Filemoon 1 - Yegɗohiŋ Muci

Kañɗohi

¹ Mi yii kañiɗ ɗa Filemoon, mi yi Pool, yi ambu ŋ kaso sagu taambiɗ woo kiŋ Kiristaani Yeesu, mi na ɓaah ɓoo Timoote, e ɓoo na fiise kaytii wuu fu, fu yi ɓoo keeñkoh te ɓoo ɓaahha na ɗa pangkiŋ Kooh,

² ɓoo ɓii kañiɗ ɗa fu na Apiyaa ɓaah ɓoo ɓitiɓ, na Arsip yi ɓaah na ɓoo hiñohi ɓoo na hiñohe, na ɓaah ciŋ ɓoo kosiɗ ci na cohe ŋ kahan fu jen.

³ Kooh Baabiŋ ɓoo baahohaat ɗu, a on ɗu jam, Yeesu Kiristaa Heɗi baahohaat ɗu, a on ɗu jam.

Waaɗi na kosiŋ Filemoon

⁴ Mi na gene corkiɗ Koohiŋ ngo, ne ŋ kiimee po ŋ woo tiikiŋ ɗa ɗah.

⁵ Ŋ kerhiɗ kosi fu kos Yeesu Heɗi na waaɗi fu waaɗ ɓo'-Kooh ci jen.

⁶ Mi na kiime Kooh ne kosi ɓoo ɓaah rim in nga ɗa, fu uup inah in ci baahiɗ ci jen, ci ɓoo min tum wuu Kiristaani.

⁷ Laam, ŋ sumiɗ lool ƴaariŋ ngo te heliŋ ngo daliɗ ŋ findi fu na teeɓohe waaɗi fu waaɗ ɓooɓi, fu soosɗiɗ keeñ ciŋ ɓo'-Kooh ci.

Pool kiimiɗ Filemoon ne a teyɗuk Onesim

⁸ Weɗ tah, ini maa hee ɗa woye, ŋ degɗaa ŋ kikilifaaki ŋ eɗu ŋ Kiristaani ne ŋ woo ɗa fu tum ini lah waas,

⁹ waaye ŋ waaɗ ɗa wa kiim sagu waaɗohi nik ŋ harmban ɓoo. E ñam na kiimee ɗa wa, mi yi Pool, ŋ niki ŋ nik yakak, ɓaatta nga ŋ ambi ŋ ambu wii sagu taambiɗ woo kiŋ Kiristaani Yeesu.

¹⁰ Mi na kiimee ɗa wuu Onesim, yi ŋ amb findi kuɓkiŋ ngo yi ŋ raakoh ŋ kasooni.

¹¹ Ɗeɓgaan a raakɗeeɗi ɗa njiriñ, ali nik ne tiikiŋ ɗe tokis njiriñ, waaye ɗiski wa nik a raakɗiɗ ɓoo njiriñ mi na ɗa.

¹² Mi yii wik ɗa ɗe, a yi fu inah ne a usiɗ ŋ keeñiŋ ngo.

¹³ Ŋ waaɗeen ɗe amb ŋ serooso ne a tufkiɗ ɗa ndii a ɓaatɗohee so, fu hot nga mi yii ŋ kasooni sagu Yegɗohiŋ Muci.

¹⁴ Waaye ŋ woyee ŋ haf fo ne ŋ waaɗɗi tum ali in te fu hunɗi nga, ne ini baahiɗi fu tuman nikuu ne fu ɓeku ɓeku nga waaye wa ini fu waaɗoot tum.

¹⁵ Te wa miniɗ nik ne a saɓsohseen na ɗa ƴissuut ne fu wikuu ɗe a nik yiŋ ɗa kotii po faw.

¹⁶ A nikissanɗi findi ñaam dong, waaye a hey uupe ineem, a nikan ɓaahi keeñkohu ; weɗ a nik keeh-keeh nga so, mi yi sah, kon mbaa a uupan nik ineem nga ɗa fu yi heɗ ce, fu yi ɓaah ce ŋ Heɗi !

¹⁷ Kon nik ne fu ambiɗ to findi nawleefu ɗah, teyɗukaa ɗe po mand haa a ñam.

¹⁸ Nik ne a tumiɗ ɗa in yurhaaɗi wala nik ne a raakɗohiɗ ɗa kombot ɗah, ŋ deggiɗ ca.

¹⁹ Mi Pool, mi yii fiis na yaahiŋ ngo ne : Ñam na hee ɗa wa wirnde, mi ŋ haf fo. Ŋ sang ɗa woo rek ne fu ŋ haf fu, fu raakɗohiɗ to kombot ; fu raakɗohiɗ to kipes kiŋ ɗa.

²⁰ Ee, ɓaah ho, raakiɗ to njiriñ sagu Heɗi ɓoo ɓaah, dalɗa heliŋ ngo ŋ Kiristaani.

²¹ Ɗiski mi na fiise kaytii, wa wooriɗ to ne fu hey tume ini ŋ kiim ɗa, ŋ inhiɗ ne fu hey tume ini uup sah ineem.

²² Namaa so kooɗkiɗ daloha ; ŋ ambiɗ yaakaar ne ŋ hey ɗu wikse sagu kiim ciŋ ɗu Kooh.

Askohi

²³ Epafras, yi taƴu na so sagu niki a nik ŋ Kiristaani Yeesu, yii kañiɗ ɗa,

²⁴ a yi na Maarko, na Aristarka, na Demaas na Luk, ɓi ɓaah na so pangki.

²⁵ Yeesu Kiristaa Heɗi baahohaat ɗu.