Heber ci 1 - Yegɗohiŋ Muci

Kooh woyiɗ taamboh ŋ Kuɓkiŋ ɗe

¹ Ŋ maañiɗ, Kooh taambohee ŋ woosuuɗ ci, a woosa na caac ciŋ ɓoo waas laayiɗ te woyohaaɗ ci ɗalohha.

² Waaye ŋ jamanoociŋ reehɗohaaniŋ adinaani ɓoo nikoh cii, a woyiɗ na ɓoo taamboh ŋ Kuɓkiŋ ɗe. Ŋ camba, adinaani na findi wa na tiindohe jen, a feroha Kuɓkeem. Te a yi a eɗan in ci jen.

³ A yi siñaariŋ yaki Kooh yak, a yi sah ñaamaariŋ ini Kooh nik keeh-keeh. Te a yi raanuk adinaani jen na woo kiŋ ɗe raakiɗ hatili. Wi a tum po ɓooɓi minnda hoolɗu ŋ bakaaɗ ciŋ ɓa, weɗ a kaɗoh ŋ Eel ci, a ɓooffa ŋ ñaahmiŋ Kooh yi buur.

⁴ A uuppa malaakaaci findi tiiki Kooh eɗ ɗe uupoh ciŋ ɓa.

Kuɓki a yi uup malaakaaci

⁵ Laam, ɗu inhiɗ ne, woo ki Kooh woo ŋ ɗooƴ Fiis ci Hooliɗ ci wii : « Woti, ñam Baabiŋ ɗa, a fu Kuɓkiŋ ngo. » a moosɗaa woo ali malaaka. Te a namɗi woyoh ŋ ini kaɗ ŋ ali malaaka ne : « Ŋ hey nike Baab nga ɗe, a nik nga so findi Kuɓu. »

⁶ Te wi a na haytohe Kuɓkiŋ ɗe saawi ŋ Adina, Fiis ci woo ne : « Malaakaaciŋ Kooh jen ƴekɗaat ɗe ! »

⁷ Inii weɗ Fiis ciŋ Kooh woo ŋ ini kaɗ ŋ malaakaaci : « A tum malaakaaci findi puuɗis ; ɓeɗ pangkoh ciŋ ɗe, a tummba ɓa findi jaal yongkaah. »

⁸ Waaye ini Kooh woo Kuɓkiŋ ɗe ŋ Fiis ci weɗi wii : « Eey Kooh, Nguuriŋ ɗa genan gen, te salmaariŋ wa, weɗ wiŋ waasi yurhiɗi.

⁹ Fu teeɓohiɗ ne fu waaɗ in yurhiɗ, fu sang ini nikɗi waas, weɗ tah, eey Kooh, Koohiŋ ɗa tannda ɗa ŋ ɗooƴ huntoh ciŋ ɗa, a diwiɗta ɗa hafiŋ ɗa diw eeñiɗ, wa hunnda na sum. »

¹⁰ Kooh namiɗ woo ŋ Fiis ci ne : « Ngaŋ camba, eey Heɗi, a fu yip kehƴi te a fu haɓiɗ Eel ci na yaah ciŋ ɗa.

¹¹ In ceem jen hey sooƴe waaye fu, fu genan gen. Eel ci na kehƴi jen hey kaane findi kulɓa,

¹² fu lem ca findi palto. Wiiriis as degu findi ɓoyi ɓekkis, waaye fu, fu risan mand findi fu mand ; kipes kiŋ ɗa reehanɗi. »

¹³ Markaat rek ! Ini Kooh woo ŋ Fiis ci wii : « Haya fu ɓoof ŋ ñaahmiŋ ngo, po mbaɗna ŋ folan sangiɗ ciŋ ɗa ŋ kehƴi, fu tum ɓa degoha kot. » A moos woyoh yinde malaaka in mand na weem ?

¹⁴ Malaakaaci, ca jen ca pangkoh ci minɗi hotu haa e ? Ca woosu ne ca ɓaatɗoh ɓi rahsan muci haa e ?