Camba 48 - Yegɗohiŋ Muci

Yaŋhooɓa barke'ɗiɗ kuɓuuciŋ Yuusufa

¹ Wa in ceem coot, ɓa woosa Yuusufa ne baab ɓa kosaayiɗ. A kaɗta nga na kuɓuuciŋ ɗe kanak ci Manasse na Efrayim.

² Yaŋhooɓa woyuusa ne kuɓkiŋ ɗe Yuusufa hayiɗ ɗe marke, a ndengɗukka po a ɓooffa ŋ ɗafuk fiƴaangiŋ ɗe.

³ A woosa Yuusufa ne : « Koohi Min teeɓkeen ndo ŋ Luus ŋ kur kaŋ Kanaan, a barke'iɗta so.

⁴ A woosa so ne : “ Ŋ hey ɗa tume ɓasil po fu nik caaciŋ ɓi cuuɓi cuuɓ te ŋ hey one ɓi na hee rimkohe nga ɗa kur kii, ɓa raakoota po faw. ”

⁵ Ɗiski wa nik ndii, kuɓuuciŋ ɗa kanak ci fu raakoh ŋ Misra bala ŋ hayan ɗah, ɓa na hee nike ɓiŋ ngo ; Manasse na Efrayim nikan kuɓuuciŋ ngo findi Ruben na Simeyong.

⁶ Waaye ɓi fu na hee raakisse, ɓa na hee nike ɓiŋ ɗa, ɓa laman ngaŋ waɗiŋ yakak ciŋ ɓa.

⁷ Wa ŋ puloh Paddan-Aram, Rasel kaannda, kaan miskohiɗ ŋ kur kaŋ Kanaan ; a yaa ŋ uummba ndaam, ŋ sereendaŋ waasa bala fu reyan Efraata ɗah. » Efraata, weɗ nam teeku Betlehem.

⁸ Weɗi Israayel hotoh komaakciŋ Yuusufa a meeksohha ne : « E ɓinde ɓii ? »

⁹ Yuusufa loffa ɗe ne : « E kuɓuuci Kooh onoh ho ndii. » A woosa ɗe ne : « Reɓɗaa ɓa ndii, ŋ barke'iɗ ɓa. »

¹⁰ Wa raak Israayel yaɓko'iɗ po has ciŋ ɗe neɓisɗi. Yuusufa reɓiɗta komaakca nga ɗe, a morgiɗukka ɓa.

¹¹ A woosa Yuusufa ne : « Ŋ liiɓeeɗi ne ŋ hey ɗa hotisse, waaye fu hot nga, Kooh teeɓiɗ to sah kuɓuuciŋ ɗa. »

¹² Yuusufa kurkiɗohha ɓa ŋ kot ciŋ baab ɓa, a ƴekka po pukiŋ ɗe reesa kehƴi.

¹³ Ƴutta, a ammba Efrayim ŋ yaahiŋ ɗe ñaahmi, yeem lahha baab ɓa Israayel yaah-sing, a ammba Manasse ŋ yaahiŋ ɗe singi, yeem nammba lah Israayel ŋ ñaahmiŋ ɗe ; a reɓiɗta ɓa ŋ baab-caaciŋ ɓa.

¹⁴ Waaye Israayel sufɗohha yaah ciŋ ɗe, a degga wi ñaahmi ŋ hafiŋ Efrayim yi nikee ƴini ; a degga wi singi ŋ hafiŋ Manasse na ina a nikee saawa jen.

¹⁵ A barke'iɗta Yuusufa an : « Mi yii kiim Kooh yi Ibrahiima na Isaahha ñaakɗe ŋ kipes kiŋ ɓa jen, Kooh yi na niiɗee so ina ŋ nikoh po wii,

¹⁶ malaakaani muciɗ to ŋ siɓin nu nik, a barke'ɗaat komaakcii, po tiikiŋ ngo na ciŋ paamuuciŋ ngo Ibrahiima na Isaahha kerhu saguuɓa ; ɓa rimaatɗohaat laayiɗ ŋ kehƴi jen. »

¹⁷ Wa Yuusufa hot ne baab ɓa deg yaahiŋ ɗe ñaahmi ŋ hafiŋ Efrayim, a neɓuuɗi ; a ammba yaahiŋ baab ɓa ne a yongisa ŋ hafiŋ Manasse,

¹⁸ a woosa baab ɓa ne : « Wa ɗaa haa baab, yii a yi saawi, dega yaahiŋ ɗa ñaahmi ŋ hafiŋ ɗe kay ! »

¹⁹ Waaye baab ɓa sannga, a woosa Yuusufa ne : « Kuɓkiŋ ngo, ineem ŋ inhiɗa, ŋ inhiɗa baahiɗ. Manasse hey name raak cuuɓ angiɗ, waaye a taambɗoh ce na hee ɗe uupe, ɓi cuuɓi cuuɓ hey pulohe nga ɓi na hee rimkohe ŋ Efrayim. »

²⁰ Mbaɗi, Yaŋhooɓa barke'iɗta ɓa, a woosa ne : « Israayel ci hey kiimohe barke ŋ tiik ciŋ ɗu an : Kooh barke'ɗaat ɗa findi a barke'ɗoh Efrayim na Manasse. » Yaŋhooɓa adgiɗoh Efrayim ɗaa, a degga Manasse nga.

²¹ Wa a ƴut, a woosa Yuusufa ne : « Kakaan kiŋ ngo usisɗi, waaye Kooh hey rise na ɗu te a hey ɗu dokne ŋ kur kaŋ caacuuciŋ ɗu.

²² Ŋ hey ɗa waɗe ini uup wiŋ taambɗoh ciŋ ɗa, ɓaya Sisem, kur ki ŋ naaf na ndangiŋ ngo na ɓis ciŋ ngo ngaŋ cuuɓiŋ Amoor ci. »