Camba 37 - Yegɗohiŋ Muci

Heeƴ ciŋ Yuusufa

¹ Ŋ ini kaɗ ŋ Yaŋhooɓa, a nikee ŋ Kanaan ŋ kur ka baab ɓa genohaahe.

² Inii weɗ naandsuku ŋ Yaŋhooɓa na kahan ce. Wa kuɓkiŋ ɗe Yuusufa raak kiis ndaŋkiyaah na kiis yasna-kanak (17), a meeɗee hun na taambɗoh ciŋ ɗe, ɓa niiɗee mbaal ca na pe' caŋ baab ɓa. A nikee komaaki, a meeɗta hun na kuɓuuciŋ Bilha na ɓiŋ Silpa, ɓitiɓ ciŋ baab ɓa. Taambɗoh ciŋ ɗe tummba in moɗaaɗi ɗah, a woo baab ɓa wa.

³ Israayel raakee ɗe ŋ kiyaɓkookaŋ ɗe, tahha po a yi a uupee waaɗ ŋ kuɓuuciŋ ɗe jen. A haɓɗiɗta ɗe kulɓa moɗoh na moɗoh.

⁴ Taambɗoh ciŋ ɗe hotta ne baab ɓa uupee ɗe waaɗ, weɗi tahee ɓa sang ɗe po, ɓa mineeɗi woo na ɗe sah, woo moɗoɗ.

⁵ Wa kaɗeeɗa po, Yuusufa heeƴca, a naandsukka taambɗoh ciŋ ɗe wa, ɓa uuppa ɗe nga sang.

⁶ A woo ɓa ne : « Sikɗukaat ini ŋ heeƴ.

⁷ An ɓoo nikee ŋ yohon ca, ɓoo tokeeɗa bele, ɗekka po ɗufiŋ ngo tufukka, ciŋ ɗu willaa, ca ƴekɗeeɗaa. »

⁸ Taambɗoh ciŋ ɗe woosa ɗe ne : « Fu waaɗ woo ne a fu na hee nike buuriŋ ɓoo e ? Fu yilif ɓoo e ? » Tahha po ɓa uuppa ɗe sang, sagu heeƴ caŋ ɗe na in ca a woyee nga.

⁹ Wa Yuusufa heeƴis, a naandsukissaa taambɗoh ciŋ ɗe an : « Hee ! Ŋ heeƴissiɗ nohi na caɓni na hor ndaŋkiyaah na yino ƴekɗeeɗa so. »

¹⁰ A nammbaa naandsuk baab ɓa, yeem ngassa ɗe an : « Fu heeƴ ye weem ? Fu liiɓiɗ ne mi na yaay ɗu na taambɗoh ciŋ ɗa, ɓoo hey ɗa ƴekɗe e ? »

¹¹ Taambɗoh ciŋ Yuusufa ayrukka ɗe, Yaŋhooɓa ɗaakohha heeƴ ceem nof.

Taambɗoh ciŋ Yuusufa tooniɗ ɗe

¹² Wa raakeen jamano, taambɗoh ciŋ Yuusufa kaɗta mangaana na gataŋ baab ɓa ŋ ɓak kur ka na woyse Sisem.

^13-14 Mbeh, Israayel woosa kuɓkiŋ ɗe Yuusufa ne : « Haya ŋ woos ɗa, fu marka taambɗoh ciŋ ɗa ŋ Sisem, ndah ɓa ɗaa ŋ jam na ɗoopaat ca. In nu raak nga ɗah, fu woo so. » Yuusufa woosa ɗe ne : « Ee. » A tuuƴca Yuusufa, yeem pulohha Oonaŋ-Hebron, a rappa ŋ ɓak Sisem.

¹⁵ Ƴaar cohha na ɗe wiltiɗoheeɗa ŋ bilaf fa, a meekissa ɗe ne : « Fu na waake ye ? »

¹⁶ Yuusufa woosa ɗe ne : « Mi na marke taambɗoh ciŋ ngo, fu miniɗ to woo ɗiski ɓa na niiɗohe e ? »

¹⁷ Ƴaara loffa ɗe ne : « Ɓa kurkiɗ ndii, ŋ kerhiɗ ɓa woyeeɗa ne ɓaa kee Dotan. » Yuusufa kaɗta ɓa raaka ŋ Dotan.

