Camba 42 - Yegɗohiŋ Muci

Yaŋhooɓa woosiɗ kuɓuuciŋ ɗe Misra

¹ Wa Yaŋhooɓa kerah ne Misra raakiɗ bele, a woosa kuɓuuciŋ ɗe ne : « Ɗu ɓoof ye ?

² Ŋ kerhiɗ ne bele raakiɗ ŋ Misra, kaɗaat ɗu roma nga, ɓoo raak pesoha, ɓoo kaanuu ŋ aɗi. »

³ Taambɗoh ndaŋkiyaah ŋ ɓaŋ Yuusufa kaɗta roma bele ŋ Misra.

⁴ Waaye Yaŋhooɓa faɗeeɗi Benyaamin, yi ɓaah na Yuusufa yaay na baab, ne a kaɗ na ɓa, a neƴƴohee ne in rahas ɗe.

⁵ Wa kuɓuuciŋ Israayel aasee Misra, ɓa huntiɗkohee na ɓi romoh wiiriis, laam a kur kaŋ Kanaan jen nikee ŋ aɗ.

⁶ Waam raak a Yuusufa a yi adgohee kur ka na toonaŋ beleena. Taambɗoh ciŋ ɗe reesa nga ɗe, ɓa ƴekiɗta ɗe po puk ciŋ ɓa reesa kehƴi.

⁷ Wa Yuusufa hot ɓa, a inhissa ɓa, waaye a mannda na ɓoyi inahɗi ɓa, a ngassa ɓa an : « Ɗu puloh nde ? » Ɓa loffa ɗe ne : « Ɓoo puloh Kanaan, ɓoo waaɗ rom pesoha. »

⁸ Nikka ne Yuusufa inhisiɗ taambɗoh ciŋ ɗe, waaye, ɓa inhisɗi ɗe.

⁹ A naandsukka heeƴ ca a heeƴee ŋ ini kaɗ nga ɓa. A woosa ɓa ne : « Ɗu espiyoŋ, ɗu hay ne ɗu marak ɗiski ɗu min taamb po ɗu saah kur ki. »

¹⁰ Ɓa woosa ɗe ne : « Muk kilifaani, ɓoo hay ne ɓoo rom pesoha dong.

¹¹ Te ɓoo jen e ɓoo ɓaah baab yino, ɓoo ɓo' yurhiɗ kilifaani, ɓoo espiyoŋ haa. »

¹² Yuusufa woosa ɓa ne : « Ineem keeh haa, ɗu hay ne ɗu marak ɗiski ɗu min taamb po ɗu saah kur ki. »

¹³ Ɓa loffa ɗe ne : « Kilifaani, e ɓoo jen ɓaah baab yino, ɓoo gen Kanaan ; ɓoo nikee ndaŋkiyaah na kanak (12), yinoora sooƴiɗ, ya uup ƴin yaa tassa na baabiŋ ɓoo. »

¹⁴ Yuusufa woosa ɓa ne : « Ini ŋ woo ɗu weɗ raak, ɗu espiyoŋ,

¹⁵ waaye ŋ hey marke ndah ɗu woo keeh ; ŋ giñiɗ ŋ Firawnaani ne ɗu heyɗi kurke ndii feeh taambɗoh ɗu yi uup ƴin hayɗi ndii ɗah.

¹⁶ Woosaat ɓo' yino nga ɗu, a kaɗ ɗe ɓaya, ɓi tas nikohaah ŋ kasooni po ŋ marak ndah ɗu woo keeh ; wa nikɗi ɗah, ŋ giñiɗ ŋ Firawnaani ne ɗu espiyoŋ. »

¹⁷ Ƴutta, Yuusufa rangoh ɓa neeh kaahay ŋ kasoona.

¹⁸ Ngaŋ neeha kaahayɗoh, a woosa ɓa ne : « Ɗu hun ŋ ini maa hee ɗu woye ɗah, ɗu hey muce, laam ŋ nupiɗ Kooh.

¹⁹ Nik ne ɗu ɓo' yurhiɗ ɗah, yino nga ɗu tasaat ŋ kasooni, ɓi tas kom ɓi kahan ɗu bele, ɓeɗ ɓa nik ŋ aɗ.

²⁰ Ƴut ɗah, komaat to taambɗoh ɗu yi ƴini, ŋ hey inhe ne ɗu woo keeh, ɗu min muc ngaŋ kakaan. » Ɓa teyɗukka ineem.

