Camba 7 - Yegɗohiŋ Muci

Masma ɗumbee kehƴi

¹ Wa ineem raak, Nikiɗi woosa Noohin ne : « Aasa ŋ ɗooƴ gaali, fu na ɓi kahan fu laam, ŋ hot ɗa dong yurhiɗ ngaŋ ɓooɓiŋ jamanooniŋ ɗa.

² Ɓayndoha ŋ ɗoopaat ci hooliɗ ci, riɓ yasna-kanak na naar yasna-kanak, na ci hoolaaɗiici, riɓ yino na naar yino,

³ na sel ci, riɓ yasna-kanak na naar yasna-kanak ; ne cuuɓ ciŋ ca min ris ŋ kehƴi.

⁴ Laam, ndii na neeh yasna-kanak, ŋ hey toɓe toɓ yakak, ini ree neeh ndaŋkiyaah-nikiis (40). Ŋ ɗumb in ci ŋ fer na iike ŋ kehƴi jen. »

⁵ Noohin tumohhaa ɗaa, findi Nikiɗi nakohee ɗe wa.

⁶ Wa Noohin raak kiis teemet-yasna-yino (600), weɗ masuɓ riifɗoh kehƴi.

⁷ A aaseen ŋ ɗooƴ gaala, a yi na ɓitiice na kuɓuuciŋ ɗe kaahay ci na ɓitiɓ ciŋ ɓa, ne ɓa muc ŋ masma.

⁸ Ɗoopaat ci hooliɗ ci na ci hoolaaɗiici, sel ci na in ci ƴin ƴin ci na iike ŋ kehƴi jen,

⁹ ca raakeen Noohin ŋ gaala kanak kanak, naar na riɓ, findi Kooh woyohee wa.

¹⁰ Wa neeh ca yasna-kanak ca coot, masma cammba naaf kehƴi.

¹¹ Weɗ kiis ka Noohin raakoh kiis teemet-yasna-yino (600), wa caɓna kanakɗoha raak neeh ndaŋkiyaah na neeh yasna-kanak (17). Mbaɗi, masma laayohngaana nikee ŋ ɗooƴ kehƴi, pookkaa ŋ ɗisik laayiɗ, wa baliɗta. Eel ci rangsukka, ca nameeɗa juur masuɓ ŋ kehƴi.

¹² A toɓeeɗa noha na weka, ini ree neeh ndaŋkiyaah-nikiis (40).

¹³ Mbaɗi, raak Noohin ŋ ɗooƴ gaala, na kuɓuuciŋ ɗe ƴaar ci Sem, Haam na Yaafet, na ɓitiice na ɓitiɓ ciŋ kuɓuuciŋ ɗe.

¹⁴ Ɓa nikka ŋ ɗooƴ gaala na cuuɓ ciŋ ɗoopaat ci jen ; ciŋ bilaf fi na ciŋ kahan ci, in ci ƴin ƴin ci na iike ŋ kehƴi na sel ci.

¹⁵ In ci na iike jen raakka Noohin ŋ gaala kanak kanak,

¹⁶ naar na riɓ, findi Kooh woyohee wa. Ƴutta, Nikiɗi rannga buntaanaŋ gaala.

¹⁷ Toɓa yuurkeeɗa noha na weka ini ree neeh ndaŋkiyaah-nikiis (40). Masma uupeeɗa nga rap po, wa meeɓpa gaala.

¹⁸ Wa ɓaatkeeɗa po, gaala teembeerra ŋ jola.

¹⁹ Wa uupeeɗa nga ɓaatuk po, wa onnda tangooca uupee ɗafuk jen.

²⁰ Masma mirndohha kaɗ po, wa onnda tangooca ini ree saangal yasna-kanak.

²¹ In nu nik ne a iikeen ŋ kehƴi suyɗi ɗah, a kaaniɗ nga ; sel ca, ɗoopaat caŋ kahan ca na caŋ bilaf fa na in ca ƴin ƴin ca iikee ŋ kehƴi jen, kaaniɗ na ɓooɓa.

²² In nu nik ne a heɗ kiñin ŋ kehƴi suyɗi ɗah, a kaaniɗ.

²³ In ca iikee ŋ kehƴi jen ceɗ Nikiɗi ambsoh, a ɗumbiɗta ca ; ɓo', ɗoopaat, in ca ƴin ƴin ca na sel ca. A faɗee Noohin dong na ɓa nikee na ɗe ŋ ɗooƴ gaala.

²⁴ Wa ineem raak, masma rissa oniɗ kehƴi ini ree neeh teemet na neeh ndaŋkiyaah-yatuus (150).