Camba 8 - Yegɗohiŋ Muci

Ŋiisaŋ masma

¹ Ina masma na raake neeh teemet na neeh ndaŋkiyaah-yatuus (150) ŋ kehƴi jen, Kooh ɗaakkoheen Noohin nof, a yi na ɗoopaat ca nikee na ɗe ŋ gaala. Weɗ a puuɗsoh ŋ kehƴi, masma haawsukeeɗa.

² Wa pulohee ŋ ɗooƴ kehƴi na wa juurkohee ŋ eel ci, ca tufukka ; toɓa seekka.

³ Masma cooteeɗa ƴin ƴin ; ŋ finho neeh teemet na neeh ndaŋkiyaah-yatuus ceem (150), wa haawsukka kotii.

⁴ Mbaɗi, caɓna yasna-kanakɗoh raakee neeh ndaŋkiyaah na neeh yasna-kanak (17) ; gaala gaƴca ŋ tangooca ŋ Ararat.

⁵ Masma uupeeɗa nga haawsuk po ngaŋ mbeha koc ŋ caɓna ndaŋkiyaahɗoh, tangooca hotkeeɗa.

⁶ Wa degga neeh ndaŋkiyaah-nikiis (40), Noohin rangissa palaŋteera a haɓɗiɗee gaala.

⁷ A tuuƴca ngaak-suur ŋ hara, yeem kaɗeeɗa hayeeɗa, po findi masma ŋiisoh.

⁸ Noohin nammba tuuƴ hoɗ ne a inah andi masma ŋiisiɗ.

⁹ Waaye a raakɗi ɗiski a yongan laam kehƴi riifeen na masuɓ, a dokukka. Noohin puliɗta yaah a ammba ɗe, a ɓekka ɗe ŋ ɗooƴ gaala.

¹⁰ A sekissa neeh yasna-kanak, a tuuƴissa hoɗa.

¹¹ Na niina, a hayya na saaf oliiw as ŋ nguɓiŋ ɗe. Noohin inahha kotii ne masma haawsukiɗ ŋ kehƴi.

¹² A ɓaatta sek neeh yasna-kanak a tuuƴissa hoɗa, yeem taalndiɗta, a dokkisɗi nga ɗe.

¹³ Kiis ka Noohin raakoh kiis teemet-yasna-yino na kiis yino (601), ŋ caɓna koc nga, ŋ mbeha adug nga, raak masma reehiɗ ŋ kehƴi. Noohin kunissa gaala, a marakka, a hotta ne kehƴi suyiɗ.

¹⁴ Wa caɓna kanakɗoh raak neeh ndaŋkiyaah-kanak na neeh yasna-kanak (27), raak kehƴi suyiɗ kong,

¹⁵ weɗ Kooh woyoh Noohin ne :

¹⁶ « Pula gaali, fu na ɓitiifu na kuɓuuciŋ ɗa na ɓitiɓ ciŋ ɓa ;

¹⁷ fu puliɗ cuuɓ ciŋ ɗoopaat ci nik na ɗa, ciŋ kahan ci na ciŋ bilaf fi, sel ci na in ci ƴin ƴin ci jen ; ca pasarkohaat, ca nikaat ɓasloh, ca rimaatɗohaat laayiɗ ŋ kehƴi. »

¹⁸ Noohin pulla gaala, na ɓitiice, na kuɓuuciŋ ɗe ƴaar ci, na ɓitiɓ caŋ ɓa.

¹⁹ Ɗoopaat ca jen, na sel ca na in ca ƴin ƴin ca ; ca puleeɗa gaala cuuɓ cuuɓ.

²⁰ Ƴutta, Noohin haɓiɗta seeƴkiɗoha haf ce ŋ Nikiɗi, a ɓayya ŋ ɗoopaat ca hooliɗ ca na ŋ sel ca hooliɗ ca, a hoomiɗta ca nga.

²¹ Wa eeñɗeem ree ŋ Nikiɗi, a neɓuusa nga, a woosa ŋ ɗooƴ ce ne : « Ŋ heyɗi alkisse kehƴi muk sagu ɓo'. Wa keeh ne ŋ kikomaakiikaŋ ɓa, weɗ keeñ ciŋ ɓa na cambohee ɓa hiir ŋ in moɗaaɗi ; ŋ heyɗi ɗumbɗisse in ci na pese ŋ kehƴi muk ŋ findi ŋ tumoha an.

²² Feeh kehƴi wii nga ɗah, in cii kurkohanɗi nga : sok na nguɗ, doh na soos, yuk na reh, noh na wek. »