Camba 33 - Yegɗohiŋ Muci

Cohaŋ Esaaw na Yaŋhooɓa

¹ Wa Yaŋhooɓa puloh Peni'eel, ɗekka po a hotta Esaaw hayeeɗa na ƴaar teemet-nikiis (400). A paysohha komaakca ŋ harmban Leya na Rasel na ñaam ca kanak ca.

² A adgiɗ ñaam ca kanak ca na kuɓuuca a raak na ɓa, a degga Leya nga na ɓaŋ ɗe, a mirndohiɗta Rasel na Yuusufa.

³ Ƴutta, a hannda adug ŋ fikiira a kaɗeeɗa, a ƴekɗeeɗa taambɗoh ce Esaaw poo a raakka waas yasna-kanak bala a reyan nga ɗe ɗah.

⁴ Esaaw nuppa, a kaɗta coha na ɗe. Wa a ree, a morgiɗukka ɗe, ɓa ambsukohha kanak, ɓa fuɗeeɗa.

⁵ Wa Esaaw hot ɓitiɓ ca na komaakca, a meekissa Yaŋhooɓa ne : « Ɓooɓi fu hun na ɓa ɓii, ɓa ye nga ɗa ? » Yaŋhooɓa loffa ɗe ne : « E kuɓuuci Kooh baahoh ho, kilifaani. »

⁶ Ñaam ca na kuɓuucaŋ ɓa reɓpa, ɓa ƴekiɗta Esaaw.

⁷ Leya na ɓaŋ ɗe nammba reɓ, ɓa tummba ɗaa. Ƴutta, Yuusufa na Rasel nammba tum ɗaa.

⁸ Esaaw meekissa ɗe ne : « An wa ye tah ɗa woosoh gat ci ŋ coh na ca jen ? » Yaŋhooɓa loffa ɗe an : « Ne fu teyɗuk ko moɗoɗ kilifaani. »

⁹ Esaaw woosa ɗe ne : « Ƴaariŋ ngo, ŋ raakiɗ po ŋ doyɗiɗ, fu miniɗ amb ini fu raak. »

¹⁰ Yaŋhooɓa loffa ɗe ne : « Muk ŋ kiim ɗa wa kiim ne fu ambɗisɗi so aay-keeñ ɗah, teya in ci ŋ on ɗa ; laam wi ŋ coh na ɗa fu teyɗukiɗ to moɗoɗ po haa ŋ coh na Kooh jahran.

¹¹ Mbaa teya in ci ŋ on ɗa, laam Kooh oniɗ to po ŋ raakiɗ lool. » Yaŋhooɓa ñaakiɗta ɗe na ca po Esaaw mirndohha ca ɓay.

¹² Esaaw woosa ɗe ne : « Haya ɓoo kaɗ, ŋ ɓend ɗa. »

¹³ Yaŋhooɓa woosa ɗe ne : « Kilifaani, fu inhiɗ ne komaakci ndengɗi te ŋ waaɗ seeskiɗ ɗoopaat ci na ɓapɗe ɗah, noh yino dong ca kaan jen.

¹⁴ Kon kilifaani, fu na hee so hey adge, ŋ hun na komaakci na gat ci, ŋ taambee nga ɗa ƴin-ƴin po mbaɗna ŋ raakan ɗa ŋ Seyiir. »

¹⁵ Esaaw woosa ɗe ne : « Mbaa, faɗa ŋ haawsiɗ ɗa ngaŋ ɓooɓiŋ ngo. » Yaŋhooɓa woosa ɗe ne : « Wa carɗaa, ŋ waaɗee rek ne fu teyɗuk ko moɗoɗ. »

¹⁶ Mbaɗi, Esaaw kooɗissa waas, a gurdeeɗa Seyiir,

¹⁷ waaye Yaŋhooɓa yurahha kur ka na woyse Sukkoot. A haɓiɗta kahan nga, a nammba ɗiipiɗ ɗoopaat caŋ ɗe nga ; weɗ tah ɗiska teekuusa Sukkoot (ɗiip).

¹⁸ Yaŋhooɓa reyiɗ Kanaan moɗoɗ kotii ŋ pulohaŋ ɗe Paddan-Aram, a yipee ŋ fiki kur ka na woyse Sisem.

¹⁹ A romohee yohna a yipohee ɗiip caŋ ɗe ngaŋ kuɓuucaŋ Hamor, baabiŋ Sisem. Candoomaŋ wa nikee ƴel haalis teemet (100).

²⁰ A haɓiɗta seeƴkoha nga ; a teekkaa El-Elohe-Israayel (Koohiŋ Israayel a yi Kooh).