɗe ŋ gaala, ɓa ñaakiɗta ɗe.

Yeesu saɓsohiɗ ƴaar na jiinnda ambee ɗe

²¹ Wa taalubeeca ñaakiɗ Yeesu, a hunnda na ɓa kur ka na woyse Kapernawum. Ŋ mbehi na iɗsiɗkohse, a aassa ŋ sinaagoga, a jangɗoheeɗa.

²² Ɓooɓa feyuusa ŋ jangɗohaŋ ɗe. Jangɗohaaɗaŋ ɗe ɗaloheen na findi jangɗohoh caŋ waasiŋ Musaa na tumohe, laam a woyee keeh-keeh findi kilifa.

²³ Teemb ndeem, wa raakeen ƴaar ŋ sinaagoga, a jiini ambee ɗe. A leehkeeɗa ŋ ɗooƴ sinaagoga an :

²⁴ « Yeesu yiŋ Nasareet, waas fu ye nga ɓoo ? Fu hay ne fu yah ɓoo e ? Ŋ inhiɗ ɓoyi fu nikoh, a fu Ɓoyi Hooliɗi Kooh woos. »

²⁵ Yeesu ngassa ɗe an : « Ɗeka te fu pul ngaŋ ƴaari ! »

²⁶ Jiinnda, na hoolaaɗiika a hoolaaɗi, a pulla ngaŋ ƴaara, a ambsohhaa na sesoh na yoondiɗ ɗe keeh-keeh.

²⁷ Ɓooɓa nikee ŋ ɗiska jen feyuusa, tahha po ɓa woyeeɗa ŋ harmban ɓa ne : « Inii min na nikoh ? Wii deey, wa jangɗoh as, wa hun na hatil ! A na woye woo na jiiniici, ca tum ini a woo. »

²⁸ Wa taambohha ndeem, tiikiŋ Yeesu laamtohseeɗa ŋ kur caŋ Galile jen.

Yeesu wirɗiɗ kosaayiɗ laayiɗ

²⁹ Wa Yeesu na taalubeeciŋ ɗe puloh ŋ sinaagoga, Saak na Saaŋ hunee na ɗe, ɓa kaɗta kahan ɓi Simong na Andare.

³⁰ Wa a ree, a raak yaayiŋ ɓiti Simong ŋ fiƴaang, faaniŋ ɗe dohee doh, Yeesu woyuusaa.

³¹ Yeesu reɓpa nga ɗe, a ammba ɗe ŋ yaah, a kurkiɗta ɗe, dohɗaŋ faana saɓsukohha na ɗe po a taambkoheeɗa ɓa.

³² Na niina, wa noha muy, a komuusa kosaayiɗ ca jen, na ɓa jiini ambe.

³³ Ɓi kur ka jen cohha ŋ nguɓu kahna.

³⁴ A wiriɗta ɓo' laayiɗ na kosaay ɗalohiɗ. A nammba aañ jiini laayiɗ, a faɗɗi ca ne ca woo ; ca inhee inah ɓoyi a nikoh weɗ tah.

³⁵ Ŋ ɗooƴ weka, bala Kooh wiisan ɗah, a kurukka, a kaɗta ŋ ɗisik ɗaayiɗ, a kiimeeɗa Kooh nga.

³⁶ Simong na huntoh caŋ ɗe kaɗta ɗe waaka.

³⁷ Wa ɓa hot ɗe, ɓa woosa ɗe ne : « Ɓooɓi jen na waakee ɗa. »

³⁸ Yeesu woosa ɓa ne : « Ɓoo kaɗaat ŋ kur ci cinooci reɓ ndii, ŋ woo Yegɗohiŋ Muci nga, findi ŋ woyoha ŋ ndii ; ineem weɗ tah ho hay. »

³⁹ Ŋ ineem, a kaɗta ŋ ɗisik nu ɗisik ŋ Galile, a yegɗoheeɗaa ngaŋ sinaagog ca, a aañeeɗa jiiniica.

Yeesu wirɗiɗ ƴaara kosaay kaŋ ɗe tahee ɗe nik ɓo' hoolaaɗi

⁴⁰ Yeesu kaɗeeɗa, ƴaar kosaayiɗ kosaay ki na oɓse faan hayya, ƴekka ŋ fikiice, kiimmba ɗe ne : « Fu waaɗa ɗah, fu miniɗ to saɓsoh na kosaay kii po ŋ nik ɓo' hooliɗ. »

⁴¹ A misikka Yeesu lool, Yeesu raɗissa yaah, a degga ɗe wa, a woosa ɗe ne : « Ŋ waaɗiɗa, hoola ! »

⁴² Ŋ ɗiska ɗiska, kosaay ka saɓsukohha na ƴaara, a hoolla.

^43-44 Ƴutta Yeesu woosa ɗe ne a kaɗaat, a dennga ɗe na woo ndengiɗ an : « Wortukaa wa woo ali ɓo', kaɗa fu teeɓa haf fu seeƴkiɗoha, fu haɓiɗ seeƴki waasiŋ Musaa nakoh ne fu hool, wa teeɓoh ne fu wiriɗ. »

⁴⁵ Waaye ƴaara cootta, a woyeeɗaa, tahha po wa yooɓisseeɗi ne Yeesu aas ŋ kur. A nikka ŋ nduufa, ɓooɓa puloheeɗa ɗisik nu ɗisik raakeeɗa ɗe.