Camba 49 - Yegɗohiŋ Muci

Yaŋhooɓa barke'ɗiɗ kuɓuuciŋ ɗe.

¹ Wa Yaŋhooɓa ƴut barke'iɗ kuɓuuciŋ Yuusufa, a nammba ɓeeɗuk kuɓuuciŋ ɗe, a woosa ɓa ne : « Hayaat, ŋ woo ɗu kimiŋ ɗu.

² Nangɗukohaat, ɗu sikɗuk, ɗu ɓi kuɓuuciŋ Yaŋhooɓa ; sikɗukaat to mi yi Israayel, baab ɗu.

³ Ruben, saawiŋ ngo, a fu teeɓoh ne ŋ ƴaar, raak ko na hatil. A fu uupiɗ taambɗoh ciŋ ɗa cir na hatil.

⁴ Fu mand na masuɓ baliɗ, waaye fu mirndohanɗi adug, fu mbetiɗ ciriŋ ɗa, wa fu sot fiƴaangiŋ baab ɗu.

⁵ Simeyong na Lewi yino. Ɓeɗ na hune ne ɓa tum aƴaarkoha.

⁶ Muk ! Ŋ kanaat hun na ɓa ŋ ini ɓaa waakohe te ŋ waaɗɗi maasoh coh ciŋ ɓa. Ŋ ayrukiŋ ɓa, ɓa apiɗ ɓi ɓo' ; te ŋ ini neɓ ɓa, ɓa nguɗiɗ sir kot naar inoh.

⁷ Wa alku'aat, ayrukohaaɗiŋ ɓa wi hun na hatil weem, na aay-keeñiŋ ɓa wi hunɗi na yeeɓuk. Ŋ hey ɓa paysohe ŋ kahan Yaŋhooɓa ŋ pasaroh ɓa ŋ Israayel.

⁸ Yudaa, a fu taambɗoh ciŋ ɗa ƴeekan te fu hey tahe ɓi sang ɗa hiir. Taambɗoh ciŋ ɗa hey ɗa ƴekɗe.

⁹ Yudaa kuɓkiŋ ngo, fu gaynde cociɗ, gayndeeni puloh ñama doɓ, faanukka, ya ɓa kaañ ɗe kurkiɗ ?

¹⁰ Salmaari na yilfohse, saɓsukohanɗi na yaah ciŋ ɓi kahan Yudaa. Te inhisoha buur kurkanɗi ŋ harmban kot ciŋ ɓa po mbaɗna heɗ wa keeh-keeh hayan. A yi fu inah ne, cuuɓ ci jen hey ɗe kerhiɗe.

¹¹ A hey laaye tas reseñ po, a layee mbaamiŋ ɗe nga ca te cumbri toksan ŋ ci uup baah. A naawohan kulɓaakiŋ ɗe biiñ na lipiŋ ɗe ñif reseñ.

¹² Biiñ laayiɗ hey ruumndiɗe has ciŋ ɗe te miis laayiɗ hey yaanwiɗe sis ciŋ ɗe.

¹³ Sabuloon, a genan sereendiŋ cookmi, ɗiski gaal ci na serse. Ini amboh ndeem po Sidoon, wa ɓaahan ŋ kehƴiŋ ɗe.

¹⁴ Issaakar mbaam ngooŋka, a na ɗasɗuke ŋ ɗisik ne a iɗsiɗuk.

¹⁵ A hotiɗ ne ɗiski a nik baahiɗ iɗsiɗkoha te kur ki neɓiɗ. A ƴuugiɗ ne a sifuk, a yi waɗuk pangki miskiɗiŋ ñaam.

¹⁶ Daan hey raake cuuɓi a adgohan findi cuuɓ ciŋ Israayel cinooci.

¹⁷ Daan mandan na laɓriifi raɗuk ŋ waas, hirñi duluuruk ŋ sero waas ; laɓriif na ɗoɓe panis ŋ kot, ƴaari rap ɗe keen kaƴaarsukiɗ.

¹⁸ Eey, Nikiɗi, ŋ oolkoh ɗa ne fu naaf fo.

¹⁹ Gaad, ɓi ɓo' aƴaarkiɗ ɓeɗ keenan ɗe waaye, a hey ɓa wiindsuke po a ngek ɓa.

²⁰ Aser, kehƴiŋ ɗe hey laaɓe te weɗ eɗohan kañam ci, ci min kaɗ ŋ buur.

²¹ Naftaali, a ngaayi raak haf ce, yi na raake buul moɗiɗ.

²² Yuusufa, a naak kidig rimiɗ ; kidgi paar ŋ sero masuɓ te naak ciŋ wa cootukka ɗingi.

²³ Ɓi weesoh ɓis keeniɗ ɗe, ɓa weessa ɗe, ɓa tummba ɗe sanguuɗ ;

²⁴ Waaye a ris ambiɗ haliini, amb moɗoɗ te yaah ciŋ ɗe neɓiɗ sagu hatiliŋ Koohiŋ Yaŋhooɓa, Kooh yi Niiɗohi, a nammba nik Atoh fiŋ Israayel.

²⁵ Koohiŋ baab ɗu hirpaat ɗa, Koohi Min barke'ɗaat ɗa, a on ɗa toɓi na pulohe ɗafki, na masmi na pulohe ŋ kehƴi, a on ɗa, ɓitiɓ ci na ɗoopaat ci nik ɓasloh.

²⁶ Barkeeniŋ baab ɗu weɗi uup in ci baahiɗ ciŋ tangooci ɗeɓgaan ; wa cootkiɗ raak-raak ciŋ tangooci maañohngaan ci. Barkeeneem ruhsaat nga ɗa Yuusufa, fu yi kilifaaniŋ taambɗoh ciŋ ɗa.

²⁷ Benyaamin a ɓaakoɓ saahiɗ, a na ɓaaɓe ñam ini a ap, niin reesa ɗah, a paysoh ini tas. »

²⁸ Woo ceem ceɗ baab ɓa barke'ɗoh ɓa, yaa nu nga ɗah, a eɗta ɗa wa hun na ɗa. Ɓeem, ɓeɗ fer cuuɓ ci ndaŋkiyaah na kanak (12) ciŋ Israayel.

Yaŋhooɓa kurkiɗ nga.

²⁹ Wa a ƴut barke'iɗ kuɓuuciŋ ɗe, Yaŋhooɓa woosa ɓa ne : « Haadiŋ ngo Jaanim usisɗi, ŋ kuruk nga ɗah, uumbaat to ŋ sero caacuuciŋ ngo, ŋ huraŋ atoh fa nik ŋ ɗooƴ yohon Efron yi ɓaahee ŋ cuuɓiŋ Hit ci,

³⁰ ngaŋ Makpela ŋ sero Mamre, ŋ kur kaŋ Kanaan. Yohneem weɗi Ibrahiima romee ŋ Efron ne a tuma ruy-ruy caŋ ɗe.

³¹ A uumbu nga na ɓitiice Saarata, Isaahha nam uumbu nga na ɓitiice Rebeka te ŋ namis uumb Leya nga.

³² Yohna na huraŋ atoh fa nik nga romohu ŋ cuuɓiŋ Hit ci. »

³³ Wa Yaŋhooɓa ƴut nak kuɓuuciŋ ɗe in ceem, a faankissa, weɗ a nguɗoh, a haadda Jaanim.