²¹ Ɓa woyeeɗa ŋ harmban ɓa an : « Cey ! A ini ɓoo tum taambɗoh ɓoo weɗ hay nga ɓoo, laam, wa a nik ŋ miskiɗ, a nakeeɗa ɓoo yirmu, ɓoo hotee nga te ɓoo sikɗukɗi ɗe. Ineem weɗ tah woti, ɓoo nammba nik ŋ miskiɗ. »

²² Ruben degga nga ne : « Ŋ woyeen ɗu ne ɓoo kanaat tum njaanji in, waaye ɗu sikɗukɗi so, weɗ tah, ɓoo deguuɗ miskiɗ woti sagu kiñin kiŋ ɗe ɓoo ɓay. »

²³ Ɓa liiɓee ne Yuusufa kerahɗi in ci ɓa woye, laam wa ɓa woyee na ɗe, a ƴaar a yi toksiɗee ɓa ;

²⁴ Yuusufa eɗta ɓa finho, a usɗukka ɓa, a fuɗeeɗa. Wa Yuusufa fuɗ po ƴutta, a dokkissa woya na ɓa, a ɓayya Simeyong a tokka ɗe ŋ fikiiɓa.

²⁵ A nakohha ne saakuucaŋ ɓa soɗu bele po ca riif, ɓa tumɗu haalis caŋ ɓa nga, ɓa nam onu ñamaah ŋ waas ; ineem tumuusa.

²⁶ Ƴutta taambɗoh caŋ ɗe siffa ca ŋ mbaam caŋ ɓa, ɓa cooteeɗa.

²⁷ Ɓeɗ kaɗoh kaɗoh po ɓa tufukka ŋ ɗisik ne ɓa neeh nga, raak weka aasiɗ ; yino nga ɓa rangissa saakndaŋ ɗe ne a on mbaamaŋ ɗe ñamaah, a hotta haalsa a romohee ɓekuuɗ nga, ŋ nguɓaŋ wa, a feyuusa.

²⁸ A woosa ɓinooɓa ne : « Hee ! Ŋ doknuuɗ haalsiŋ ngo, weɗi wii, ŋ ɗooƴ saakndiŋ ngo. » Ɓa tiitta po ɓa saakɗoheeɗa, ɓa woyeeɗa ŋ harmban ɓa an : « Kooh tum ɓoo ye an ? »

²⁹ Wa ɓa ree Kanaan ɗiskaŋ baab ɓa, ɓa naandsukka ɗe in ca rahas ɓa jen.

³⁰ Ɓa woosa ɗe ne : « Ƴaara adgoh kur ka ngasee ngas ɓoo ; a amb ne ɓoo espiyoŋ.

³¹ Ɓoo lofiɗ ɗe ne ɓoo ɓo' yurhiɗ, ɓoo espiyoŋ haa.

³² E ɓoo jen ɓaah baab yino, ɓoo nikee ndaŋkiyaah na kanak (12), yinoora sooƴiɗ, ya uup ƴin yaa tassa na baabiŋ ɓoo ŋ Kanaan.

³³ Ƴaara loffa ɓoo ne a min inhoh ne ɓoo ɓo' yurhiɗ an : Ɓoo na hee faɗe ɓo' yino, a tas ndaam te ɓoo kom ɓi kahan ɓoo pesoha, ɓeɗ ɓi nik ŋ aɗ.

³⁴ Ƴut ɗah, ɓoo kom ɗe taambɗoh ɓoo yi uup ƴin, ineem weɗ na hee ɗe teeɓe ne ɓoo ɓo' yurhiɗ, ɓoo espiyoŋ haa. Ŋ ineem, a faɗis taambɗoh ɓoo, te ɓoo hey mine wil ŋ kur ka. »

³⁵ Wa ɓa yiif saakuucaŋ ɓa, yaa nu nga hotta nafaanaŋ haalsa fu ɓayee ŋ saakndaŋ ɗa, ɓeɗ na baab ɓa jen ɓa jaahiɗta.

³⁶ A yi Yaŋhooɓa a woosa ɓa ne : « Ɗu ɓii reehiɗ kuɓuuciŋ ngo. Yuusufa na Simeyong sooƴiɗ, ɗu waaɗis ɓay Benyaamin, in ceem jen ŋ ɗafuk ko ! »

³⁷ Ruben woosa ɗe ne : « Baab, degga Benyaamin ŋ yaah ciŋ ngo, ŋ hey ɗa ɗe wike, wa nikɗi ɗah, fu ap kuɓuuciŋ ngo kanak ci. »

³⁸ Yaŋhooɓa loffa ne : « Muk, ŋ heyɗi faɗe kuɓkiŋ ngo a kaɗ na ɗu. Yakak ce kaaniɗ, a yi dong ŋ tasiɗ, in rahas ɗe ŋ waas ɗah, ŋ kiyaɓkookiŋ ngo wii, ŋ haadan Jaanim na aay-keeñ saguuɗu. »