¹⁸ Wa taambɗoh ciŋ ɗe ƴok ɗe hayeeɗa, bala a reyan nga ɓa ɗah, ɓa waakohha ɗe ap.

¹⁹ Ɓa woytiɗohha ŋ harmban ɓa ne : « Heɗ heeƴ ci a yoon na haye.

²⁰ Ɓoo apaat ɗe, ɓoo ɓek ɗe ŋ ngurtut. Hey ɗah, ɓoo woo ne a ɗoopaat saahiɗ ap ɗe ; ɓoo marak findi heeƴ ciŋ ɗe na hee mirndohe. »

²¹ Wa Ruben kerah ineem, a waaɗta muciɗ Yuusufa, a woosa ɓa ne : « Ɓoo kanaat ɗe ap. »

²² A degga nga ne : « Kanaat aam ñif, ɓekaat ɗe ŋ ngurtuta ŋ bilaf fa ween, yaah ciŋ ɓoo degkuu ɗe. » A woosa ɓa ineem ne a min ɗe muciɗ po a wik ɗe baab ɓa.

²³ Wa Yuusufa ree, ɓa ammba ɗe, ɓa wolissa kulɓaakaŋ ɗe moɗohngaana,

²⁴ ɓa njaffa ɗe ŋ ɗooƴ ngurtuta.

²⁵ Ƴutta ɓa ɓooffa ne ɓa ñam. Ɗekka po ɓa hotta Ismaayla-Ismaaylaaca huniɗ, pulohiɗ Galaad na ngeelemb caŋ ɓa sifiɗ ɓi toon findi cuuraay, daakaande na diw faan, ɓa kaɗeeɗa Misra.

²⁶ Yudaa woosa taambɗoh ciŋ ɗe ne : « Wa raakiɗ ɓoo winde etoh, ɓoo ap taambɗoh ɓoo po ƴut, ɓoo ɗasɗohee wa ?

²⁷ Ismaayla-Ismaaylaaca ɓeɗɗeen na haye, ɓoo toonaat ɓa ɗe, ɓoo apuu ɗe laam, e ɓoo ɓaah ñif, a taambɗoh ɓoo. » Ɓa hunnda nga.

²⁸ Wa toonoh ca ree, tel ɓa puloh kur ka na woyse Majaan, ɓa puliɗta Yuusufa ŋ ngurtuta, ɓa toonohha ɓa ɗe ƴel haalis ndaŋkiyaah-kanak (20) ; Ismaayla-Ismaaylaaca cootta na ɗe Misra.

²⁹ Wa Ruben wiiruk ngurtuta, a hotta ne Yuusufa nikisɗi nga, keeñaŋ ɗe reehha, a faarra kulɓaacaŋ ɗe.

³⁰ A kaɗta ŋ taambɗoh ciŋ ɗe, a woosa ɓa ne : « Cooy, Yuusufa nikisɗi ndaam ! Ŋ tuman na ? »

³¹ Ɓa hoossa suket, ɓa tahha'iɗta kulɓaakaŋ Yuusufa na ñif ma.

³² Ƴutta ɓa kommba baab ɓa wa, ɓa woosa ɗe ne : « Inii, ɓoo paraha parah, wa kulɓaakiŋ kuɓkiŋ ɗa haa e ? »

³³ Yaŋhooɓa inhissaa, a woosa ne : « Marka ! A ɗoopaat saahiɗ sifiñsoh ɗe, cooy, Yuusufa sifiñsohuuɗ ! »

³⁴ Wa Yaŋhooɓa inhis kulɓaaka, weɗi a faaroh kulɓaacaŋ ɗe, a ɓekukka daah, a ruyiɗta kuɓkiŋ ɗe neeh laayiɗ.

³⁵ Kuɓuuciŋ ɗe jen, ƴaar na ɓitiɓ giifɗeeɗa ɗe, waaye a sannga, a woosa ne : « Ŋ nikan ŋ ruy po mbaɗna maa hee ɗe raake ŋ Jaanim. » A taalndiɗta, a fuɗeeɗa kuɓkiŋ ɗe.

³⁶ Ŋ ini kaɗ ŋ Majaan-Majaan ca ɓayee Yuusufa Misra, ɓa toon ɗe Potifaar, ƴaara adgohee dag caŋ Firawnaana.