Heber ci 3 - Yegɗohiŋ Muci

Yeesu a yi uup yak Musaa

¹ Weɗ tah ɓaah ciŋ ngo, ɗu hoolɗuuɗ wuu Kooh te ɓoo ɓaah ŋ ɓeeɗkohiŋ Eel ci. Kon, markaat ŋ Yeesu, yi nik Woosuuɗi, a nikka Seeƴkiɗohi yakki ŋ waasi ɓoo na woye ne weɗ ɓoo kos.

² A tokɗukeen baahiɗ ŋ pangki Kooh degee ŋ yaah ciŋ ɗe, findi Musaa namee « tokɗukoh ŋ ɗooƴ kahan Kooh [jen] », findi Fiis ci woyoha.

³ Yi taɓah kahni a yi uup kahni. Weɗ tah, Yeesu eɗaah cir na kiyak ki uup wiŋ Musaa.

⁴ Kahan nu taɓahu ɗah, a ɓo' taɓaha waaye a Kooh taɓah in ci jen.

⁵ Mbaa, Musaa « tokɗukeen ŋ ɗooƴ kahan Kooh jen. » Ŋ woo kiŋ Fiis ci weem, a tokɗukee findi yi na pangkiɗe Yi raak kahni, ne a seede ini Kooh hee woye.

⁶ Kiristaa nak, a tokɗukiɗ findi kuɓu ne a adgoh kahan Kooh, te e ɓoo kahneem nik ne ɓoo gen ooluk, wa hun na kaañ, te ɓoo ndamkohe yaakaari ɓoo yaakaar ɗah.

Iɗsiɗki Kooh gapoh

⁷ Weɗi tah, findi Fuuɗsi Hoolohngaani woyoha, ngaŋ Fiis ci Hooliɗ ci, an : « Woti, ɗu kerah hoosooriŋ Kooh ɗah,

⁸ kinaat ndeng haf findi caacuucaŋ ɗu tumohee wa ŋ kehƴa hulanga, mbaɗna ɓa markiskee ɗe, ɓa ndengsiɗkoheeɗa na ɗe.

⁹ An mbaɗi, caacuuciŋ ɗu markiskee so, te raak ɓa hotee ngaŋ tumohaaɗ ciŋ ngo

¹⁰ ini ree kiis ndaŋkiyaah-nikiis (40). Weɗ tah ŋ raakka neɓsaaɗi ŋ ɓooɓaŋ jamanoonaam ; ŋ woosa ne : “ Liiɓohaaɗ ciŋ ɓa na genee ɓa muuƴiɗ te ɓa sangiɗ ne ɓa inhanɗi ini maa seke ne ɓa tuma. ”

¹¹ Sagu ayruki ŋ ayruke, ŋ ginnja ne : “ Ɓa rahsanɗi muk iɗsiɗki ŋ gap ɓa. ” »

¹² Kon ɓaah ciŋ ngo wortukaat po ali ɓo' nga ɗu raakuu keeñ baahaaɗi, wi na koseeɗi po wa kee ɗe ɓeka ŋ eɗ finho Koohi na pese.

¹³ Waaye feeh "woti", wi Fiis ci na woye, wa ɗii nga ɗah, genaat ñaahtiɗoh Kooh-nu-wiis, ne bakaaɗ ñaañohuu ali ɓo' nga ɗu po wa kee ɗe ɓeka keeñ ndengiɗ.

¹⁴ Laam, ɓoo ɓaahiɗ na Mucɗohi Gapohse pangki, nik ne ɓoo risiɗ amb ndengiɗ po ŋ reehtinohaana, oolki ɓoo oolkee ngaŋ camba ɗah.

¹⁵ Fiis ci woyiɗ ne : « Woti ɗu kerah hoosooriŋ Kooh ɗah, kinaat ndeng haf findi caacuucaŋ ɗu tumohee wa mbaɗna ɓa ndengsiɗkohee na ɗe. »

¹⁶ Mbaa e ɓinde kerhee hoosooriŋ Kooh, ɓa ndengsiɗkoheeɗa na ɗe ? Wa hooliɗ ne e ɓooɓa Musaa pulɗohee Misra jen.

¹⁷ Kooh namee raak neɓsaaɗi ŋ ɓinde ini ree kiis ndaŋkiyaah-nikiis (40) ? Wa hooliɗ ne e ɓooɓa bakaaɗee te fiɗaaf caŋ ɓa keennda ŋ kehƴa hulanga.

¹⁸ Te Kooh giñee ne e ɓinde heyɗi rahse iɗsiɗka a gapee ɓa ? Wa hooliɗ ne e ɓooɓa kerhiɗeeɗi ɗe.

¹⁹ Mbaa ɓoo hotiɗ ne ɓa mineeɗi aas sagu kosaaɗi.