Camba 39 - Yegɗohiŋ Muci

Yuusufa ŋ kahan Potifaar

¹ Ŋ ini kaɗ ŋ Yuusufa, wa Ismaayla-Ismaaylaaca ree na Yuusufa Misra, ɓa toon ɗe Potifaar ; a yi daga adgohee ƴaaɓa niiɗe kahan Firawnaana.

² Nikiɗi huneen na Yuusufa te in nu a haɓɗeen ɗah, wa baah ; a nikka ŋ kahan kilifaanaŋ ɗe Potifaar.

³ Kilifaanaŋ ɗe hotta ne Nikiɗi huniɗ na Yuusufa te in nu a haɓiɗ ɗah, Nikiɗi baahiɗa.

⁴ Kilifaanaŋ ɗe baahohha ɗe, a degga ɗe ŋ serooce, Yuusufa adgohha kahan ce na raak-raakaŋ ɗe jen.

⁵ Wa Potifaar haɓiɗ ineem, Nikiɗi barke'iɗta kahan ce, in ca nikee nga na ca ŋ yohon caŋ ɗe jen, sagu Yuusufa.

⁶ Wa tahha po Potifaar faɗta in caŋ kahan ce jen ŋ yaah Yuusufa ; a taambkohisseeɗi ali in, nikɗi kañam kaŋ ɗe ɗah. Yuusufa nikee moɗoh fiir.

Yuusufa na ɓiti Potifaar

⁷ Kaɗta po, ɓiti kilifaanaŋ ɗe hememmba ɗe, a woosa ɗe ne : « Haya fu faanuk na so ! »

⁸ Yuusufa sannga, a woosa ɗe ne : « Fu hot nga, kilifaaniŋ ngo oolkiɗ to po a haɓɗisɗi tus ŋ kahni, a faɗiɗ in ciŋ ɗe jen ŋ yaah ciŋ ngo.

⁹ A mi na ɗe hend ŋ kahni ; a sangiɗɗi so tus nikɗi fu ɗah, laam fu ɓitiice ; mbaa ŋ min na tumoh ini moɗaaɗiineem, ŋ tooñ Kooh ? »

¹⁰ A gennda gen ñaakiɗ Yuusufa na ineem, waaye tahɗi po a teyɗukka faanuk na ɗe.

¹¹ Wa raakka mbeh, Yuusufa aassa ŋ kahna ne a panguk, raak surgaaca nikeeɗi ŋ ɗiska ;

¹² ɓiti Potifaar ammba ɗe ŋ kulɓa, a woosa ɗe ne : « Haya ɓoo faanuk ! » Yuusufa nookukka, kulɓaaka tassa ŋ yaah caŋ ɗe ; Yuusufa saandohha ŋ hara.

¹³ Ɓitɓa inahha ne Yuusufa saandohiɗ te a faɗiɗ ɗe na kulɓaaka ŋ yaah caŋ ɗe,

¹⁴ a ɓeeɗukka surgaaca, a woosa ɓa ne : « Markaat ! Ɓoo komu kuɓu Heber ne a ɓasɗuk ɓoo ; a hayiɗ nga so ne a faanuk na so waaye ŋ leehukka ŋ ɗafka.

¹⁵ Wi ŋ leehuk, a saandohha, a faɗta kulɓaakiŋ ɗe ndii. »

¹⁶ A ɗaakka kulɓaakaŋ Yuusufa, a sekeeɗa hayiŋ ƴaar ce.

¹⁷ Wa ƴaar ce hay, a naandsukohha ɗe wa ɗaa, a woosa ɗe ne : « Ñaami Heberi fu ɓayiɗ ɓoo, a hayiɗ nga so ne a kelsukoh ho,

¹⁸ ŋ leehukka ŋ ɗafka, a saandohha, a faɗta kulɓaakiŋ ɗe ndii. »

¹⁹ Wa Potifaar kerah ina ɓitiice naandsuk ɗe ne weɗ Yuusufa haɓiɗ, a ayrukka.

²⁰ A ambɗukka Yuusufa ne a taƴ ɗe ŋ kasoona ɓi kahan Firawnaana na ɗaakohse. Yuusufa nikka nga.

Yuusufa ŋ kasoona

²¹ Nikiɗi huneen na Yuusufa, a tummba po ƴaara adgohee kasoona baahohha ɗe.

²² Ƴaara faɗta ɓooɓa ambsee jen ŋ yaah Yuusufa, a adgohha pangkaŋ ɓa jen.

²³ Ƴaara haɓɗisɗi ali in ŋ ina a nakee ɗe laam, a hoteen ne Nikiɗi huneen na Yuusufa te in nu a haɓiɗ ɗah, Nikiɗi baahiɗa.